బాదం, జీడిపప్పు, పిస్తా ఏ నట్స్ ఎంతసేపు నానబెట్టాలో తెలుసా

కరోనా తర్వాత చాలా మంది ఆరోగ్యంపై ప్రత్యేక శ్రద్ధ తీసుకుంటారు. ఆ శ్రద్ధలో భాగంగా డ్రై ఫ్రూట్స్‌ని ఎక్కువ తీసుకుంటున్నారు. అందుకే కరోనా తర్వాత వీటి డిమాండ్ పెరిగింది. డ్రై ఫ్రూట్స్ ఆరోగ్యానికి చాలా మేలు చేస్తాయి. వీటిలో విటమిన్లు, ఖనిజాలు, ఆరోగ్యకరమైన కొవ్వులు పుష్కలంగా ఉంటాయి. ఇవి శరీరానికి శక్తిని ఇవ్వడంతో పాటు బ్రెయిన్‌ని షార్ప్ చేస్తాయి. ఇక, డ్రై ఫ్రూట్స్ నానబెట్టిన తర్వాత వాటి ప్రయోజనాలు మరింత పెరుగుతాయని నిపుణులు అంటున్నారు. ప్రముఖ ఆయుర్వేద పోషకాహార నిపుణురాలు శ్వేతా షా ప్రకారం, డ్రై ఫ్రూట్స్ నానబెట్టడం వల్ల వాటి జీర్ణక్రియ సులభతరం అవుతుంది. శరీరానికి అవసరమైన పోషకాలు బాగా లభిస్తాయి. అయితే, ఏ డ్రై ఫ్రూట్స్‌ను ఎంత నానబెట్టాలో తెలుసుకోవాలి.

బాదంపప్పు

బాదంలో ఫైబర్, విటమిన్లు, ఖనిజాలు, ఒమేగా-3 కొవ్వు ఆమ్లాలు పుష్కలంగా ఉంటాయి. రోజూ వీటిని తినడం వల్ల అనేక రోగాల్ని నివారించవచ్చు. రోగనిరోధక శక్తి పెంచడంలో బాదంపప్పు సాయపడతాయి. పోషకాహార నిపుణులు బాదంపప్పును తినడానికి ముందు 8 గంటలు నానబెట్టాలని చెబుతున్నారు. నానబెట్టిన బాదంపప్పులు విటమిన్ ఇని బాగా గ్రహించడంలో సాయపడుతుంది. ఇది చర్మాన్ని మెరిసేలా చేస్తుంది. మెదడు ఆరోగ్యాన్ని మెరుగుపరుస్తుంది. నానబెట్టిన బాదంపప్పులు సులభంగా జీర్ణమవుతాయి.

వాల్‌నట్స్

వాల్‌నట్స్‌లో విటమిన్లు, ఫైబర్, యాంటీఆక్సిడెంట్లు, ఫైబర్ పుష్కలంగా ఉంటాయి. వాల్‌నట్స్‌లో ఉండే ఒమేగా-3 గుండె జబ్బుల నుంచి రక్షిస్తుంది. దీంతో పాటు, ప్రతిరోజూ వాల్‌నట్స్ తినడం వల్ల శరీరంలోని వివిధ భాగాలకు ప్రయోజనం చేకూరుతుంది. వాల్‌నట్స్‌ను దాదాపు 6 గంటలు నానబెట్టి, ఆపై తినాలని న్యూట్రిషనిస్ట్ శ్వేతా షా చెబుతున్నారు. వాల్‌నట్‌లు ఒమేగా-3 కొవ్వు ఆమ్లాలకు గొప్ప మూలం. ఇది గుండెను ఆరోగ్యంగా ఉంచడంలో, జ్ఞాపకశక్తిని పదును పెట్టడంలో సాయపడుతుంది.

జీడిపప్పు

​జీడిపప్పు ఫైబర్, ఐరన్, కాల్షియం, మెగ్నీషియం, ఫాస్పరస్, సెలీనియం వంటి అనేక ముఖ్యమైన పోషకాలకు గొప్ప మూలం. జీడిపప్పు పురుషుల పురుష శక్తిని పెంచడంలో, రక్తపోటు, కొలెస్ట్రాల్ స్థాయిలను నియంత్రించడంలో సాయపడుతుంది. జీడిపప్పును 4-6 గంటలు నానబెట్టడం వల్ల అవి క్రీమీగా, మృదువుగా మారుతాయి. అవి జీర్ణవ్యవస్థకు అనుకూలంగా ఉంటాయి. పాల రహిత వంటకాలకు నానబెట్టిన జీడిపప్పు అనుకూలంగా ఉంటాయి.

