వరదల్లో ఇరుక్కున్న ప్రజలను పరామర్శిస్తూ,,, వారి భుజాలపై ఎంపీ ప్రయాణం

కుండపోత వర్షాల కారణంగా బీహార్‌లోని కతిహార్ జిల్లాలో జనజీవనం పూర్తిగా అస్తవ్యస్తమైంది. వరదలు, నీటిమట్టం పెరగడంతో లోతట్టు ప్రాంతాలు పూర్తిగా నీట మునిగిపోయాయి. దీంతో అక్కడి ప్రజలు తీవ్ర ఇబ్బందులు పడుతున్నారు. ఈ క్లిష్ట సమయంలో స్థానిక కాంగ్రెస్ ఎంపీ తారీఖ్ అన్వర్ వరద ప్రభావిత ప్రాంతాలను పర్యటించడం మొదట ప్రశంసనీయంగా అనిపించినా.. ఆయన పర్యటించిన తీరు తీవ్ర వివాదానికి దారితీసింది. రాజకీయ ప్రత్యర్థులు ఈ సంఘటనను వ్యతిరేకిస్తూ ఎంపీని విమర్శిస్తున్నారు.

సాధారణంగా ప్రజలు వరద నీటిలో నడుస్తూ తమ సమస్యలను పంచుకుంటే.. ఎంపీ మాత్రం నీటిలో దిగకుండా గ్రామస్థుల భుజాలపై కూర్చుని పర్యటించారనే ఆరోపణలు వెల్లువెత్తాయి. దీనికి సంబంధించిన ఒక వీడియో సోషల్ మీడియాలో వైరల్ కావడంతో.. ఈ విషయం దేశవ్యాప్తంగా చర్చనీయాంశంగా మారింది. అయితే ఈ ఆరోపణలను కాంగ్రెస్ పార్టీ తీవ్రంగా ఖండించింది. ఎంపీ తారీఖ్ అన్వర్ అనారోగ్యంతో ఉన్నందున.. ఆయన ఆరోగ్య పరిస్థితిని దృష్టిలో ఉంచుకుని గ్రామస్థులు స్వచ్ఛందంగా ఆయన్ను భుజాలపై మోసుకెళ్లారని పార్టీ నాయకులు వివరించారు.

కతిహార్ ఎంపీగా ఉన్న తారీఖ్ అన్వర్.. వరద పరిస్థితిని స్వయంగా అంచనా వేయడానికి రెండు రోజుల పాటు తన నియోజక వర్గంలో పర్యటించారు. ఈ పర్యటనలో ఆయన ట్రాక్టర్‌లు, పడవలు వంటి వివిధ రకాల రవాణా మార్గాలను ఉపయోగించారు. ఒకచోట బురద కారణంగా వాహనం ముందుకు వెళ్లలేని పరిస్థితి తలెత్తింది. అక్కడి నుంచి సుమారు రెండు కిలో మీటర్ల దూరం కాలి నడకన వెళ్లాలి. అదే సమయంలో ఎండ తీవ్రత కూడా అధికంగా ఉండటంతో.. వృద్ధుడైన ఎంపీ అస్వస్థతకు గురయ్యారు. ఆయనకు తలతిరుగుతున్నట్లు చెప్పడంతో.. గ్రామస్థులు ఆయనపై చూపిన ప్రేమ, గౌరవంతో ఆయన్ను భుజాలపై మోసుకెళ్లారు. ఒక పోలీస్ అధికారి కూడా వారికి సహాయం చేశారు. ఇది స్వచ్ఛందంగా జరిగిన సంఘటన తప్పే.. దీని వెనుక ఎలాంటి ఉద్దేశం లేదని కతిహార్ జిల్లా కాంగ్రెస్ అధ్యక్షుడు సునీల్ యాదవ్ స్పష్టం చేశారు.

ఈ పర్యటన అనంతరం ఎంపీ తారీఖ్ అన్వర్ తన ఎక్స్ ఖాతాలో కొన్ని చిత్రాలను, వీడియోలను పంచుకున్నారు. వరద బాధితులకు తన సంఘీభావాన్ని తెలియజేస్తూ.. ప్రజలు ఎదుర్కొంటున్న కష్టాలను ప్రభుత్వం తక్షణమే గుర్తించి, వారికి తగిన సహాయక చర్యలు చేపట్టాలని ఆయన కోరారు. అయితే ఆయన పర్యటించిన తీరుపై ప్రతిపక్షాల నుంచి విమర్శలు కొనసాగుతూనే ఉన్నాయి. తమ నాయకులు ప్రజల భుజాలపై ఎక్కి వారి కష్టాలను చూడటాన్ని బీజేపీ "వి.వి.ఐ.పి. సంస్కృతి"గా అభివర్ణించింది.

అయితే కష్టంలో ఉన్న ప్రజల పట్ల నిజమైన సానుభూతి, సహాయం అందించాలనే ఉద్దేశంతోనే ఈ పర్యటన జరిగిందని కాంగ్రెస్ పార్టీ వాదిస్తోంది. ఈ వివాదం రాజకీయ వర్గాల్లో ప్రస్తుతం హాట్ టాపిక్‌గా మారింది. ఈ సంఘటన బీహార్‌లోని ప్రస్తుత రాజకీయ వాతావరణాన్ని, అలాగే ప్రజల కష్టాల పట్ల నాయకుల బాధ్యతను సూచిస్తుంది.