మహిళ ప్రాణం కాపాడిన మొసలి: గంగలో దూకాక చెట్టుపైకి ఎక్కించి మరీ

సాధారణంగా మొసలి పేరు వింటేనే చాలా మంది భయపడిపోతుంటారు. వామ్మో మొసలా అంటుంటారు. ఎందుకంటే అది అందరినీ కరుస్తుంది. నమిలి మింగేస్తుంది. ప్రాణాలు కూడా తీసేస్తుందని. కానీ ఇలాంటి ఓ మొసలే... ఓ మహిళ ప్రాణాలు కాపాడింది. ముఖ్యంగా ఆత్మహత్యాయత్నం చేసుకునేందుకు ఆమె గంగానదిలో దూకగా.. మొసలి కనిపించింది. దీంతో భయపడిపోయిన ఆమె వెంటనే దగ్గర్లో ఉన్న చెట్టుపైకి ఎక్కేసింది. అలా ఆమె ప్రాణాలు నిలవగా.. అంతా ఆశ్చర్యపోతున్నారు. అసలీ ఘటన ఎక్కడ జరిగిందో మనం ఇప్పుడు తెలుసుకుందాం పదండి.

ఉత్తర ప్రదేశ్‌లోని ఉన్నావ్ జిల్లాలో ఈ ఘటన జరిగింది. వ్యక్తిగత సమస్యల వల్ల తీవ్ర మనోవేదనకు గురైన ఒక మహిళ తన జీవితాన్ని ముగించుకోవాలని నిర్ణయించుకుంది. నిశ్శబ్దంగా గంగా నది దగ్గరకు వెళ్లి.. ఎవరూ చూడకముందు నీళ్లలోకి దూకింది. ఇంకాసేపట్లో నీళ్లలో మునిగిపోతుందనగా.. ఓ భయంకరమైన దృశ్యం ఎదురైంది. తన వైపు వేగంగా వస్తున్న ఒక పెద్ద మొసలి కనిపించింది. ఆ మృగం కళ్లు, నోరు ఆమెను తీవ్రంగా భయపెట్టాయి. ఆ క్షణంలో ఆత్మహత్య చేసుకోవాలనే ఆలోచన పూర్తిగా మర్చిపోయిన ఆమె.. తన ప్రాణాలను రక్షించుకోవాలనే ప్రవృత్తి బలంగా మేల్కొంది. ఇలా ఆమెకు తెలియకుండానే బతకాలనే కోరిక మరింత బలమైంది.

 క్షణాల్లోనే మొసలి బారిన పడకుడా ఉండేందుకు ఆమె.. తన దగ్గర్లో ఉన్న ఒక చిన్న చెట్టును చూసి ఎలాగైనా దాన్ని చేరుకోవాలని నిర్ణయించుకుంది. ప్రాణభయంతో భీకరమైన వేగంతో ఈదుతూ.. ఆ మొసలికి దొరక్కుండా జాగ్రత్తగా తప్పించుకుంది. ఆమె ఆ చెట్టును చేరుకుని దానిపైకి ఎక్కి తన ప్రాణాలను కాపాడుకోవడానికి బిగ్గరగా అరవడం మొదలుపెట్టింది. ఆమె కేకలను విన్న గ్రామస్థులు ఆ వైపుగా చూసి ఆశ్చర్యపోయారు. ఒక మహిళ నది మధ్యలో ఉన్న చెట్టును పట్టుకుని అరుస్తున్న దృశ్యాన్ని గమనించి ఆమెను కాపాడాలనుకున్నారు.

ఆస్పత్రిలో చేర్పించి, కౌన్సిలింగ్ ఇప్పించి..!

ఒక్క క్షణం కూడా ఆలస్యం చేయకుండా పడవలో వచ్చి ఆమెను రక్షించారు. సురక్షితంగా చెట్టు మీద నుంచి పడవలోకి దింపి ఒడ్డుకు చేర్చారు . ఆమె పరిస్థితి చూసి గ్రామస్థులంతా ఆశ్చర్యం పోయారు. ముఖ్యంగా ఆమె కథ విని.. మొసలే మీ ప్రాణం కాపాడిందని చెప్పారు. ముఖ్యంగా మొసలి నుంచి ప్రాణాలను రక్షించుకోవడానికి పోరాడిన ఆమె ధైర్యాన్ని అభినందించారు. అనంతరం ఆమెను చికిత్స నిమిత్తం స్థానిక ఆసుపత్రికి తరలించి.. కౌన్సెలింగ్ కూడా ఇప్పించారు.