వర్షాకాలంలో ఎక్కువగా జుట్టు ఊడుతోందా,,,, ఏం చేయాలో తెలుసా

వర్షాకాలం వచ్చిందంటే ఎన్నో సమస్యలు. ముఖ్యంగా సీజనల్ వ్యాధులు ఎక్కువగా వచ్చేవి ఈ రోజుల్లోనే. సాధారణ జలుబు, దగ్గుతో మొదలై తీవ్ర జ్వరం వరకూ వెళ్లిపోతుంది. అయితే..కేవలం ఈ వ్యాధులే కాదు. మరి కొన్ని ఇబ్బందులు కూడా తలెత్తుతాయి. ఇప్పటికే జుట్టు రాలే సమస్యను ఎదుర్కొంటున్న వారికి..వర్షాకాలం మరిన్ని చిక్కులు తెచ్చి పెడుతుంది. విపరీతమైన ఎండల నుంచి కాస్తంత రిలీఫ్ వచ్చిందనుకునే లోపే ఇలా కొత్త సమస్యలు వస్తాయి. విపరీతంగా ఉక్కపోత, తరచూ జుట్టు తడవడం, వాతావరణంలో మార్పులు లాంటి కారణాల వల్ల జుట్టు రాలిపోతూ ఉంటుంది. వీటితో పాటు వర్షాకాలంలో జుట్టు రాలడానికి అసలు కారణాలేంటి. ఏం చేస్తే హెయిర్ ఫాల్ తగ్గుతుంది. ఈ వివరాలు తెలుసుకుందాం.

వర్షాకాలంలోనే ఎందుకు

వర్షాకాలంలో హెయిర్ ఫాల్ ఎక్కువ అవడానికి ప్రధాన కారణం..హ్యుమిడిటీ. అంటే..ఉక్కపోత. వాతావరణంలో తేమ ఎక్కువవుతుంది. ఆ సమయంలో ఉక్కపోస్తుంది. ఈ తేమను వెంట్రుకలు ఎక్కువగా గ్రహిస్తాయి. ఫలితంగా ఎప్పుడూ కాస్త జిడ్డుగా కనిపిస్తాయి. ఈ తేమ కారణంగా ఓ రకమైన వాసన కూడా వస్తాయి. ఇలా తేమ పెరిగే కొద్ది ఫాలికల్స్ చాలా వదులుగా మారిపోతాయి. ఫలితంగా చాలా సులువుగా జుట్టు రాలిపోతూ ఉంటుంది.

ఇదే ఎక్కువ మొత్తంలో జుట్టు రాలడానికి కారణమవుతుంది. ఇక దీంతో పాటు మరో కారణం ఏంటంటే..చెమట పట్టడం. ఇందాక చెప్పుకున్నట్టుగా వర్షాకాలంలో ఉక్కపోత ఎక్కువవుతుంది. ఆ సమయంలో వెంట్రుకల్లో తేమ పెరుగుతుంది. ఇదే డాండ్రఫ్ సహా ఫంగస్ కి దారి తీస్తుంది. ఫలితంగా చాలా త్వరగా వెంట్రులు రాలిపోతాయి. పైగా కురుల కుదుళ్లు కూడా వదులుగా మారిపోతాయి. తరచూ దురద వస్తుంది.

మరి కొన్ని కారణాలు

తరచూ వర్షపు నీటిలో తడవడం వల్ల కూడా జుట్టు రాలిపోయే అవకాశం ఉంటుంది. వర్షపు నీటిలో అసిడిక్ గుణాలు ఎక్కువగా ఉంటాయి. ఈ నీరు జుట్టుపై పడడం వల్ల అందులో ఉండే నేచురల్ ఆయిల్స్ తగ్గిపోతాయి. ఫలితంగా కొన్నిసార్లు వెంట్రుకలు పొడిగా మారిపోతాయి. ఎప్పుడైతే నేచురల్ ఆయిల్స్ తగ్గిపోతాయో అప్పటి నుంచి హెయిర్ ఫాల్ మొదలవుతుంది. వెంట్రుకలు చిట్లిపోవడం కూడా ఎక్కువగా వర్షాకాలంలోనే చూస్తారు. ఇక దీంతో పాటు మరో ముఖ్యమైన కారణం..సరైన విధంగా హెయిర్ కేర్ తీసుకోకపోవడం. అంటే..వర్షాకాలంలో జుట్టు తరచూ తడుస్తూ ఉంటుంది. సరిగ్గా తుడుచుకోకపోయినా, ఎలాంటి కేర్ తీసుకోకపోయినా జుట్టు రాలిపోతుంది. కెమికల్స్ తో కూడిన ప్రొడక్ట్స్ వాడడం, తలస్నానం చేయకపోవడం లాంటి అలవాట్లతోనూ జుట్టు రాలే సమస్య ఎక్కువవుతుంది

