కేరళలో 'వర్చువల్ అరెస్ట్' పేరుతో భారీ సైబర్ మోసం

టెక్నాలజీ పెరిగే కొద్దీ సైబర్ నేరగాళ్లు కొత్త పద్ధతుల్లో మోసాలకు పాల్పడుతున్నారు. తాజాగా కేరళలో 'వర్చువల్ అరెస్ట్' పేరుతో జరిగిన ఓ భారీ మోసం వెలుగులోకి వచ్చింది. పోలీసులమని నమ్మించిన సైబర్ కేటుగాళ్లు, ఓ 79 ఏళ్ల వృద్ధుడి నుంచి ఏకంగా రూ. 3.72 కోట్లు కాజేశారు. కొల్లాం జిల్లాలో జరిగిన ఈ ఘటన సంచలనం సృష్టిస్తోంది.బాధితుడి ఫిర్యాదు మేరకు కేసు నమోదు చేసుకున్న కొల్లాం సిటీ సైబర్ పోలీసులు శనివారం ఈ వివరాలను వెల్లడించారు. వారి కథనం ప్రకారం, పడనాయర్‌కులంగరకు చెందిన బాధితుడికి జులై 7న వాట్సాప్‌లో ఓ కాల్ వచ్చింది. తనను బీఎస్ఎన్ఎల్ అధికారిగా పరిచయం చేసుకున్న వ్యక్తి, బాధితుడి మొబైల్ నంబర్‌ను అక్రమ కార్యకలాపాలకు వాడుతున్నారని, దీనిపై ముంబై సైబర్ పోలీసులు విచారణ జరుపుతున్నారని చెప్పాడు.ఆ తర్వాత, పోలీస్ యూనిఫాంలో ఉన్న మరో వ్యక్తి వాట్సాప్ వీడియో కాల్ చేసి, తాను ముంబై సైబర్ పోలీస్ అధికారినని పరిచయం చేసుకున్నాడు. బాధితుడి ఆధార్ వివరాలు ఉపయోగించి ఓ బ్యాంకు ఖాతా తెరిచారని, దాని ద్వారా నేరాలకు పాల్పడుతున్నారని నమ్మబలికాడు. బాధితుడిని పూర్తిగా నమ్మించడం కోసం నకిలీ అరెస్ట్ వారెంట్ కూడా చూపించి, 'వర్చువల్ అరెస్ట్'లో ఉన్నట్టు ప్రకటించాడు.అంతటితో ఆగకుండా వీడియో కాల్ ద్వారానే ఓ నకిలీ వర్చువల్ కోర్టు విచారణను కూడా నడిపించారు. విచారణలో బాధితుడికి బెయిల్ మంజూరు చేస్తున్నామని, అయితే దర్యాప్తు అధికారి నిరంతర నిఘాలో ఉండాలనే షరతు విధించారు. ఇందుకోసం వాట్సాప్ కాల్‌ను ఎప్పుడూ యాక్టివ్‌గా ఉంచాలని సూచించారు. తాము చెప్పినట్టు వినకపోతే బ్యాంకు ఖాతాలను స్తంభింపజేస్తామని, ఆస్తులను జప్తు చేస్తామని తీవ్రంగా బెదిరించారు.ఈ కేసు నుంచి బయటపడాలంటే బ్యాంకు ఖాతాలను వెరిఫై చేయాలని, అందుకోసం తాము చెప్పిన ఖాతాలకు డబ్బు బదిలీ చేయాలని సూచించారు. వారి మాటలు నమ్మిన బాధితుడు, జులై 23 నుంచి ఆగస్టు 29 మధ్య తన, తన భార్య ఖాతాల నుంచి 17 లావాదేవీల్లో మొత్తం రూ. 3.72 కోట్లను బదిలీ చేశాడు. డబ్బు తిరిగి రాకపోవడంతో తాను మోసపోయానని గ్రహించి పోలీసులను ఆశ్రయించాడు.ఈ ఘటనపై భారతీయ న్యాయ సంహిత, ఇన్ఫర్మేషన్ టెక్నాలజీ చట్టంలోని పలు సెక్షన్ల కింద కేసు నమోదు చేసినట్టు పోలీసులు తెలిపారు. నిందితులు డబ్బు బదిలీ చేయించుకున్న బ్యాంకు ఖాతాలను గుర్తించామని, వాటిని స్తంభింపజేసేందుకు ప్రయత్నిస్తున్నామని వారు వివరించారు.