ఉద్యోగులకు జీతాలు కూడా ఇవ్వలేని పరిస్థితిలో స్పైస్‌జెట్

భారతీయ తక్కువ ధరల విమానయాన సంస్థ స్పైస్‌జెట్ మరోసారి వార్తల్లోకి వచ్చింది. ఆర్థిక సమస్యలతో సతమతం అవుతున్న ఈ సంస్థ తన సీనియర్ ఉద్యోగుల జీతాల చెల్లింపుల్లో జాప్యం చేసింది. ఇప్పటికే ఇందుకు సంబంధించి అనేక వార్తలు రాగా.. ఈ విషయంపై స్పందించిన సంస్థ ఇది దశలవారీ చెల్లింపుల షెడ్యూల్‌లో భాగమని, ఆర్థిక ఇబ్బందులు ఉన్న సమయంలో ఈ విధానాన్ని అనుసరిస్తున్నామని వివరణ ఇచ్చింది. అయితే సంస్థ ఛైర్మన్‌కు భారీ మొత్తంలో వడ్డీ లేని అడ్వాన్స్‌లు మంజూరు చేసిన సమయంలో ఉద్యోగుల జీతాలు ఆలస్యం కావడం అనేక ప్రశ్నలకు దారితీసింది.

ఈ నెలలో నెలకు రూ.55,000 లోపు జీతం పొందే జూనియర్ ఉద్యోగులకు ఆగస్టు నెల జీతాలు సకాలంలో అందాయి. కానీ అసిస్టెంట్ మేనేజర్ స్థాయి, అంతకంటే ఉన్నత పదవుల్లో ఉన్న సీనియర్ ఉద్యోగులకు మాత్రం 10 నుంచి 15 రోజుల పాటు వేతనాల చెల్లింపుల్లో ఆలస్యం జరిగింది. ఇది తాత్కాలికమేనని, సాధారణ ఆర్థిక సంక్షోభ సమయాల్లో ఇలాంటి నిర్ణయాలు తీసుకుంటామని స్పైస్‌జెట్ ప్రతినిధి తెలిపారు. సంస్థలో మొత్తం 6,484 మంది ఉద్యోగులు ఉండగా.. వారిలో 4,894 మంది శాశ్వత ఉద్యోగులు ఉన్నారు.

స్పైస్‌జెట్ ప్రస్తుతం తీవ్ర ఆర్థిక ఇబ్బందులను ఎదుర్కొంటోందని నివేదికలు చెబుతున్నాయి. జూన్‌ త్రైమాసికంలో సంస్థ రూ.238 కోట్ల నికర నష్టాన్ని చవిచూసింది. అంతేకాకుండా సంస్థకు చెందిన అనేక విమానాలు గ్రౌండ్‌లో నిలిచిపోయాయి. సెప్టెంబర్ 13 నాటికి మొత్తం 53 విమానాలలో కేవలం 18 మాత్రమే నడుస్తున్నాయని గణాంకాలు వెల్లడించాయి. గ్రౌండ్‌లో ఉన్న విమానాలను తిరిగి నడిపించడానికి.. అలాగే విమానాల సంఖ్యను పెంచుకోవడానికి సంస్థ రూ.3,000 కోట్లను సమీకరించింది. కానీ ఈ ప్రక్రియలో పురోగతి చాలా నెమ్మదిగా ఉందని నివేదికలు సూచిస్తున్నాయి.

నిధులు ఉన్నా జీతాలు ఆలస్యం..

ఆర్థిక ఇబ్బందుల్లో ఉన్నప్పటికీ.. స్పైస్‌జెట్ తన ఛైర్మన్, మేనేజింగ్ డైరెక్టర్ అజయ్ సింగ్‌కు 2024-25లో రూ.32 కోట్ల వడ్డీ లేని అడ్వాన్స్‌ను అందించడం నిపుణులను ఆశ్చర్యపరిచింది. సంస్థ అంతర్గత ఆర్థిక నివేదికల ప్రకారం.. ఈ అడ్వాన్స్‌లు జీతాల చెల్లింపుల్లో ఆలస్యం జరుగుతున్న సమయంలో మంజూరు చేశారు. ఇది సంస్థ ప్రాధాన్యతలపై అనేక ప్రశ్నలను లేవనెత్తింది. ఒకవైపు ఉద్యోగుల జీతాలు సకాలంలో చెల్లించలేని స్థితిలో ఉన్న సంస్థ.. మరోవైపు తమ ఉన్నతాధికారులకు భారీ మొత్తాలను అడ్వాన్స్‌లుగా ఇవ్వడంపై ఉద్యోగులు, మార్కెట్ నిపుణులు ఆందోళన వ్యక్తం చేస్తున్నారు. సంస్థ చేస్తున్న ఈ చర్యలు.. దాని భవిష్యత్తుపై తీవ్ర అనిశ్చితిని సృష్టిస్తున్నాయని విశ్లేషకులు చెబుతున్నారు. ఈ పరిణామాలు విమానయాన రంగంలో స్పైస్‌జెట్‌కు ఉన్న విశ్వసనీయతను దెబ్బతీసే అవకాశం ఉంది.