17 మెడికల్ కాలేజీలంటూ జగన్ డ్రామా ఆడుతున్నారన్న టీడీపీ ఎమ్మెల్సీ భూమిరెడ్డి

రాష్ట్రంలోని ప్రభుత్వ వైద్య కళాశాలలను పబ్లిక్-ప్రైవేట్ పార్ట్‌నర్‌షిప్  విధానంలో నిర్వహించాలని కూటమి ప్రభుత్వం తీసుకున్న నిర్ణయంపై వైఎస్సార్ కాంగ్రెస్ పార్టీ చేస్తున్న ఆరోపణలను తెలుగుదేశం పార్టీ ఎమ్మెల్సీ భూమిరెడ్డి రాంగోపాల్ రెడ్డి తీవ్రంగా ఖండించారు. ఐదేళ్ల పాలనలో 17 మెడికల్ కాలేజీలు కట్టేశానంటూ మాజీ ముఖ్యమంత్రి జగన్ రెడ్డి చేస్తున్న ప్రచారం పూర్తిగా అవాస్తవమని, ఆయన చెబుతున్న ఆ కళాశాలలు ఎక్కడున్నాయో చూపించాలని సవాల్ విసిరారు. బుధవారం మంగళగిరిలోని టీడీపీ కేంద్ర కార్యాలయంలో ఏర్పాటు చేసిన మీడియా సమావేశంలో ఆయన మాట్లాడుతూ, జగన్ ప్రభుత్వంపై తీవ్ర స్థాయిలో విమర్శలు గుప్పించారు.17 మెడికల్ కాలేజీల నిర్మాణానికి ప్రస్తుత అంచనాల ప్రకారం కనీసం రూ.8500 కోట్లు అవసరమని, కానీ జగన్ ప్రభుత్వం ఐదేళ్లలో ఖర్చు చేసింది కేవలం రూ.1451 కోట్లు మాత్రమేనని భూమిరెడ్డి ఎత్తిచూపారు. "ఈ మొత్తంలో కూడా కేంద్ర ప్రభుత్వం వాటా రూ.975 కోట్లు కాగా, రాష్ట్ర ప్రభుత్వం ఖర్చు చేసింది కేవలం రూ.476 కోట్లే. ఈ కొద్దిపాటి నిధులతో 17 కాలేజీలు ఎలా కట్టారో జగన్ రెడ్డి సమాధానం చెప్పాలి" అని ఆయన డిమాండ్ చేశారు. అంతేకాకుండా, పీజీ మెడికల్ సీట్ల కోసం కేంద్రం కేటాయించిన రూ.700 కోట్ల నిధులను పక్కదారి పట్టించి, వైద్య విద్యకు తీరని ద్రోహం చేశారని ఆరోపించారు.చంద్రబాబు నాయుడు హయాంలో ఒక్క మెడికల్ కాలేజీ కూడా కట్టలేదన్న జగన్ వ్యాఖ్యలను భూమిరెడ్డి తీవ్రంగా తప్పుబట్టారు. ఉమ్మడి ఆంధ్రప్రదేశ్‌లో టీడీపీ హయాంలో ప్రభుత్వ, ప్రైవేట్, ట్రస్టుల ఆధ్వర్యంలో మొత్తం 25 మెడికల్ కాలేజీలు నిర్మించిన ఘనత చంద్రబాబు నాయుడిదేనని స్పష్టం చేశారు. "రికార్డులు తెప్పించుకుని వాస్తవాలు తెలుసుకుని మాట్లాడాలి. కావాలంటే మీ కార్యాలయానికి ఆధారాలు పంపిస్తా" అని సవాల్ చేశారు.వైద్య విద్యను ప్రైవేటీకరించి, బజారులో అమ్మకానికి పెట్టిన ఘనత జగన్ రెడ్డికే దక్కుతుందని రాంగోపాల్ రెడ్డి విమర్శించారు. ప్రభుత్వ కాలేజీల్లో సైతం 35 శాతం సీట్లను సెల్ఫ్ ఫైనాన్స్ కోటాకు, 15 శాతం సీట్లను ఎన్నారై కోటాకు కేటాయించి, రూ.12 లక్షల నుంచి రూ.20 లక్షల వరకు ఫీజులు వసూలు చేసేందుకు జీవోలు తెచ్చింది వాస్తవం కాదా? అని ప్రశ్నించారు. టీడీపీ హయాంలో ఈ కోటాలు లేవన్న విషయాన్ని గుర్తుంచుకోవాలన్నారు.పులివెందుల మెడికల్ కాలేజీ నిర్మాణంపై కూడా జగన్ పచ్చి అబద్ధాలు చెబుతున్నారని అన్నారు. "ఆ కాలేజీకి జగన్ ప్రభుత్వం ఖర్చు చేసింది రూ.284 కోట్లు అయితే, కూటమి ప్రభుత్వం అధికారంలోకి వచ్చాక 15 నెలల్లోనే రూ.120 కోట్లు చెల్లించింది. కేవలం ఒక స్లాబ్ వేసి అసంపూర్తిగా వదిలేసిన నిర్మాణాన్ని చూపి, కాలేజీ పూర్తి చేశానని ప్రచారం చేసుకోవడం సిగ్గుచేటు" అని విమర్శించారు. తన బంధువుల భూముల ధరలు పెంచుకోవడం కోసమే కాలేజీ స్థలాన్ని మార్చారని తీవ్ర ఆరోపణలు చేశారు.వైసీపీ పాలనలో నకిలీ మద్యం, గంజాయి సరఫరాతో లక్షలాది మంది ఆరోగ్యం నాశనమైందని, కరోనా మరణాలను తక్కువ చేసి చూపారని ఆరోపించారు. వివేకానంద రెడ్డి హత్య కేసు, లిక్కర్ కుంభకోణం, కుటుంబ కలహాలు, ఇటీవల జెడ్పీటీసీ ఎన్నికల్లో ఓటమి వంటి అంశాల నుంచి ప్రజల దృష్టిని మళ్లించేందుకే జగన్ రెడ్డి పీపీపీపై అనవసర యాగీ చేస్తున్నారని భూమిరెడ్డి ఆరోపించారు. ఇది కేవలం డైవర్షన్ పాలిటిక్స్‌లో భాగమేనని ఆయన కొట్టిపారేశారు