ప్రాణాలు కాపాడుకోవాలని పారిపోయి వస్తే.. రైల్లోనే చంపేశారుగా

రష్యా-ఉక్రెయిన్ దేశాల మధ్య చాలా రోజులుగా యుద్ధం జరుగుతున్న విషయం అందరికీ తెలిసిందే. అయితే నిత్యం బాంబు పేలుళ్లు, శవాల దిబ్బలు, రక్తపు మడుగులు చూడలేక ఓ మహిళ ఉక్రెయిన్ నుంచి అమెరికా వచ్చేసింది. ప్రాణాలు కాపాడుకోవడంతో పాటు శాంతిని వెతుక్కోవాలని వచ్చిన ఆమె తాజాగా దారుణ హత్యకు గురైంది. ముఖ్యంగా రైల్లో ఉండగానే ఆమెను ఓ వ్యక్తి కత్తితో పొడిచి చంపేశాడు. ప్రస్తుతం ఇందుకు సంబంధించిన వీడియో నెట్టింట వైరల్ అవుతోంది.

ఉక్రెయిన్‌కు చెందిన 23 ఏళ్ల ఐరీనా జరుట్‌స్కా అనే మహిళ.. అక్కడి యుద్ధ వాతావరణాన్ని తట్టుకోలేకపోయింది. నిత్యం బాంబు పేలుళ్లు, తుపాకుల శబ్దాలతో పాటు రక్తపు మడుగులు, శవాల దిబ్బలను చూడలేకపోయింది. తన ప్రాణాలు కాపాడుకోవడంతో పాటు శాంతిని వెతుక్కుంటూ అమెరికాకు వచ్చింది. అయితే గతనెల 22వ తేదీన పనుల నిమిత్తం బయటకు వచ్చిన ఆమె.. ఛార్లెట్ నగరంలోని లైన్క్స్ బ్లూ లైన్ రైలులో ప్రయాణించింది. మరికాసేపట్లోనే ఆమె దిగిపోవాల్సి ఉండగా.. ఫోన్ చూసుకుంటూ కూర్చుండిపోయింది. అప్పటికే డెకార్లోస్ బ్రౌన్ జూనియర్ అనే 34 ఏళ్ల నిందితుడు రైలు బోగీలోకి ప్రవేశించి ఆమె వెనుక భాగంలో నిశ్శబ్దంగా వేచి ఉన్నాడు.

కాసేపు కాగానే డెకార్లోస్ బ్రౌన్ ఒక్కసారిగా తన చేతిలోని కత్తిని బయటకు తీసి ఏ మాత్రం కనికరం లేకుండా ఐరీనా వీపుపై మూడు సార్లు పొడిచాడు. ఈ ఆకస్మిక దాడికి షాక్‌కు గురైన ఐరీనా ఒక్కసారిగా కుప్పకూలిపోయింది. విషయం గుర్తించిన ప్రయాణికులు ఆమె చుట్టూ చేరి సాయం చేసేందుకు ప్రయత్నించారు. మరోవైపు నిందితుడు డెకార్లోస్ బ్రౌన్.. హత్య సమయంలో వేసుకున్న స్వెటర్‌ను విప్పేసి ఆ తర్వాతి స్టేషన్‌లో దిగిపోయాడు.

మరోవైపు స్టేషన్లోనే ప్రయాణికులు పోలీసులకు సమాచారం అందించారు. హుటాహుటిన సంఘటనా స్థలానికి చేరుకున్న పోలీసులు.. రైల్లోనే ప్రాణాలు కోల్పోయిన ఐరీనా మృతదేహాన్ని స్వాధీనం చేసుకున్నారు. పోస్టుమార్టం నిమిత్తం ఆస్పత్రికి తరలించారు. మరోవైపు సీసీటీవీ కెమెరాలు, వైరల్ అయిన వీడియో ఆధారంగా నిందితుడిని పట్టుకున్నారు. ముఖ్యంగా షార్లెట్‌లోని లీ మెక్‌డొనాల్డ్స్ సమీపంలో గల ఓ స్థానిక ఆసుపత్రిలో కత్తి గాయానికి చికిత్స పొందుతున్న డెకార్లోస్ బ్రౌన్‌ను పోలీసులు గుర్తించి అదుపులోకి తీసుకున్నారు. అక్కడే అతడు దాడికి ఉపయోగించిన కత్తిని కూడా స్వాధీనం చేసుకున్నారు. డెకార్లోస్ బ్రౌన్‌ను ఆసుపత్రి నుంచి డిశ్చార్జి చేసిన తర్వాత.. అతనిపై హత్యా నేరం కింద కేసు పెట్టి అరెస్ట్ చేశారు.

నిందితుడు డెకార్లోస్ బ్రౌన్‌కు పాత నేర చరిత్ర ఉన్నట్లు పోలీసులు తెలిపారు. అతను గతంలో దొంగతనం, ప్రమాదకరమైన ఆయుధాలతో దోపిడీ, బెదిరింపులకు పాల్పడిన నేరారోపణలను ఎదుర్కొన్నాడు. అంతేకాకుండా గతంలో కూడా ఒక దోపిడీ కేసులో ఐదేళ్ల జైలు శిక్ష అనుభవించాడు. అతడు ఎందుకు ఐరీనాపై దాడి చేశాడన్న దానిపై పోలీసులు ఇప్పటికీ స్పష్టత ఇవ్వలేదు. ఈ కేసులో ఇంకా ఎటువంటి ఉద్దేశం లేదా ప్రేరేపణ బయటపడలేదు. అయినప్పటికీ డెకార్లోస్ బ్రౌన్‌పై నమోదైన నేరాల ఆధారంగా.. అతని చర్యలు అతని గత నేర స్వభావానికి అద్దం పడుతున్నాయని పోలీసులు భావిస్తున్నారు.

ఈ ఘటన అమెరికాలో పెరుగుతున్న నేరాల స్థాయిని.. ముఖ్యంగా శరణార్థుల భద్రతపై ఆందోళనలను పెంచింది. ఐరీనా జరుట్‌స్కా ఆత్మకు శాంతి కలగాలని ప్రతి ఒక్కరూ ప్రార్థిస్తున్నారు. ఈ దారుణం అమెరికాలో నివసిస్తున్న శరణార్థులలో భద్రత పట్ల భయాన్ని పెంచింది.