పిస్తాపప్పు

పిస్తాపప్పును పోషకాల పవర్ హౌస్ అంటారు. పిస్తాపప్పులో కాల్షియం, పొటాషియం, మెగ్నీషియం, విటమిన్ సి వంటి పోషకాలు ఉంటాయి. ఇది శరీరాన్ని అనేక సమస్యల నుంచి రక్షించడంలో సాయపడుతుంది. పిస్తాపప్పు కళ్లకు చాలా ప్రయోజనకరంగా ఉంటాయి. పిస్తాపప్పు తినడం వల్ల ఊబకాయం, రక్తపోటు, డయాబెటిస్ కంట్రోల్ చేయవచ్చు. పిస్తాపప్పుల్ని 6-8 గంటలు నానబెట్టడం వల్ల శరీరంలో ప్రోటీన్లు, ఖనిజాల శోషణ మెరుగుపడుతుంది. ఇది శక్తిని అందించడంలో, కండరాల పునరుద్ధరణలో సాయపడుతుంది.

అంజీర్ పండ్లు

ఆరోగ్యం కోసం ఎండిన అంజీర్ పండ్లను నానబెట్టి తినాలని వైద్యులు తరచుగా సిఫార్సు చేస్తారు. ఇది శరీరం నుంచి బలహీనతను తొలగించడం ద్వారా రక్తాన్ని పెంచడంలో సాయపడుతుంది. ఇది మలబద్దకం వంటి సమస్యల నుంచి రిలీఫ్ అందిస్తుంది. అంజీర్ పండ్లలో పొటాషియం, యాంటీ ఆక్సిడెంట్లు, విటమిన్ సి, ఇ, ఎ ఉంటాయి. అంజీర్ పండ్లను 6-8 గంటలు నానబెట్టి, తరువాత తినండి. ఇది సహజ భేదిమందు. ఇది జీర్ణక్రియకు మంచిది. ఇందులో ఉండే ఐరన్, కాల్షియం రక్తహీనతకు, ఎముకలను బలోపేతం చేయడానికి ప్రయోజనకరంగా ఉంటాయి.

హాజెల్ నట్స్

హాజెల్ నట్స్ పోషకాలతో సమృద్ధిగా ఉంటాయి. ఇది మొత్తం ఆరోగ్యానికి మంచిది. హాజెల్ నట్స్ కేలరీలతో సమృద్ధిగా ఉంటాయి. అంతేకాకుండా ప్రోటీన్, కార్బోహైడ్రేట్స్ ఫైబర్, విటమిన్ E, విటమిన్ B6, థియామిన్, మెగ్నీషియం, రాగి, మాంగనీస్, ఫోలేట్, ఫాస్పరస్, పొటాషియం, జింక్ వంటి పోషకాలతో నిండి ఉంటాయి. ఇది మాత్రమే కాదు ఒమేగా-6, ఒమేగా-9 కొవ్వు ఆమ్లాలు కూడా హాజెల్ నట్స్‌లో పుష్కలంగా ఉంటాయి. వీటిని 8 గంటలు నానబెట్టాలి. వీటిలో ఉండే మెగ్నీషియం, యాంటీ ఆక్సిడెంట్లు నాడీ వ్యవస్థ, గుండె ఆరోగ్యానికి చాలా మంచిది.

డ్రై ఫ్రూట్స్ ఎందుకు నానబెట్టాలి?

పోషకాహార నిపుణుల ప్రకారం, డ్రై ఫ్రూట్స్‌పై సహజమైన పొర ఉంటుంది. ఇది వాటిని ఎక్కువ కాలం సురక్షితంగా ఉంచుతుంది. నానబెట్టడం వల్ల ఈ పొర తొలగిపోతుంది. ఇది పోషకాలను తెరుస్తుంది. శరీరం వాటిని సులభంగా గ్రహించగలదు. అలాగే, నానబెట్టిన డ్రై ఫ్రూట్స్ జీర్ణం కావడం సులభం. పిల్లల నుంచి వృద్ధుల వరకు అందరికీ ఆరోగ్యకరమైన చిరుతిండిగా మారుతాయి. ప్రతి ఒక్క డ్రై ఫ్రూట్స్ చెప్పిన టైమ్ ప్రకారం నానబెట్టి తింటే శరీరానికి డబుల్ బెనిఫిట్స్ అందుతాయని శ్వేతా షా అంటున్నారు.