రూ.8 కోట్ల లగ్జరీ నౌక.. ప్రారంభించిన కాసేపటికే మునక

ఈమధ్య కాలంలో మన దగ్గర వందల కోట్ల రూపాయలు ఖర్చు చేసి నిర్మించిన బ్రిడ్జీలు, ఫ్లైఓవర్లు, రోడ్లు.. రోజులు, గంటల వ్యవధిలోనే కూలిపోతుండటం చూస్తున్నాం. ఇలాంటి సంఘటనలు తెర మీదకు వచ్చినప్పుడు ప్రభుత్వాల నిర్లక్ష్య ధోరణి మీద విమర్శలు చేస్తాం. ఇదిలా ఉంచితే తాజాగా ఓ వింత సంఘటన వెలుగులోకి వచ్చింది. కోట్ల రూపాయల విలువైన ఓ లగ్జరీ నౌక .. ప్రారంభించిన కొన్ని నిమిషాలకే సముద్రంలో ముగినిపోవడం సంచలనంగా మారింది. ప్రస్తుతం దీనికి సంబంధించిన వీడియో వైలర్‌గా మారింది. ఆ వివరాలు..

ఈ సంఘటన ఉత్తర టర్కీ తీరంలో వెలుగు చూసింది. జోంగుల్డాక్ తీరంలోని మెడ్ ఇల్మాజ్ షిప్‌యార్డ్‌లో ఈ నౌకను ఏర్పాటు చేశారు. దీని నిర్మాణం కోసం 1 మిలయన్ డాలర్లు అంటే మన కరెన్సీలో చెప్పాలంటే రూ.8.74 కోట్లు ఖర్చు చేశారు. రెండు రోజుల క్రితం అనగా మంగళవారం నాడు ఈ నౌక ప్రారంభం అయ్యింది. ఆ సమయంలో నౌకలో కొందరు ప్రయాణికులు, సిబ్బంది కూడా ఉన్నారు. లగ్జరీ నౌకలో ప్రయాణం చేస్తున్నామని మురిసిపోయినంత సేపు పట్టలేదు అది మునిగిపోవడానికి.

ప్రారంభమైన 15 నిమిషాలకే ఈ నౌక మునిగిపోయింది. నౌక మునుగుతున్నట్లు అర్థం అయిన వెంటనే దానిలో ఉన్న ప్రయాణికులు, సిబ్బంది సముద్రంలోకి దూకేశారు. అదృష్టం బాగుండి వారంతా క్షేమంగా ఒడ్డుకు చేరుకున్నారు. అయితే నౌక మునిగిపోవడం చూసి దాని యజమాని, కెప్టెన్ తీవ్ర నిరాశకు గురయ్యారు. అయినా చేసేదేం లేక వారు కూడా సముద్రంలోకి దూకి ప్రాణాలు కాపాడుకున్నారు. ప్రస్తుతం అందరూ సురక్షితంగా ఉన్నారని నిర్వాహకులు తెలిపారు.

న్యూయార్క్ పోస్ట్ ప్రకారం.. ఈ నౌక ఇస్తాంబుల్ నుంచి దాని యజమానికి డెలివరీ అయింది. అయితే ప్రారంభించిన కాసేపటికే నౌక మునిగిపోవడంపై ప్రస్తుతం దర్యాప్తు చేస్తున్నామని దాని యజమాని తెలిపారు. నౌక మునిగిపోతున్న వీడియో వైరల్ కావడంతో దీనిపై నెటిజనులు రకరకాలుగా స్పందిస్తున్నారు. ఇది ఏఐ వీడియో అనుకుంటాను.. ఇంత ఖరీదైన నౌక అలా ఎలా మునిగిపోయింది.. అసలేం జరిగిందో ఎవరైనా చెప్పగలరు అంటూ ఇంకొకరు కామెంట్ చేశారు. అయితే నౌక మునిగిపోవడానికి గల కచ్చితమైన కారణాలు ఇంకా తెలియలేదన్నారు. దీనిపై త్వరలోనే విచారణ చేపడతామని వెల్లడించారు. కోట్ల రూపాయల ఖరీదైన నౌక ఇలా నీటిపాలవ్వడం మాత్రం కాస్త బాధ కలిగించే అంశమనే చెప్పాలి.