మీ పాత ఐటీ రిటర్ను పత్రాలు పడేస్తున్నారా.. అడ్డంగా బుక్కవుతారు

ఆదాయపు పన్ను చెల్లింపుదారులకు బిగ్ అలర్ట్. మీరు ఐటీఆర్ ఫైల్ చేసి రీఫండ్ పొందిన తర్వాత ఆ రిటర్నులకు సంబంధించిన పత్రాలను పడేయడం లేదా చింపేయడం వంటి పొరపాట్లు చేస్తున్నారా? అయితే ఈ కథనం మీకోసమే. ఐటీ రిటర్నులకు సంబంధించిన డాక్యుమెంట్లను కొన్ని సంవత్సరాల పాటు భద్రపరుచుకోవాల్సి ఉంటుంది. ఇన్‌కమ్ ట్యాక్స్ విభాగం ఎప్పుడైనా మీ పాత ఐటీఆర్ పత్రాలు అడగవచ్చు. అయితే మరి ఎన్ని సంవత్సరాలు పాత ఐటీ రిటర్నుల డాక్యుమెంట్స్ భద్రపరుచుకోవాలి? అనేది తెలుసుకుందాం.

ఇన్‌కమ్ ట్యాక్స్ చట్టం 1961లో ఐటీఆర్ పత్రాలను ఎన్నేళ్లు భద్రపరచాలి అనేది కచ్చితంగా చెప్పలేదు కానీ, సెక్షన్ 149 ప్రకారం ఇన్‌కమ్ ట్యాక్స్ విభాగం నోటీసులు ఇచ్చేందుకు అవకాశం కల్పించారు. అసెస్మెంట్ ఇయర్ ముగిసిన 8 సంవత్సరాల వరకు ఐటీ శాఖ నోటీసులు పంపించేందుకు వీలుంటుంది. అలాగే విదేశీ ఆదాయ, ఆస్తులు ఉన్న కేసుల్లో అయితే ఇది 16 సంవత్సరాలుగా ఉంటుంది. అంటే ఈ నోటీస్ పీరియడ్ ముగిసే వరకు ఐటీఆర్ పత్రాలను భద్రంగా దాచుకోవాల్సి ఉంటుంది. లేదంటే చిక్కుల్లో పడాల్సి వస్తుంది.

 వ్యక్తిగత ఆదాయపు పన్ను చెల్లింపుదారులు, హిందూ అవిభాజ్య కుంటుంబాలు, వ్యాపారులు తమ ఇన్‌కమ్ ట్యాక్స్ రిటర్నులకు సంబంధించిన రికార్డులను ఏటీఆర్ ఫైల్ చేసిన తర్వాత 8 సంవత్సరాల పాటు భద్రపరచాలని ట్యాక్స్ నిపుణులు చెబుతున్నారు. ఎందుకంటే ఈ 8 ఏళ్లలో ఐటీ శాఖ ఎప్పుడైనా నోటీసులు ఇచ్చేందుకు అవకాశం ఉంది. ఇక విదేశీ ఆదాయం ఆస్తులు ఉన్న కేటగిరీలో ఉన్న వారికి ఇది 16 సంవత్సరాలుగా ఉంటుంది. ఉదాహరణకు మీరు 2022-23 ఆర్థిక సంవత్సరంలో ఐటీఆర్ ఫైల్ చేశారు అనుకుందాం. వాటికి సంబంధించిన రికార్డులను 2030-31 ఆర్థిక సంవత్సరం ముగిసే వరకు భద్రపరచాల్సి ఉంటుంది. ఇక విదేశీ ఆదాయం, ఆస్తులు ఉంటే 2038-39 ఆర్థిక ఏడాది ముగిసే వరకు ఉండాలి.

పాత ఇన్‌కమ్ ట్యాక్స్ రికార్డులను భద్రపరిచేందుకు చాలా కారణాలు ఉన్నాయి. ముఖ్యంగా ఏదైనా తప్పులు దొర్లినప్పుడు మీరు రివైజ్డ్ రిటర్నులు ఫైల్ చేసేందుకు ఉపయోగపడతాయి. గత సంవత్సరాల్లో వచ్చిన నష్టాలు, మినహాయింపు క్లెయిమ్స్‌ను ముందు సంవత్సరాలకు బదిలీ చేసేందుకు అవకాశం లభిస్తుంది. ఇక వ్యాపారాల విషయానికి వస్తే ట్యాక్స్ ఆడిట్ రూల్స్ ప్రకారం కనీసం 8 ఏళ్లు పత్రాలు భద్రపరుచుకోవాల్సి ఉంటుంది. ఒక వేళ ట్యాక్స్ విభాగం నుంచి నోటీసులు అందినప్పుడు అన్ని డాక్యుమెంట్లు భద్రంగా ఉంటే సరైన సమాధానం అందించేందుకు వీలు కలుగుతుంది.

ట్యాక్స్ పేయర్లు తమ ఐటీఆర్ ఫైల్ చేసిన తర్వాత తమ శాలరీ, రెంట్, ప్రాపర్టీ ట్రాన్సాక్షన్లకు సంబంధించిన ఫారం 16, 16ఏ, 16బీ, 16సీ భద్రపరుచుకోవాలి. అలాగే యాన్యువల్ బ్యాంక్ స్టేట్మెంట్, పెట్టుబడుల ధ్రువీకరణ పత్రాల వంటివి ఉండాలి. క్యాపిటల్ గెయిన్స్ ఉంటే వాటి రికార్డులు, ఆస్తుల అమ్మకం కొనుగోలు పత్రాలు ఉండాలి. అలాగే లోన్ వడ్డీ సర్టిఫికెట్లు, రెట్ రిసిఫ్టులు, హెచ్ఆర్ఏ క్లెయిమ్స్, దివ్యాగుల ప్రత్యేక అలవెన్స్ ప్రూఫ్స్ వంటివి ఉండాలి.