ఎంత ఘోరం.. సర్జరీ మధ్యలో రోగిని వదిలి నర్సుతో డాక్టర్ పాడుపని

ఆపరేషన్ థియేటర్‌లోనే ఒక రోగిని వదిలి.. మరో గదిలో నర్సుతో లైంగిక సంబంధం పెట్టుకున్న ఒక వైద్యుడిపై ఎలాంటి నిషేధాన్నీ విధించకపోవడం చర్చనీయాంశంగా మారింది. ముఖ్యంగా ఈ వివాదాస్పద నిర్ణయం వైద్యరంగంలో తీవ్ర చర్చకు దారితీసింది. బ్రిటన్‌లోని గ్రేటర్ మాంచెస్టర్‌లో ఉన్న టేమ్‌సైడ్ ఆసుపత్రిలో ఈ ఘటన చోటుచేసుకుంది. వైద్య మండలి ట్రిబ్యునల్.. ఈ డాక్టర్ చేసిన చర్యలు ‘తీవ్రమైన దుష్ప్రవర్తన’ కిందకు వస్తాయని నిర్ధారించినప్పటికీ.. అతనిపై నిషేధం విధించడం అవసరం లేదని పేర్కొంది.

అసలేం జరిగిందంటే?

పాకిస్థాన్ సంతతి వ్యక్తి అయిన 41 ఏళ్ల డాక్టర్ సుహైల్ అంజుమ్.. బ్రిటన్‌లో టేమ్‌సైడ్ ఆసుపత్రిలో వైద్యుడిగా పని చేస్తున్నాడు. అయితే 2023 సెప్టెంబర్ 16వ తేదీన.. అనస్థీషియా ఇచ్చిన ఒక రోగిని ఆపరేషన్ థియేటర్‌లోనే వదిలేసి, ఆసుపత్రిలోని మరో ఆపరేషన్ థియేటర్‌లోకి వెళ్లాడు డాక్టర్ సుహైల్ అంజుమ్. అక్కడే ఓ నర్సుతో లైంగిక సంబంధం నెరిపాడు. ఈ విషయాన్ని గమనించిన ఒక సహచర ఉద్యోగి ఈ సంఘటపై వైద్య మండలికి ఫిర్యాదు చేశారు. నివేదిక ప్రకారం.. డాక్టర్ సుహైల్ అంజుమ్.. ఒక రోగిని పర్యవేక్షించమని మరో నర్సును కోరి, తాను బాత్రూమ్‌కి వెళ్తున్నానని చెప్పి మరో నర్సుతో లైంగిక కార్యకలాపాలు నిర్వహించాడు.

మెడికల్ ప్రాక్టీషనర్స్ ట్రిబ్యునల్ సర్వీస్ విచారణ సందర్భంగా.. మరో నర్సు సాక్ష్యం ఇచ్చారు. తాను నర్సు ప్యాంటు మోకాళ్ల వద్ద ఉండగా, లోదుస్తులు కనిపించేలా చూశానని చెప్పింది. అలాగే ముగ్గురు పిల్లల తండ్రి అయిన డాక్టర్ అంజుమ్ ప్యాంటు తాళ్లను సరిచేసుకుంటూ కనిపించాడని ఆమె వివరించింది. ఈ సాక్ష్యం ఆధారంగా ట్రిబ్యునల్ విచారణ జరిపింది. ముఖ్యంగా ఈ సంఘటనను తీవ్రంగా పరిగణించిన ట్రిబ్యునల్.. డాక్టర్ అంజుమ్ తన రోగి, సహచరుల ప్రయోజనాల కంటే తన సొంత ఆసక్తికికే ఎక్కువ ప్రాధాన్యత ఇచ్చాడని పేర్కొంది. ఇది డాక్టర్‌కు మానసికంగా పరధ్యానాన్ని కలిగించవచ్చని, రోగికి శస్త్రచికిత్స చేయడంలో పూర్తి స్థాయిలో శ్రద్ధ చూపడంలో విఫలం అవ్వవచ్చని కూడా ట్రిబ్యునల్ అభిప్రాయపడింది.

ట్రిబ్యునల్ అధ్యక్షురాలు రెబెకా మిల్లర్ మాట్లాడుతూ.. డాక్టర్ అంజుమ్ చర్యలు తీవ్రమైన దుష్ప్రవర్తన కిందకు వస్తాయని పేర్కొన్నారు. అయితే ఆయన చర్యల వల్ల రోగికి ఎలాంటి హాని జరగలేదని, భవిష్యత్తులో ఈ పొరపాటును పునరావృతం చేయకుండా ఉండటానికి ఆయన నిశ్చయించుకున్నారని ఆమె సంతృప్తి వ్యక్తం చేశారు. అందువల్లే అతనిపై నిషేధం విధించాల్సిన అవసరం లేదని ట్రిబ్యునల్ అభిప్రాయపడింది. ఈ విషయం తెలుసుకున్న ప్రజలంతా తీవ్ర అసంతృప్తి వ్యక్తం చేస్తున్నారు.

వైద్యరంగంలో రోగి భద్రతకు అత్యంత ప్రాధాన్యత ఇవ్వాల్సి ఉన్నప్పటికీ.. డాక్టర్ అంజుమ్‌ చేసిన తప్పుకు శిక్ష విధించకుండా, కేవలం అతని ప్రవర్తనను తప్పు పట్టడం ఎంతమాత్రం సమర్థనీయం కాదని అంటున్నారు. ఇది వైద్య నైతికతను, వృత్తిపరమైన ప్రమాణాలను దెబ్బ తీసేలా ఉందని వైద్య రంగ నిపుణులు ఆందోళన వ్యక్తం చేస్తున్నారు. ఇదిలా ఉండగా.. అతని రిజిస్ట్రేషన్‌పై హెచ్చరిక జారీ చేయాలా వద్దా అనే విషయంపై ట్రిబ్యునల్ ఇంకా నిర్ణయం తీసుకోవాల్సి ఉంది.