నీ దేశానికి వెళ్లిపో.. బ్రిటన్‌లో సిక్కు యువతిపై ఇద్దరు అత్యాచారం

గత కొంతకాలంగా విదేశాల్లో భారతీయులపై దాడులు పెరిగిపోతుండటం తీవ్ర వివాదాస్పదంగా మారుతోంది. అమెరికా, కెనడా, ఆస్ట్రేలియా, యూకే లాంటి దేశాల్లో పలువురు భారతీయ పురుషులు, మహిళలపై దాడులు, అత్యాచారాలు జరగడం సంచలనం రేపుతున్నాయి. వరుసగా ఇలాంటి ఘటనలు చోటు చేసుకుంటుండటంతో.. ఆయా దేశాల్లో నివసిస్తున్న భారతీయ పౌరులు తీవ్ర ఆందోళనకు గురవుతున్నారు. ఈ నేపథ్యంలోనే తాజాగా యూకేలో భారత యువతికి చేదు అనుభవం ఎదురైంది. పార్కులో ఉన్న సిక్కు యువతిపై స్థానిక యువకులు ఇద్దరు.. జాత్యహంకార వ్యాఖ్యలకు దిగారు. ఆ తర్వాత ఆమెను బలవంతంగా అత్యాచారం చేసి.. బెదిరింపులకు పాల్పడి అక్కడి నుంచి పరారయ్యారు. బాధితురాలు పోలీసులకు ఫిర్యాదు చేయడంతో ఈ దారుణం వెలుగులోకి వచ్చింది.

బ్రిటన్‌లో 20 ఏళ్ల ఒక సిక్కు యువతిపై.. ఆ దేశానికి చెందిన ఇద్దరు యువకులు అత్యాచారానికి పాల్పడటం తీవ్ర చర్చనీయాంసంగా మారింది. మొదట యువతిపై జాత్యహంకార వ్యాఖ్యలు చేసిన ఇద్దరు నిందితులు.. ఆమె బ్రిటన్‌కు చెందిన యువతి కాదని.. తిరిగి స్వదేశానికి వెళ్లిపోవాలని బెదిరించారు. ఆపై ఆమెపై అత్యాచారానికి ఒడిగట్టారు. మంగళవారం ఉదయం 8.30 గంటలకు.. యూకేలోని వెస్ట్ మిడ్‌ల్యాండ్స్‌ ఓల్డ్‌బరీ ప్రాంతంలోని టేమ్ రోడ్ వద్ద ఉన్న ఒక పార్కులో ఈ దారుణమైన సంఘటన చోటు చేసుకుంది. 20 ఏళ్ల సిక్కు యువతిని అడ్డుకున్న ఇద్దరు తెల్లజాతీయులు.. ఆమెపై జాత్యహంకార వ్యాఖ్యలు చేశారు. ఆ సిక్కు యువతి.. బ్రిటన్‌కు చెందిన యువతి కాదని.. ఆమె దేశానికి తిరిగి వెళ్లిపోవాలని వారు బెదిరింపులకు పాల్పడ్డారు. అంతేకాకుండా ఆ యువతిపై ఇద్దరూ అత్యాచారం చేశారు.

అత్యాచారం నుంచి తేరుకున్న బాధిత సిక్కు యవతి.. వెస్ట్ మిడ్‌ల్యాండ్స్‌ పోలీసులకు ఫిర్యాదు చేసింది. ఆ యువతి ఫిర్యాదుతో స్పందించిన పోలీసులు.. దీన్ని జాత్యహంకార దాడిగా, ద్వేషపూరిత నేరంగా పరిగణిస్తున్నామని వెల్లడించారు. ఇద్దరు అనుమానితుల కోసం గాలింపు చేపట్టినట్లు వివరించారు. ఆ ఇద్దరు నిందితులకు సంబంధించిన సమాచారాన్ని.. సీసీటీవీ ఫుటేజ్‌, డ్యాష్‌క్యామ్‌ ఫుటేజ్‌, మొబైల్‌ ఫుటేజ్‌ వంటి ఆధారాలను అందించి.. తమకు సహకరించాలని స్థానికులకు పోలీసులు విజ్ఞప్తి చేశారు.

ఈ ఘటనపై.. బ్రిటన్‌లోని సిక్కు ప్రజలు తీవ్ర ఆగ్రహం వ్యక్తం చేస్తున్నారు. ఇటీవల యూకేలో ఇలాంటి జాత్యహంకార ఘటనలు పెరగడంపై వారు తీవ్ర ఆందోళన వ్యక్తం చేశారు. ఈ నేపథ్యంలోనే అధికార లేబర్ పార్టీకి చెందిన ఎంపీ ప్రీత్ కౌర్ గిల్.. ఈ అత్యాచార దాడిని తీవ్రంగా ఖండించారు. ఇది ఒక తీవ్రమైన హింస, జాత్యహంకార చర్య అని ఆమె అభివర్ణించారు. బాధిత యువతి యూకేకు చెందిన మహిళ అని.. బ్రిటన్‌ లేదా ఓల్డ్‌బరీలో ఎక్కడా జాత్యహంకారం, స్త్రీ ద్వేషానికి చోటు లేదని ప్రీతి కౌర్ గిల్ ఎక్స్‌లో ఒక పోస్ట్ పెట్టారు. సిక్కు సమాజానికి న్యాయం జరిగేలా.. దేశంలో వారి భద్రతను పెంచేలా పోలీసులతో కలిసి పనిచేస్తానని ఆమె పేర్కొన్నారు.