తురకపాలెంలో వరుస మరణాలపై సీఎం చంద్రబాబు ఉన్నతస్థాయి సమీక్ష

గుంటూరు జిల్లా తురకపాలెం గ్రామంలో గత రెండు నెలలుగా చోటుచేసుకుంటున్న వరుస మరణాలు తీవ్ర కలకలం రేపుతున్న నేపథ్యంలో ముఖ్యమంత్రి చంద్రబాబు పరిస్థితిని సమీక్షించేందుకు రంగంలోకి దిగారు. గ్రామంలో నెలకొన్న పరిస్థితులను ‘హెల్త్ ఎమర్జెన్సీ’గా పరిగణించాలని, తక్షణం చర్యలు చేపట్టాలని వైద్యారోగ్య శాఖ అధికారులను ఆయన ఆదేశించారు. శుక్రవారం తన క్యాంపు కార్యాలయంలో ఉన్నతాధికారులతో అత్యవసర సమావేశం నిర్వహించిన సీఎం, ఈ సమస్య మూలాలను గుర్తించి, ప్రజల్లో భరోసా నింపాలని స్పష్టం చేశారు.గడిచిన జూలై, ఆగస్టు నెలల్లో గ్రామంలో పదుల సంఖ్యలో ప్రజలు అంతుచిక్కని వ్యాధితో మరణించడంపై సీఎం చంద్రబాబు తీవ్ర ఆందోళన వ్యక్తం చేశారు. దీనిపై సమగ్ర దర్యాప్తు జరిపి, అసలు కారణాలను నిగ్గు తేల్చాలని సూచించారు. తక్షణ కార్యాచరణలో భాగంగా, ఈ శని, ఆదివారాల్లో ప్రత్యేక వైద్య బృందాలను గ్రామానికి పంపించి, ప్రతి ఒక్కరికీ నిర్దేశించిన 42 రకాల వైద్య పరీక్షలు నిర్వహించాలని ఆదేశించారు. సోమవారం నాటికి గ్రామస్థులందరి ‘హెల్త్ ప్రొఫైల్’ సిద్ధం చేసి తనకు నివేదించాలని గడువు విధించారు. అనారోగ్యంతో తీవ్రంగా బాధపడుతున్న వారిని వెంటనే ఆసుపత్రులకు తరలించి మెరుగైన చికిత్స అందించాలని స్పష్టం చేశారు.“తురకపాలెం సమస్యను తేలిగ్గా తీసుకోవద్దు. అవసరమైతే ఎయిమ్స్ సహా కేంద్ర వైద్య బృందాలను గ్రామానికి రప్పించండి. అంతర్జాతీయ వైద్య నిపుణుల సలహాలు తీసుకోవడానికి కూడా వెనుకాడొద్దు” అని సీఎం అధికారులకు దిశానిర్దేశం చేశారు. పీల్చే గాలి, తాగే నీరు, తినే ఆహారం, భూమి ద్వారా కూడా బ్యాక్టీరియా వ్యాపించే ప్రమాదం ఉందని, అన్ని కోణాల్లోనూ పరిశోధన జరపాలని ఆయన ఆదేశించారు. గ్రామంలోని ప్రతి ఇంటికీ సురక్షితమైన తాగునీటిని అందించాలని, పరిశుభ్రతపై ప్రజలకు అవగాహన కల్పించాలని సూచించారు. “కొత్తగా ఒక్క కేసు కూడా నమోదు కాకూడదు. ప్రతి రోగిని నిరంతర వైద్య పర్యవేక్షణలో ఉంచాలి. స్థానిక ప్రజల్లో నమ్మకాన్ని పెంచాల్సిన బాధ్యత మీదే” అని సీఎం స్పష్టం చేశారు.ఈ సమావేశంలో వైద్యాధికారులు తమ ప్రాథమిక పరిశీలన వివరాలను ముఖ్యమంత్రికి వివరించారు. ప్రస్తుతం బాధితుల్లో కనిపిస్తున్న లక్షణాలు ‘మెలియోయిడోసిస్’ అనే బ్యాక్టీరియల్ ఇన్ఫెక్షన్‌ను పోలి ఉన్నాయని అనుమానం వ్యక్తం చేశారు. నిర్ధారణ కోసం రక్త నమూనాలను ల్యాబ్‌కు పంపామని, 72 గంటల్లో తుది నివేదికలు వస్తాయని తెలిపారు. తురకపాలెంలో పశుపోషణ అధికంగా ఉన్నందున, జంతువుల నుంచి ఏమైనా బ్యాక్టీరియా వ్యాపించిందా అనే కోణంలోనూ దర్యాప్తు చేస్తున్నామన్నారు.గ్రామంలో డయాబెటిస్, అధిక రక్తపోటు, గుండె జబ్బులు, బ్రెయిన్ స్ట్రోక్ వంటి దీర్ఘకాలిక వ్యాధులు ఎక్కువగా ఉన్నాయని, ఆల్కహాల్ వినియోగం కూడా అధికంగా ఉందని అధికారులు సీఎం దృష్టికి తెచ్చారు. సమీపంలో ఉన్న స్టోన్ క్రషర్ల కారణంగా వాతావరణ నాణ్యతను కూడా పరిశీలిస్తున్నట్లు చెప్పారు. బాధితుల్లో చాలామందికి మొదట జ్వరం, దగ్గుతో ప్రారంభమై, ఆ తర్వాత ఊపిరితిత్తులు దెబ్బతింటున్నాయని వివరించారు. మెలియోయిడోసిస్ ప్రధానంగా భూమిలో, నిల్వ ఉన్న నీటిలో ఉండే బ్యాక్టీరియా ద్వారా వ్యాపిస్తుందని, ముఖ్యంగా వర్షాకాలంలో దీని ప్రభావం ఎక్కువగా ఉంటుందని వైద్యులు తెలిపారు. చర్మంపై ఉన్న గాయాల ద్వారా లేదా కలుషిత నీటి ద్వారా ఈ బ్యాక్టీరియా శరీరంలోకి ప్రవేశిస్తుందని వారు పేర్కొన్నారు. ప్రస్తుతం ఈ వ్యాధిపై మైక్రోబయాలజీ విభాగం కూడా లోతుగా అధ్యయనం చేస్తోందని అధికారులు వివరించారు.