చార్లీ కిర్క్‌ను చంపింది నేనే.. నన్ను క్షమించు ప్రియా: నేరం అంగీకరించిన టైలర్ రాబిన్సన్

కన్సర్వేటివ్ యాక్టివిస్ట్ చార్లీ కిర్క్‌ను హత్య చేసినట్లు అనుమానిస్తున్న టైలర్ రాబిన్సన్.. తన నేరాన్ని అంగీకరించాడు. మఖ్యంగా కిర్క్‌ను చంపింది తానేనని తన ట్రాన్స్‌జెండర్ భాగస్వామి లాన్స్ ట్విగ్స్‌కు పంపిన మెసేజ్‌ల్లో ఒప్పుకున్నాడు. అయితే హత్య అనంతరమే ఈ మెసేజీలు పంపినట్లు పోలీసులు గుర్తించారు. ఇది మాత్రమే కాకుండా హత్య చేసిన విధానం, తనకు తుపాకీ ఎవరు ఇచ్చారు, ఆపై దాన్ని ఏం చేశాడనే విషయాలను కూడా ఆమెతో పంచుకున్నాడు. ఆ పూర్తి వివరాలు మీకోసం.

హత్య జరిగిన వెంటనేరాబిన్సన్ తన భాగస్వామికి మెసేజ్ చేశాడు. "నేను బాగానే ఉన్నాను మై లవ్, కానీ ఓ చోట ఇరుక్కుపోయాను. త్వరలోనే ఇంటికి రాగలను. కానీ నేను నా రైఫిల్‌ను తీసుకురావాలి. నిజం చెప్పాలంటే ఇది చనిపోయేదాకా రహస్యంగా ఉంచాలనుకున్నాను. నిన్ను ఇందులో ఇరికించినందుకు నన్ను క్షమించు" అని రాబిన్సన్ తెలిపాడు. దీనికి ప్రతిగా అతని భాగస్వామి "ఆ పని చేసింది నువ్వేనా?" అని ఆశ్చర్యంగా ప్రశ్నించగా.. "నేనే, నన్ను క్షమించు" అని రాబిన్సన్ బదులిచ్చాడు.

ఈ ఘటన తర్వాత పోలీసులు మరొకరిని అనుమానించి అదుపులోకి తీసుకున్నారని, దాంతో తాను అక్కడి నుంచి తప్పించుకోవడానికి అవకాశం దొరికిందని రాబిన్సన్ తెలిపాడు. అయితే పోలీసులు ఆ ప్రాంతాన్ని లాక్ చేయడంతో రైఫిల్ వదిలి పారిపోవాల్సి వచ్చిందని వాపోయాడు. "ఎందుకు ఇలా చేశావు?" అని అతని భాగస్వామి ప్రశ్నించగా.. రాబిన్సన్ "ఆయన ద్వేషం నాకు చాలు. కొన్ని ద్వేషాలు చర్చల ద్వారా పరిష్కరించబడవు" అని బదులిచ్చాడు. రాబిన్సన్ తన నేరానికి తానే ప్రణాళిక రచించినట్లు అంగీకరించాడు. అంతేకాకుండా తాను ఉపయోగించిన రైఫిల్ గురించి కూడా మెసేజీల్లో ప్రత్యేకంగా తెలిపాడు.

హత్యకోసం వాడింది తన తాతయ్య తుపాకీ అని.. దాన్ని కోల్పోతే తన తండ్రికి ఎలా సమాధానం చెప్పాలో అర్థం కావడం లేదని వాపోయాడు. అలాగే రైఫిల్‌పై వేలిముద్రలు ఉండవచ్చని.. అందుకే దాన్ని ఒక పొదలో వదిలి వెళ్లానని తెలిపాడు. అంతేకాకుండా ఈ సంభాషణ తర్వాత చేసిన మేసీజులు మొత్తన్ని డిలీట్ చేయమని, తన గురించి పోలీసులకు ఎలాంటి సమాచారం ఇవ్వొద్దని తన భాగస్వామిని కోరాడు.

కానీ లాన్స్ ట్విగ్స్.. తన ప్రియుడు టైలర్ రాబిన్సన్ చేసిన ఈ సందేశాలను ఫెడరల్ దర్యాప్తుదారులతో పంచుకున్నట్లు తెలుస్తోంది. అలాగే పోలీసులు రాబిన్సన్ నివాసంలో సోదాలు నిర్వహించి.. వదిలేసిన తుపాకీలో కనిపించిన ఎచింగ్‌లతో కూడిన షెల్ కేసింగ్‌ను కనుగొన్నారు. రాబిన్సన్‌కు సంబంధించి.. ఒక గేమింగ్ చాట్‌రూమ్‌తో సహా అతని ఆన్‌లైన్ కార్యకలాపాలను ఎఫ్‌బీఐ డైరెక్టర్ కష్ పటేల్ దర్యాప్తు చేస్తున్నారు. ఈ ఘటన రాజకీయ ప్రేరేపితమా లేదా వ్యక్తిగత వైరం వల్ల జరిగిందా అని అధికారులు పరిశీలిస్తున్నారు.