టెంపరరీ ప్రొటెక్టెడ్ స్టేటస్' రద్దు, 60 రోజుల్లో దేశం విడిచి వెళ్లాలని వారికి ఆదేశాలు

అక్రమ వలసదారుల పట్ల ఇప్పటికే కఠినంగా వ్యవహరిస్తున్న అమెరికా ప్రభుత్వం, సిరియా వలసదారుల విషయంలో ఒక కీలక నిర్ణయం తీసుకుంది. అమెరికాలో తాత్కాలిక రక్షణ హోదాతో నివసిస్తున్న సిరియన్లకు ఇకపై ఆ రక్షణ లభించదని ప్రకటించింది. ఈ నిర్ణయం వేలాది మంది సిరియన్ వలసదారుల భవిష్యత్తును ప్రశ్నార్థకం చేసింది. తాజా ఆదేశాల ప్రకారం.. హోదా కింద రక్షణ పొందుతున్న వారంతా రాబోయే 60 రోజుల్లోగా దేశం విడిచి వెళ్లిపోవాలని ఆదేశించింది. ఈ గడువును ఉల్లంఘించినట్లైతే అరెస్టులు, బహిష్కరణలు తప్పవని హెచ్చరించింది.

60 రోజుల్లోగా దేశం విడిచి వెళ్లాలి..

అమెరికా ప్రభుత్వం తీసుకున్న ఈ కఠినమైన నిర్ణయంతో సుమారు 6 వేల మందికి పైగా తం కానున్నారు. వీరిలో ఎక్కువ మంది 2012లో సిరియాలో చెలరేగిన అంతర్యుద్ధం, తీవ్రవాద కార్యకలాపాల కారణంగా తమ ప్రాణాలను రక్షించుకోవడానికి అమెరికాలో ఆశ్రయం పొందినవారే. దాదాపు ఒక దశాబ్దానికి పైగా అమెరికాలో శాంతియుతంగా నివసిస్తున్న వీరిపై ఇప్పుడు బహిష్కరణ భయం పట్టుకుంది. ఈ నిర్ణయం ద్వారా సిరియా పౌరులు తాము తిరిగి యుద్ధ భూమిలోకి వెళ్లాల్సి వస్తుందని ఆందోళన వ్యక్తం చేస్తున్నారు.

ఈ నిర్ణయం వెనుక ఉన్న కారణాలను డిపార్ట్‌మెంట్ ఆఫ్ హోమ్‌ల్యాండ్ సెక్యూరిటీ అధికార ప్రతినిధి ట్రిసియా మెక్లాఫ్లిన్ వెల్లడించారు. ప్రస్తుతం సిరియాలో నెలకొన్న పరిస్థితులు ప్రజలను తిరిగి తమ స్వదేశానికి వెళ్లకుండా నిరోధించేంత తీవ్రంగా లేవని ఆమె పేర్కొన్నారు. గతంలో తాత్కాలిక రక్షణ హోదా మంజూరు చేసినప్పటి పరిస్థితులు ఇప్పుడు లేవని, సిరియాలో సాధారణ పరిస్థితులు నెలకొంటున్నాయని ఆమె అన్నారు. రెండు దశాబ్దాలుగా ఉగ్రవాద కార్యకలాపాలకు సిరియా ఒక కేంద్రంగా మారిందని.. తమ దేశ ప్రయోజనాలకు విరుద్ధంగా అక్కడి వారిని తమ దేశంలో ఉండేందుకు అనుమతించడం కుదరదని ఆమె స్పష్టం చేశారు.

ఈ ఆదేశాలను పాటించని పక్షంలో తీవ్ర పరిణామాలు ఎదుర్కోవలసి వస్తుందని మెక్లాఫ్లిన్ హెచ్చరించారు. 60 రోజుల గడువులోగా వలసదారులు స్వచ్ఛందంగా దేశం వీడాలని.. అలా చేయని వారిని సంబంధిత వలస చట్టాల కింద అరెస్టు చేసి, బలవంతంగా బహిష్కరిస్తామని స్పష్టం చేశారు. అమెరికా చరిత్రలో ఇలాంటి వలస విధానాలు కొత్తవి కానప్పటికీ.. ఇది సిరియన్ సమాజంలో తీవ్రమైన అలజడిని సృష్టించింది. ఒకప్పుడు భద్రత కోసం ఆశ్రయం ఇచ్చిన అమెరికా, ఇప్పుడు తీసుకున్న ఈ నిర్ణయం వల్ల తమ జీవితాలు మళ్లీ ప్రమాదంలోకి నెట్టబడ్డాయని సిరియన్ వలసదారులు ఆవేదన వ్యక్తం చేస్తున్నారు. అమెరికా ప్రభుత్వం యొక్క తాజా నిర్ణయం సిరియన్ల భవితవ్యాన్ని, మానవ హక్కుల సంఘాల మధ్య ఒక కొత్త చర్చకు దారితీసింది.