థాయ్ నూతన ప్రధానిగా బిలయనీర్.. అసలెవరీ అనుతిన్ చార్న్ విరాకుల్

థాయ్‌లాండ్ రాజకీయాల్లో ఒక కొత్త శకం మొదలైంది. దేశవ్యాప్తంగా సాగిన రాజకీయ అనిశ్చితికి తెర దించుతూ.. ప్రముఖ వ్యాపారవేత్త, బిలియనీర్ అనుతిన్ చార్న్ విరాకుల్ పార్లమెంట్ ఓటింగ్‌లో విజయం సాధించారు. థాయ్‌లాండ్‌కు కొత్త ప్రధాన మంత్రిగా ఎన్నికయ్యారు. దేశానికి కొత్త ప్రభుత్వాన్ని అందించేందుకు వివిధ పార్టీలు కూటమిని ఏర్పాటు చేసిన నేపథ్యంలో.. ఈ ఎన్నిక ఒక చారిత్రక పరిణామంగా నిలిచింది. ప్రజాస్వామ్య పద్ధతిలో ఎన్నికైన అనుతిన్ చార్న్ విరాకుల్ విజయం.. థాయ్ రాజకీయాల్లో వ్యాపార ప్రముఖుల ప్రాబల్యం పెరుగుతున్నదని మరోసారి రుజువు చేసింది.

థాయ్‌లాండ్‌లోని అన్ని ప్రధాన రాజకీయ పార్టీలు సుదీర్ఘ చర్చలు, సంప్రదింపుల తర్వాత ఒక సంకీర్ణ ప్రభుత్వాన్ని ఏర్పాటు చేయడానికి ముందుకు వచ్చాయి. ఈ సంకీర్ణానికి అనుతిన్ నాయకత్వం వహించనున్నారు. ఆయన నాయకత్వం వహిస్తున్న భూమ్‌జైథాయ్ పార్టీ ఈ కూటమిలో కీలక పాత్ర పోషించింది. గత కొంతకాలంగా దేశంలో నెలకొన్న రాజకీయ అస్థిరత, సైనిక ప్రభుత్వం నుంచి ప్రజాస్వామ్య పాలనకు మారే క్రమంలో తలెత్తిన సవాళ్లను అనుతిన్ ఇప్పుడు ఎదుర్కోవాల్సి ఉంటుంది.

అసెలవరీ అనుతిన్ చార్న్ విరాకుల్?

అనుతిన్ చార్న్ విరాకుల్ ఒక వ్యాపార దిగ్గజంగా మాత్రమే కాకుండా.. థాయ్ రాజకీయాల్లో తనకంటూ ఒక ప్రత్యేక గుర్తింపును తెచ్చుకున్నారు. ముఖ్యంగా మరిజ్వానాను చట్టబద్ధం చేయాలనే ఆయన పార్టీ వైఖరి దేశవ్యాప్తంగా సంచలనం సృష్టించింది. ఈ విధానం యువతతో పాటు వ్యవసాయదారుల నుంచి కూడా గణనీయమైన మద్దతును పొందింది. అయితే తాజాగా అనుతిన్ ప్రధాన మంత్రిగా ఎన్నిక కావడంతో.. ఈ వివాదాస్పద విధానం భవిష్యత్తులో ఎలా రూపుదిద్దుకుంటుందనే విషయంపై ఆసక్తి నెలకొంది.

ఇదిలా ఉండగా గత రెండేళ్లలోనే థాయ్‌లాండ్‌కు మూడో ప్రధాని రావడం అంతర్జాతీయ వ్యాప్తంగా అందరి దృష్టినీ ఆకర్షించింది. ముఖ్యంగా కంబోడియా సెనేట్ అధ్యక్షుడు హన్‌సేన్‌తో థాయ్‌లాండ్ మాజీ ప్రధాని పేటోంగ్టార్న్ షినవత్ర ఫోనులో మాట్లాడడం సంచలనం సృష్టించింది. ఇరు దేశాల మధ్య సరిహద్దు వివాదాలు తీవ్రంగా ఉన్న సమయంలో పొరుగుదేశం కీలక నేతతో.. షినవత్ర కీలక విషయాలను పంచుకున్నారు. ఆ ఫోన్ కాల్ ఆడియా కాస్త లీక్ కావడంతో.. ఈ వ్యవహారం అంతా వివాదాస్పదం అయింది.

ఈక్రమంలోనే దీనిపై విచారణ జరిపిన దేశ రాజ్యాంగ న్యాయస్థానం షినవత్ర తీరు నైతిక ప్రమాణాలను ఉల్లంఘించడమేనని తేల్చి చెప్పింది. రాజ్యాంగం ప్రకారం ఇలాంటి వారికి ప్రధాని స్థానంలో ఉండే అర్హత లేదంటూ ఆమెను తొలగించారు. ఈక్రమంలోనే అనుతిన్ చార్న్ విరాకులు నూతన ప్రధానిగా ఎన్నికయ్యారు.