కాంగ్రెస్ నేత ఉదిత్ రాజ్ వ్యాఖ్యలపై స్పందించిన బీజేపీ

కాంగ్రెస్ పార్టీ సీనియర్ నేత ఉదిత్ రాజ్ చేసిన వ్యాఖ్యలు రాజకీయంగా పెద్ద దుమారాన్ని రేపాయి. పొరుగు దేశాలైన నేపాల్, శ్రీలంక, బంగ్లాదేశ్‌లలో నెలకొన్న రాజకీయ అస్థిరతను ప్రస్తావిస్తూ ఆయన భారత్‌లోని పరిస్థితులతో పోల్చడంపై భారతీయ జనతా పార్టీ (బీజేపీ) తీవ్రంగా స్పందించింది. ఉదిత్ రాజ్ వ్యాఖ్యలు ప్రమాదకరంగా, దేశ వ్యతిరేకంగా ఉన్నాయని, దేశంలో అశాంతిని రెచ్చగొట్టేలా ఉన్నాయని మండిపడింది.పొరుగు దేశాల్లో ప్రజలు ప్రభుత్వాలను కూల్చివేస్తున్న తీరుపై చర్చ జరుగుతోందని ఉదిత్ రాజ్ సోషల్ మీడియా ప్లాట్‌ఫామ్ ఎక్స్‌‌లో ఒక పోస్ట్ పెట్టారు. "నేపాల్, శ్రీలంక, బంగ్లాదేశ్‌లలో ప్రజలు అధికారాన్ని ఎలా కూల్చివేశారో చర్చిస్తున్నారు. అలాంటిది భారత్‌లో జరగదా? అని కొందరు అడుగుతున్నారు. నిజానికి, ఇక్కడి పరిస్థితులు కూడా అవే, కొన్ని సందర్భాల్లో ఇంకా దారుణంగా ఉన్నాయి. కానీ మన రాజ్యాంగం, ప్రజాస్వామ్య మూలాలు మనల్ని అలా చేయకుండా ఆపుతున్నాయి. ఆ మూలాలను నాటింది కాంగ్రెస్ పార్టీనే" అని ఆయన పేర్కొన్నారు. అనంతరం ఏఎన్ఐ వార్తా సంస్థతో మాట్లాడుతూ "బీజేపీ రాజ్యాంగాన్ని మార్చాలనుకుంది, కానీ రాజ్యాంగ సంస్థలు బలంగా ఉండటంతో వారి ప్రయత్నాలు ఫలించలేదు. లేకపోతే, ఇక్కడ కూడా నేపాల్ లాంటి పరిస్థితి వచ్చేది" అని అన్నారు.ఉదిత్ రాజ్ వ్యాఖ్యలపై బీజేపీ అధికార ప్రతినిధి సీఆర్ కేశవన్ తీవ్రంగా స్పందించారు. "కాంగ్రెస్ సీనియర్ నేత చేసిన ఈ ప్రమాదకర వ్యాఖ్యలు బాహాటంగా దేశ వ్యతిరేకమైనవి, ఉద్దేశపూర్వకంగా అశాంతిని రెచ్చగొట్టేవి. డాక్టర్ బాబాసాహెబ్ అంబేద్కర్ రాజ్యాంగానికి కాంగ్రెస్ పార్టీ ఎప్పుడూ అతిపెద్ద ముప్పు. 1975లో రాజ్యాంగాన్ని హత్య చేసి, ప్రజాస్వామ్యాన్ని ఖూనీ చేసింది ఆ పార్టీయే. ఈ వ్యాఖ్యల్లో కూడా అదే ఎమర్జెన్సీ మనస్తత్వం కనిపిస్తోంది" అని ఆయన విమర్శించారు.