ప్రధాని మోదీని దేవుడితో, ఋషితో పోల్చిన బాబా రాందేవ్‌

ప్రధానమంత్రి నరేంద్ర మోదీ 75వ జన్మదినం సందర్భంగా యోగా గురువు, పతంజలి సహ వ్యవస్థాపకుడు బాబా రాందేవ్‌ ఆయనపై ప్రశంసల వర్షం కురిపించారు. మోదీ ఒక దేవుడిలాంటి వారని, ఋషి అని, పర్వతంలాంటి గొప్ప వ్యక్తిత్వం ఉన్నవారని అభివర్ణించారు. బుధవారం మోదీ పుట్టినరోజు సందర్భంగా ఆయన ఐఏఎన్ఎస్ వార్తా సంస్థతో మాట్లాడారు."మోదీ ఒక దైవ స్వరూపుడు. ఇలాంటి వ్యక్తులు శతాబ్దానికి ఒకరే పుడతారు. ఆయన సనాతన ధర్మానికి, స్వదేశీ ఉద్యమానికి నిజమైన ప్రచారకర్త. ఆయన ఉద్దేశాలు, విధానాలు, నాయకత్వం కేవలం దేశ శ్రేయస్సు కోసమే" అని రాందేవ్‌ అన్నారు. వికసిత భారత్ కలను సాకారం చేసేందుకు ప్రతి ఒక్కరూ సహకరించాలని పిలుపునిచ్చారు. ప్రధాని పుట్టినరోజును పురస్కరించుకుని పతంజలి ఆధ్వర్యంలో దేశవ్యాప్తంగా పలు సేవా కార్యక్రమాలు చేపడుతున్నట్లు ప్రకటించారు.విద్యా రంగానికి మోదీ ఇస్తున్న ప్రాధాన్యతకు గుర్తుగా, దేశంలోని అన్ని జిల్లాల్లో ప్రతిభావంతులైన విద్యార్థులను సత్కరించనున్నట్లు తెలిపారు. సీబీఎస్ఈ, రాష్ట్ర బోర్డులు, భారతీయ శిక్షా బోర్డు పరిధిలో 10, 12వ తరగతుల్లో మొదటి మూడు స్థానాల్లో నిలిచిన విద్యార్థులకు రూ. 50,000 చొప్పున నగదు బహుమతి అందిస్తామని వెల్లడించారు. దీంతో పాటు, ప్రజలకు మెరుగైన వైద్య సేవలు అందించే లక్ష్యంతో దేశవ్యాప్తంగా 750 ఉచిత వైద్య, ఆరోగ్య శిబిరాలు నిర్వహిస్తున్నట్లు చెప్పారు.ఇదే సందర్భంలో, మోదీని 'అవతార పురుషుడు' అంటూ ముఖేష్ అంబానీ చేసిన వ్యాఖ్యలపై రాందేవ్‌ స్పందిస్తూ, "అది ఆయన భావన. నేను మాత్రం మోదీని భగవంతుడి ఆశీర్వాదంగా భావిస్తాను" అని పేర్కొన్నారు. అమెరికా అధ్యక్షుడు డొనాల్డ్ ట్రంప్ శుభాకాంక్షలు తెలపడంపై మాట్లాడుతూ, "ఒకప్పుడు సుంకాలు విధించిన ట్రంప్ ఇప్పుడు శిష్యుడిలా తిరిగి వస్తున్నారు. మోదీ నాయకత్వంలో భారత్ శక్తిని ప్రపంచ నేతలు గుర్తిస్తున్నారు" అని అన్నారు.విపక్షాలు ప్రధాని మోదీ తల్లిని కించపరిచేలా మాట్లాడటంపై ఆయన తీవ్రంగా స్పందించారు. "మోదీ తల్లిని హేళన చేయడం భారత సంస్కృతి కాదు. అలాంటి ప్రవర్తన చాలా అవమానకరం, ఏమాత్రం ఆమోదయోగ్యం కాదు" అని ఆయన విమర్శించారు