జిన్‌పింగ్, పుతిన్‌ల మధ్య ఆసక్తికర చర్చ.. ‘జనాలు 150 ఏళ్లు బతకొచ్చు’

చైనా, రష్యా ఇరు దేశాధినేతల మధ్య అమరత్వం గురించి చర్చ నడిచిందా అంటే.. అవుననే అంటున్నాయి అంతర్జాతీయ మీడియా సంస్థలు. వీరద్దరి మధ్య రహస్యంగా జరిగిన సంభాషణ కాస్త మైక్రోఫోన్ ద్వారా లీక్ అవ్వడం వల్ల.. ఇరు దేశాధినేతల మనసులో ఏముంది అనే అంశం బయటకు వచ్చింది. ఇప్పటికే ఇరు దేశాల అధ్యక్షులు ఏకఛత్రాధిపత్యంతో ఏలేస్తుండగా.. తాజాగా వారి మధ్య ఎక్కువ కాలం బతకడం, అమరత్వం గురించి చర్చకు రావడం కాస్త ఆసక్తికరంగా మారింది.

ఇంతకు ఈ సంఘటన ఎక్కడ చోటు చేసుకుంది అంటే.. బుధవారం నాడు చైనా.. రెండో ప్రపంచయుద్ధంలో జపాన్‌పై గెలిచి.. 80 సంవత్సరాలు పూర్తయిన సందర్భంగా డ్రాగన్ ఆర్మీ బీజింగ్‌లో తియానన్మేన్‌ స్క్వేర్‌ వద్ద ఆయుధ ప్రదర్శన నిర్వహించింది. దీన్ని వీక్షించేందుకు పుతిన్ , షి జిన్‌పింగ్ , ఉత్తర కొరియా అధ్యక్షుడు కిమ్ జోంగ్ ఉన్ సహా ఇతర దేశాల నాయకులు హాజరయ్యారు. మొత్తం 24 మందికి పైగా విదేశీ నాయకులు ఈ కార్యక్రమంలో పాల్గొన్నారు.

ఈక్రమంలో రష్యా అధ్యక్షుడు వ్లాదిమిర్ పుతిన్, చైనా అధ్యక్షుడు షి జిన్‌పింగ్.. కిమ్‌తో కలిసి తియానన్మేన్ వేదిక వైపు నడుస్తూ వస్తుండగా.. పుతిన్, జిన్‌పింగ్ మధ్య ఆసక్తికర అంశాలపై చర్చించుకున్నారు. పుతిన్ మాట్లాడుతూ.. బయోటెక్నాలజీ ఎంతో అభివృద్ధి సాధించింది. దీని సాయంతో మనిషి తన శరీరంలో పాడైన, వయసు పైబడిన అవయవాలను నిరంతరం మార్పిడి చేసుకుంటూ.. మనిషి తన ఆయుష్షును పెంచుకోవచ్చు. చివరకు అమరత్వం కూడా సాధించవచ్చు అన్నారు.

అప్పుడు కెమెరాకు దూరంగా ఉన్న షి జిన్‌పింగ్ చైనీస్ భాషలో స్పందిస్తూ, ఈ శతాబ్దంలో మానవులు 150 సంవత్సరాల వరకు జీవించగలరని కొందరు అంచనా వేస్తున్నారు అని అభిప్రాయపడ్డారు. అయితే వీరి పక్కనే ఉన్న కిమ్.. నవ్వుతూ పుతిన్, షి వైపు చూస్తున్నారు. కిమ్‌కి వీరి సంభాషణ వినిపించిందా.. లేదా అనే విషయం స్పష్టంగా తెలియలేదు. అలానే ఈ క్లిప్‌లో పుతిన్ రష్యన్ భాషలో మాట్లాడటం స్పష్టంగా వినిపించలేదు. 30 సెకన్ల తర్వాత వీరంతా పరేడ్ వేదిక వైపు నడుచుకుంటూ వెళ్తూ స్క్రీన్ మీదకు వచ్చారు.

అయితే వీరి మధ్య జరిగిన ఈ సంభాషణ మొత్తం అక్కడి సీసీటీవీ కెమెరాకు అమర్చిన మైక్రోఫోన్‌ ద్వారా లైవ్ టెలికాస్ట్ అయిందని రాయిటర్స్‌ మీడియా తన కథనంలో చెప్పుకొచ్చింది. ఇదిలా ఉంటే.. జిన్‌పింగ్, పుతిన్ ఇద్దరి వయసు కూడా ఇప్పటికే 72 సంవత్సరాలు కావడం గమనార్హం. వచ్చే ఎన్నికల్లోనూ తానే అధ్యక్షుడిగా ఉండేలా జిన్‌పింగ్ ఇప్పటికే రాజ్యాంగంలో మార్పులు చేసిన సంగతి తెలిసిందే. అలానే రష్యా అధ్యక్షుడు పుతిన్‌ కూడా ఇలానే రాజ్యంగ సవరణ చేశారు. ఇప్పుడు వీరిద్దరి మధ్య అమరత్వం గురించి ప్రస్తావన రావడం చూస్తే.. వీరికింకా పదవి మీద ఆశ చావలేదని అర్ధం అవుతుంది అంటున్నారు నెటిజనులు.