హైదరాబాద్‌లో ఇంటి అద్దెలకు రెక్కలు

హైదరాబాద్ నగరం వేగంగా విస్తరిస్తోంది. ఒకప్పుడు చిన్న చిన్న పల్లెలుగా ఉన్న చట్టు పక్కల ప్రాంతాలు నగరంలో కలిసిపోయాయి. అందులో కొన్ని ప్రధాన ప్రాంతాలుగా మారిపోయాయి. అందులో మాదాపూర్ ఒకటిగా చెప్పవచ్చు. ఒకప్పుడు ఒక కుగ్రామంగా ఉన్న ఈ ప్రాంతానికి సాయంత్రం 6 తర్వాత వెళ్లేందుకు భయపడే వారు. కానీ, అక్కడ హైటెక్ సిటీ ఏర్పాటు కావడంతో ఆ ప్రాంత స్వరూపాన్నే మార్చేసింది. మల్టీ నేషనల్ ఐటీ కంపెనీలు అక్కడకు వచ్చాయి. అద్దాల మేడలు, ఆకాశాన్ని తాకే బిల్డింగులు, అపార్టుమెంట్లు, గేటెడ్ కమ్యూనిటీలు అంటూ భారీగా వచ్చేశాయి. హైటెక్ సిటీ, గచ్చిబౌలి వంటి ప్రాంతాల్లో ఐటీ కంపెనీలు భారీగా రావడంతో ఉద్యోగుల నుంచి నివాస గృహాలకు భారీగా డిమాండ్ పెరిగింది.

హైటెక్ సిటీ పరిసరాలు, ఐటీ కారిడార్ ప్రాంతాల్లో ఒకప్పుడు సింగల్ బెడ్ రూమ్ రూ.5 వేల నుంచి రూ.10 వేల మధ్య ఉండగా ఇప్పుడు అది రూ.20 వేల నుంచి రు.25 వేల వరకు పలుకుతున్నాయి. ఇక 1000 చదరపు అడుగులు ఉండే 2 బీహెచ్ఏ ఫ్లాట్ రెంటు 2020 ప్రాంతంలో రూ.23 వేలు ఉంటే ఇప్పుడు అది రూ.35 వేలకు చేరింది. ఐటీ కంపెనీలు, స్టార్టప్ సంస్థలు ఎక్కువగా ఈ ప్రాంతంలోనే ఉండడం ఇందుకు కారణంగా రియల్ ఎస్టేట్ విశ్లేషకులు చెబుతున్నారు. ఖాజాగూడలో గేటెడ్ కమ్యూనిటీల్లో 3 బీహెచ్ఏ ఇంటి రెంటు రూ.50 వేల వరకు పలుకుతోంది.

పెరుగుతున్న డిమాండుకు తగినట్లుగా కొత్త అపార్టుమెంట్లు అందుబాటులో లేకపోవడం అద్దెలు పెరిగేందుకు ప్రధాన కారణంగా విశ్లేషకులు చెబుతున్నారు. గడిచిన ఐదు సంవత్సరాల కాలంలో హైటెక్ సిటీలో ఇళ్ల అద్దెలు 50 శాతం మేర పెరిగినట్లు తెలిపారు. టూ-లెట్ బోర్డు పెట్టిన వారం లోపే అద్దెకు దిగిపోతున్నారు. సాధారణంగా నగరంలో బ్యాచిలర్లకు ఇల్లు అద్దెకు దొరకడం చాలా కష్ఠం. అయితే, ఇందుకు భిన్నంగా హైటెక్ సిటీ ప్రాంతంలో బ్యాచిలర్లకే ఎక్కువగా అద్దెకు ఇస్తుంటారు. అందులోనూ ఐటీ ఉద్యోగులకు తొలి ప్రాధాన్యం ఉంటుంది. ఐటీ ఉద్యోగులు పొద్దున ఆఫీసుకు వెళ్తే సాయంత్రం ఎప్పుడో వస్తారు, నీటి వినియోగం, విద్యుత్తు వినియోగం తక్కువగా ఉంటుందని ఓనర్లు భావిస్తున్నారు.

ఇక అపార్టుమెంట్లు, గేటెడ్ కమ్యూనిటీల్లో ఫర్నిష్డ్ ఫ్లాట్లు అద్దెకు లభిస్తాయి. కావాల్సిన ఫర్నిషర్, గృహోపకరణాలు ఉంటాయి. బెడ్లు, ఏసీలు, రిఫ్రిజిరేటర్లు, ఓవె న్లు, గీజర్లు, స్టవ్ వంటిన్నీ ఉంటాయి. కొద్ది కాలం మాత్రమే సిటీలో ఉండాలని వచ్చే వారు వీటిని ఎంచుకోవచ్చు. అయితే, వీటిల్లో అద్దెలు కాస్త ఎక్కువగా ఉంటాయి.