ఈ ఒక్క ట్రిక్ తో,,, ఆ లాభాలపై పైసా పన్ను కట్టక్కర్లేదు

మీరు మ్యూచువల్ ఫండ్స్, షేర్లు లేదా ల్యాండ్ విక్రయించి.. భారీగా లాభాలు సంపాదించారా..? అయితే ఇక్కడ లాంగ్ టర్మ్, షార్ట్ టర్మ్ క్యాపిటల్ గెయిన్స్ టాక్స్ ఉంటుందని చెప్పొచ్చు. అయితే ఇక్కడ మీరు టాక్స్ భారీగా ఆదా చేసుకోవచ్చని తెలుసా. ఇక్కడ ఆదాయపు పన్ను చట్టంలోని ఒక సెక్షన్.. పన్ను మినహాయింపు ప్రయోజనం కల్పిస్తోంది. అదే సెక్షన్ 54F . దీని గురించి చాలా మందికి సరైన అవగాహన లేకపోవడంతో.. లక్షల్లో ప్రభుత్వానికి పన్ను చెల్లిస్తున్నారు. సరిగ్గా ఉపయోగిస్తే.. అదే మొత్తాన్ని ఆదా చేసుకోవచ్చు. ఇతర పెట్టుబడికి ఉపయోగించవచ్చు. అదేంటో ఇప్పుడు వివరంగా చూద్దాం.

>> ఇన్‌కంటాక్స్ డిపార్ట్‌మెంట్ గణాంకాల ప్రకారం.. ప్రతి ఏటా అర్హత ఉన్నప్పటికీ.. దీని గురించి తెలియక వారిలో దాదాపు 50 శాతం మందికిపైగా ఈ పన్ను మినహాయింపు ప్రయోజనాన్ని ఉపయోగించుకోవడం లేదు.

సెక్షన్ 54F అంటే ఏంటి?

సెక్షన్ 54F అంటే.. మీరు బంగారం, మ్యూచువల్ ఫండ్లు, షేర్లు లేదా ప్లాట్లు ఇలా ఏవైనా దీర్ఘకాలిక మూలధన ఆస్తుల్ని (లాంగ్ టర్మ్ క్యాపిటల్ అసెట్స్) అమ్మితే వచ్చిన లాభాల్ని.. ఏదైనా కొత్త నివాస గృహంలో పెట్టుబడి పెడితే.. ఆ లాభాలపై పన్ను కట్టాల్సిన అవసరం ఉండదు. అంటే ఇక్కడ ఆ లాభాల్ని.. కొత్త ఇంటి కొనుగోలు లేదా నిర్మాణం కోసం ఉపయోగించాలి.

ఇక్కడ కొన్ని షరతులు ఉంటాయని గుర్తుంచుకోవాలి. మీ పేరు మీద ఒకే ఒక ఇల్లు కలిగి ఉండాలి. షేర్లు లేదా మ్యూచువల్ ఫండ్ యూనిట్స్ అమ్మే సమయానికి మీ పేరిట ఒకటి కంటే ఎక్కువ ఇళ్లు ఉంటే.. ఈ మినహాయింపు వర్తించదు. కొత్తగా కొనుగోలు చేసే ఇల్లు కూడా ఇండియాలోనే ఉండాలి.

మీరు ఏదైనా ఆస్తిని (షేర్లు, బంగారం, మ్యూచువల్ ఫండ్స్, ల్యాండ్) 3 సంవత్సరాల కాలం కంటే ఎక్కువ సమయం హోల్డ్ చేసి అమ్మితే ఇక్కడ వచ్చే లాభాల్ని దీర్ఘకాలిక మూలధన లాభం అంటారు. ఉదాహరణ చూస్తే.. మీరు ఒక రూ. 10 లక్షలకు కొన్న షేర్లను ఐదేళ్ల తర్వాత అమ్మినప్పుడు రూ. 20 లక్షలు వస్తే.. ఇక్కడ మీకు రూ. 10 లక్షలు లాభం వచ్చినట్లు. ఇక్కడ మీ మొత్తం లాభం రూ. 10 లక్షల్ని పన్ను నుంచి పూర్తి మినహాయింపు పొందొచ్చు. అదే.. మీరు అమ్మితే వచ్చిన డబ్బులో కొంత భాగం మాత్రమే ఇల్లు కొనేందుకు ఉపయోగిస్తే .. పన్ను మినహాయింపు కూడా అదే రేషియోలో వర్తిస్తుంది.

ఇక్కడ మీకు కొత్త ఇల్లు కొనేందుకు 2 సంవత్సరాల వరకు సమయం ఉంటుంది. అదే కొత్త ఇంటిని నిర్మించుకునేందుకు మూడేళ్ల వ్యవధి ఉంటుంది. అమ్మే సంవత్సరం ముందు ఇల్లు కొన్నా ఈ బెనిఫిట్ పొందొచ్చు. ఇదే సమయంలో మీకు షేర్లు లేదా ఇతర ఆస్తిని అమ్మిన వెంటనే.. కొత్త ఇల్లు కొనే ఉద్దేశం లేనప్పుడు.. ఈ లాభాల్ని మీరు క్యాపిటల్ గెయిన్స్ అకౌంట్ స్కీం అనే ప్రత్యేక ఖాతాలో జమ చేసుకోవచ్చు. బ్యాంకుల్లో ఈ అకౌంట్ అందుబాటులో ఉంటుంది. అప్పుడు ఆ డబ్బు సురక్షితంగా ఉంటుంది ఇంకా పన్ను మినహాయింపును కూడా పొందే అవకాశం ఉంటుంది. ఇక సమయం ఉన్నప్పుడు.. ఆ అకౌంట్ నుంచి డబ్బు తీసుకొని ఇల్లు కొనొచ్చు.

గుర్తుంచుకోవాల్సినవి..

ఈ మినహాయింపునకు అర్హత కోసం మీకు ఒకే ఇల్లు ఉండాలి. కొత్త ఇల్లు కొన్న తర్వాత.. మరో ఇల్లు కొనుగోలు చేయొద్దు.

కొత్తగా కొన్న ఇంటిని మూడేళ్లలో లోపు విక్రయించొద్దు. ఒకవేళ అమ్మినట్లయితే.. అప్పుడు మీరు దానికి ముందు పొందిన పన్ను మినహాయింపు రద్దవుతుంది.

సెక్షన్ 54F కింద గరిష్టంగా రూ. 10 కోట్ల నికర అమ్మకపు విలువకు మాత్రమే టాక్స్ బెనిఫిట్ ఉంటుంది.

ఈ బెనిఫిట్ కింద మినహాయింపు కోసం ఫైలింగ్ చేసే సమయంలో.. ఆస్తి అమ్మకపు పత్రాలు, కొనుగోలు డాక్యుమెంట్స్ సిద్ధంగా ఉంచుకోవాలి. ఏమైనా అనుమానాలు ఉంటే.. పన్ను నిపుణుల్ని సంప్రదించడం మంచిది. అప్పుడు పూర్తి వివరాలు తెలుసుకునేందుకు అవకాశం ఉంటుంది.