జైర్ బోల్సోనారోకు 27 ఏళ్ల జైలు శిక్ష,,,బ్రెజిల్ మాజీ అధ్యక్షుడికి గట్టి షాక్

 బ్రెజిల్ రాజకీయాల్లో ఒక కీలక పరిణామం చోటు చేసుకుంది. మాజీ అధ్యక్షుడు జైర్ బోల్సోనారోకు దేశంలో సైనిక తిరుగుబాటుకు కుట్ర పన్నిన కేసులో 27 ఏళ్ల జైలు శిక్ష విధిస్తూ సుప్రీం ఎలక్టోరల్ కోర్టు చరిత్రాత్మక తీర్పు వెలువరించింది. 2022లో జరిగిన అధ్యక్ష ఎన్నికలలో ఓటమి తర్వాత ప్రజాస్వామ్య వ్యవస్థను అణగదొక్కడానికి ఆయన తన అధికారాన్ని దుర్వినియోగం చేశారని కోర్టు నిర్ధారించింది. జైర్ బోల్సోనారో తన పదవీకాలంలో, ఎన్నికల అనంతరం అనేక అభ్యంతరకర చర్యలకు పాల్పడ్డారని కోర్టు పేర్కొంది. ముఖ్యంగా ఎన్నికల ఫలితాలను అంగీకరించకుండా, వాటిని తప్పుదోవ పట్టించడానికి అనేక కుట్రలు పన్నారని వెల్లడించింది.

ఇందులో భాగంగానే ప్రజాస్వామ్యాన్ని రద్దు చేసి, అధికారాన్ని స్వాధీనం చేసుకోమని సైనిక అధికారులను ఒత్తిడి చేశారని కూడా న్యాయస్థానం తెలిపింది. అంతేకాకుండా ఎన్నికలలో పెద్ద ఎత్తున అక్రమాలు జరిగాయని ఆరోపిస్తూ.. తప్పుడు సమాచారాన్ని పెద్ద ఎత్తున ప్రచారం చేశారని స్పష్టం చేసింది. ఈ కుట్రలో భాగంగా బోల్సోనారో మద్దతుదారులు బ్రెజిల్‌లోని ప్రధాన ప్రభుత్వ భవనాలైన అధ్యక్ష భవనం, సుప్రీం కోర్టు, కాంగ్రెస్ భవనాలపై దాడికి పాల్పడ్డారు. ఈ ఘటన అమెరికాలో జరిగిన జనవరి 6 కేపిటల్ అల్లర్లను పోలి ఉందని విశ్లేషకులు భావిస్తున్నారు.

జనవరి 8వ తేదీన జరిగిన ఈ హింసాత్మక ఘటనకు బోల్సోనారోనే కారణమని కోర్టు తన తీర్పులో స్పష్టం చేసింది. ఈ కేసులో ఆయనపై వచ్చిన అన్ని ఆరోపణలు నిరూపితం అయ్యాయని పేర్కొంది. కోర్టు ఇచ్చిన ఈ తీర్పు బోల్సోనారో రాజకీయ జీవితానికి దాదాపు ముగింపు పలికినట్టేనని రాజకీయ పండితులు భావిస్తున్నారు. మరోవైపు తీర్పు తర్వాత బోల్సోనారో మీడియాతో మాట్లాడుతూ.. తాను నిరపరాధినని చెప్పుకున్నారు. ఈ తీర్పును పైకోర్టులో సవాలు చేస్తానని అన్నారు.

అయితే ఈ శిక్షతో ఆయన రాబోయే దశాబ్దాల పాటు ఎన్నికల్లో పోటీ చేయకుండా నిషేధించబడే అవకాశం ఉంది. ఇది బ్రెజిల్‌లో భవిష్యత్ రాజకీయాలపై తీవ్ర ప్రభావం చూపవచ్చని నిపుణులు అభిప్రాయ పడుతున్నారు. ఆయన తన ప్రసంగాల ద్వారా తన మద్దతుదారులను రెచ్చగొట్టడం, ప్రభుత్వం పట్ల అపనమ్మకాన్ని సృష్టించడం వంటివి చేశారని కోర్టు తన తీర్పులో కఠినంగా వ్యాఖ్యానించింది. ఈ తీర్పు బ్రెజిల్ ప్రజాస్వామ్య చరిత్రలో ఒక ముఖ్యమైన ఘట్టంగా నిలిచిపోతుందని, ఇది రాజకీయ నేరాలకు, ప్రజాస్వామ్య వ్యతిరేక చర్యలకు ఒక హెచ్చరికగా ఉంటుందని పరిశీలకులు భావిస్తున్నారు. చూడాలి మరి ఏం జరగనుంది అనేది.