నూడుల్స్ అమ్ముతూ రోజుకు లక్ష సంపాదిస్తున్న పీహెచ్‌డీ గ్రాడ్యుయేట్

ఎంత పెద్ద చదువులు చదివినా, ఎంత తెలివి ఉన్నా.. ఆశించిన ఉద్యోగం రాక జీవితంలో స్థిరపడకపోతే.. దాన్ని వదులుకుని మరో మార్గాన్ని ఎంచుకోవాల్సిందే. సరిగ్గా అదే చేశాడు చైనాకు చెందిన ఒక పీహెచ్‌డీ గ్రాడ్యుయేట్. బెల్జియంలో స్థిరపడిన ఈ చైనా వ్యక్తి.. తన చదువుకు సంబంధం లేని వ్యాపారం మొదలుపెట్టి ఊహించని విజయం సాధించాడు. ముఖ్యంగా రోడ్డుమీదే ఓ చిన్న స్టాల్ పెట్టి.. స్పైసీ నూడుల్స్ అమ్మతూ రోజుకు 1200 డాలర్లు (భారత కరెన్సీ పరకారం రూ.1.05,388) కంటే ఎక్కువగా సంపాదిస్తున్నాడు. కేవలం నూడుల్స్ అమ్మతూ నెలకు రూ.30 లక్షలకు పైగా సంపాదిస్తున్న ఈ గ్రాడ్యుయేట్ స్టోరీ ప్రస్తుతం సోషల్ మీడియాలో తెగ వైరల్ అవుతోంది.

చైనాలోని జియాంగ్సు ప్రావిన్స్‌కు చెందిన డింగ్ అనే 37 ఏళ్ల వ్యక్తి.. చిన్నప్పటి నుంచి బాగా చదివేవాడు. మొదటి నుంచి అతడికి వ్యవసాయ రంగంలోపై ఆసక్తి ఉండగా.. అదే రంగంలో ఉన్నత విద్యను అభ్యసించాడు. చైనాలో పీహెచ్‌డీ పూర్తి చేసిన తర్వాత బెల్జియంలోని నేల నిర్వహణ, పంట ఉత్పత్తిపై పోస్ట్‌డాక్టోరల్ రీసెర్చ్ చేశారు. దాదాపు 30కి పైగా అకడమిక్ పేపర్లను కూడా ప్రచురించారు. ఇంతటి గొప్ప విద్యా నేపథ్యం ఉన్నప్పటికీ.. ఆయనకు పరిశోధన రంగంలో స్థిరమైన ఉద్యోగం లభించలేదు. దీంతో ఆర్థికంగా ఇబ్బందులు పడ్డారు. ఈ క్రమంలోనే డింగ్, ఆయన భార్య వాంగ్ తమ కుటుంబాన్ని పోషించుకునేందుకు ఒక కొత్త మార్గం గురించి ఆలోచించారు.

ముఖ్యంగా 2015లో బెల్జియంలో స్థిరపడిన ఈ దంపతులు.. స్థిరమైన ఉద్యోగం కోసం ఎదురు చూసి ఎదురు చూసి తీవ్రంగా విసిగిపోయిన తర్వాత ఒక నూడుల్స్ స్టాల్ పెట్టాలని నిర్ణయించుకున్నారు. ఈక్రమంలోనే వాంగ్ సొంత పట్టణం అయిన చోంగ్‌కింగ్‌లో ప్రసిద్ధి చెందిన “స్పైసీ పీ నూడుల్స్”ను మే నెలలో వీరు స్థానిక మార్కెట్లలో అమ్మడం మొదలు పెట్టారు. ఈ నూడుల్స్‌లో నమలడానికి వీలుగా ఉండే స్ట్రాండ్స్, బఠానీలు, పంది మాంసంతో చేసిన సాస్ ఉంటాయి. దీనికి కొంచెం ఉప్పు, కారం కలిపి తయారు చేస్తారు. అయితే స్థానికుల అభిరుచులకు తగ్గట్టుగా వాంగ్ కారాన్ని తగ్గించి వండడం మొదలు పెట్టారు. ఇదే వారికి భారీ సంఖ్యలో కస్టమర్లను తీసుకు వచ్చింది.

ఈ దంపతులు వారానికి రెండు సార్లు మాత్రమే తమ స్టాల్‌ను తెరుస్తారు. కానీ ఆ రెండు రోజుల్లోనే ఊహించని స్థాయిలో డబ్బులు సంపాదిస్తారు. ముఖ్యంగా ఒక బౌల్ నూడున్స్ ధర 7 నుంచి 9 యూరోలు (1 యూరోకు సుమారు రూ.104) ఉండగా.. ఒక్క రోజులోనే ఈ దంపతులు 1000 యూరోలకు పైగా సంపాదిస్తారు. ప్రస్తుతం వీరి విజయగాథ చైనా సోషల్ మీడియాలో పెద్ద ఎత్తున వైరల్ అవుతుండగా.. వారి ఫోలవర్ల సంఖ్య పెరుగుతో వస్తోంది. మొదట్లో చాలా తక్కువగా ఉండే ఫాలోవర్ల సంఖ్య.. 78,000 వేలకు చేరుకుంది.