ఏం చేస్తే బెటర్

వర్షాకాలంలో ఇలా జుట్టు రాలుతోంది సరే. మరి ఏం చేస్తే మంచిది. జుట్టు రాలకుండా ఉండాలంటే ఎలాంటి జాగ్రత్తలు తీసుకోవాలో తెలుసుకుందాం. ముందుగా చేయాల్సిన పని ఏంటంటే ఎప్పటికప్పుడు జుట్టు తుడుచుకోవాలి. ఎప్పుడు వెంట్రుకలు శుభ్రంగా, పొడిగా ఉండేలా చూసుకోవాలి. డెర్మటాలజీ ఎక్స్ పర్ట్స్ మాటల్లో చెప్పాలంటే..స్కాల్ప్ ని క్లీన్ గా ఉంచుకుంటేనే హెయిర్ లాస్ అనేది తగ్గుతుంది. సాధారణంగా వెంట్రులకు తడిచినప్పుడు అవి మరింత జిడ్డుగా మారతాయి. అలాంటప్పుడు కాస్త సాఫ్ట్ గా ఉండే షాంపూతో తలస్నానం చేయాల్సి ఉంటుంది. సాఫ్ట్ షాంపూ..సల్ఫేట్ తక్కువగా ఉండే షాంపూ అని అర్థం. దీని వల్ల వెంట్రుకలు కావాల్సిన తేమను అందిస్తూనే జుట్టు రాలకుండా ఉంచుతుంది. వర్షంలో తడిసినా, తలస్నానం చేసినా పూర్తిగా వెంట్రుకలు ఆరే విధంగా చూసుకోవాలి. తడిగా ఉంటే వెంట్రుకలు త్వరగా చిట్లిపోయే అవకాశం ఉంటుంది.

కండీషనర్ వాడండి

వర్షాకాలంలో హెయిర్ ఫాల్ అవ్వకూడదు అంటే..కండీషనర్ తప్పనిసరిగా వాడాలి. దీని వల్ల హ్యుమిడిటీ తగ్గుతుంది. షాంపూతో తలస్నానం చేసిన తరవాత ప్రతిసారీ కండీషనర్ వాడాలి. ఫలితంగా జుట్టు రాలిపోయే సమస్య తగ్గడంతో పాటు కురులు మృదువుగా మారతాయి. వెంట్రుకల చివర్లపైనే ఎక్కువగా ఫోకస్ చేయాలి. లేదంటే చాలా త్వరగా అవి చిట్లిపోతాయి. కండీషనర్ అప్లై చేయడం వల్ల స్కాల్ప్ పై జిడ్డుదనం తగ్గిపోతుంది. ఇక తప్పకుండా పాటించాల్సిన మరో జాగ్రత్త ఏంటంటే..వీలైనంత వరకూ వర్షంలో జుట్టు తడవకుండా కవర్ చేసుకోవాలి. లేదంటే వర్షపు నీటి వల్ల జుట్టు చాలా త్వరగా కలుషితమవుతుంది. ఒకవేళ తడిస్తే మాత్రం వెంటనే వెంట్రుకలు పొడిగా మార్చుకోవాలి. బయటకు వెళ్లినప్పుడు తల కవర్ అయ్యే విధంగా ఓ చిన్న గొడుగు వెంట తీసుకెళ్లాలి. లేదా ప్లాస్టిక్ కవర్ తో అయినా కప్పుకోవాలి.

మరి కొన్ని జాగ్రత్తలు

జుట్టు తడిగా ఉన్నప్పుడు వీలైనంత వరకూ వదులుగా ఉండే హెయిర్ స్టైల్స్ నే ఎంచుకోవాలి. మరీ గట్టిగా దగ్గరగా అని ముడి వేయడం వల్ల స్కాల్ప్ పై ప్రెజర్ పడుతుంది. ఫలితంగా చాలా త్వరగా జుట్టు రాలిపోయే ముప్పు ఉంటుుంది. ఇక మరో ముఖ్యమైన విషయం ఏంటంటే..మరీ ఎక్కువగా హీట్ స్టైలింట్ టూల్స్ వాడకూడదు. అంటే..జుట్టు ఆరబెట్టడానికి హీటర్స్ మరీ ఎక్కువగా వినియోగించకూడదు. ఈ స్టైలింగ్ ప్రొడక్ట్స్ ని వాడడం వల్ల వెంట్రుకలు బలహీనంగా మారిపోతాయి. వర్షాకాలంలో ఈ సమస్య ఎక్కువవుతుంది.