20 ఏళ్లపాటు కూతురే ప్రాణంగా బతికింది... చివరికి ఆ బిడ్డ చేతిలోనే

కుటుంబ బంధాల విలువలు క్షీణించి, ఆస్తిపాస్తుల కోసం సొంతవారిని చంపుకోవడానికి కూడా వెనుకాడడం లేదు నేటి సమాజం. కుమారులే కాదు కుమార్తెలు కూడా దారుణాలకు పాల్పడుతున్నారు. కనిపెంచిన కన్నవారిని ఆస్తుల కోసం పొట్టన పెట్టుకుంటున్నారు. తాజాగా జనగామ జిల్లాల్లో దారుణ ఘటన వెలుగులోకి వచ్చింది. ఆస్తి, డబ్బు కోసం సొంత కూతురు కన్న తల్లిని దారుణంగా హత్యల చేసింది. ఈ ఘటన సమాజంలో పెరిగిపోతున్న కౄరత్వాన్ని సూచిస్తోంది.

జనగామ జిల్లా పాలకుర్తి మండలం.. కొండాపురం పెద్దతండాకు చెందిన బాదావత్ లక్ష్మి (45) భర్తను కోల్పోయి 20 ఏళ్లు అయింది. వ్యవసాయం, కూలీ పనులు చేసుకుంటూ తన ఒక్కగానొక్క కూతురు సంగీతను ఎంతో కష్టపడి పెంచి పెద్ద చేసింది. ఐదేళ్ల క్రితం సంగీత ప్రేమ వివాహం చేసుకుంటానని చెప్పగా.. తల్లి లక్ష్మి తనకున్న మూడెకరాల పది గుంటల భూమిలో రెండు ఎకరాలు అమ్మి పెళ్లి చేసింది. అల్లుడు వీరన్నకు కట్న కానుకలు ఇచ్చి, ఆడపడుచులకు 20 గుంటలు రాసిచ్చింది. మిగిలిన 30 గుంటల భూమిని మాత్రం తన అవసరాల కోసం ఉంచుకుంది.

అయితే, కూతురు సంగీత, అల్లుడు వీరన్న ఆ 30 గుంటల భూమిని కూడా తమ పేరు మీద రాయాలని లక్ష్మిని వేధించడం మొదలుపెట్టారు. పలుమార్లు ఈ విషయంపై గొడవపడ్డారు. చివరికి, లక్ష్మి తాను బ్రతికి ఉన్నంతకాలం భూమి ఇచ్చేది లేదని తన తర్వాత వారికే చెందుతుందని తేల్చి చెప్పింది. దీంతో కక్ష పెంచుకున్న కూతురు, అల్లుడు అత్యంత దారుణానికి ఒడిగట్టారు. సెప్టెంబర్ 9వ తేదీ రాత్రి నిద్రలో ఉన్న లక్ష్మి ముఖంపై దిండు అదిమి ఊపిరాడకుండా చేసి చంపేశారు. ఉదయం లక్ష్మిని కూలీ పనికి పిలవడానికి వచ్చిన చుట్టుపక్కల మహిళలు ఆమె మెడపై గాయాలు చూసి అనుమానించి పోలీసులకు సమాచారం అందించారు. కేసు నమోదు చేసుకున్న పోలీసులు నిందితులను అదుపులోకి తీసుకున్నారు. ఘటన స్థానికంగా కలకలం రేపింది. ఆస్తి కోసం కన్న తల్లిని కూతురు చంపటంపై స్థానికులు నిర్ఘాంతపోయారు. ఇంతకన్నా ఘోరం ఉంటుందా అని మండిపడుతున్నారు. లక్ష్మిని చంపిన కూతురు, అల్లుడిని కఠినగా శిక్షించాలని డిమాండ్ చేస్తున్నారు.