H1B వీసా వ్యవహారంలో ట్రంప్‌కి బూమరాంగ్‌ దెబ్బ?

H1B వీసాలపై అమెరికా మాజీ అధ్యక్షుడు డొనాల్డ్ ట్రంప్ తీసుకున్న తాజా నిర్ణయం భారత్‌ మాత్రమే కాదు, అమెరికా భవిష్యత్తుపైనా తీవ్రమైన ప్రభావం చూపనుందనే ఆందోళనలు నిపుణుల్లో వ్యక్తమవుతున్నాయి. ఈ నెల 21 నుంచి H1B వీసా పొందాలంటే దరఖాస్తుదారులు అక్షరాలా కోటి రూపాయలు లేదా లక్ష డాలర్లు చెల్లించాల్సి ఉంటుంది. ఇది ఐటీ ప్రొఫెషనల్స్‌, డాక్టర్లు, శాస్త్రవేత్తలు వంటి నైపుణ్యులు కలిగిన వలసదారులపై భారీ ఆర్థిక భారం మోపే చర్యగా చూస్తున్నారు. ఆర్థిక నిపుణుల అభిప్రాయం ప్రకారం, ఈ నిర్ణయం అమెరికా యూనివర్సిటీలకు, రెసిడెన్షియల్, కమర్షియల్ రియల్ ఎస్టేట్ రంగాలకు, అలాగే హాస్పిటల్స్‌, స్టార్టప్‌లకు సైతం ప్రతికూల ప్రభావం చూపే అవకాశముంది. ఇప్పటికే అమెరికాలో పనిచేస్తున్న లక్షలాది భారతీయ టెక్ నిపుణుల భవిష్యత్తుపై ఇది సందేహాలు పెంచే అంశమని వారు పేర్కొన్నారు. పెరిగిన ఖర్చుల కారణంగా స్టార్టప్‌లు, చిన్న టెక్ కంపెనీలు తమ కార్యకలాపాలను అమెరికా వెలుపల తరలించే అవకాశమున్నట్లు మార్కెట్ విశ్లేషకులు సూచిస్తున్నారు. ట్రంప్ భావించినట్లుగా అమెరికన్ టెక్ ఉద్యోగులకు సరిపడా నైపుణ్యం లేకపోవడం, వారికి డెడికేషన్ తక్కువగా ఉండటం, జాబ్‌ ప్రవర్తనలో స్థిరత్వం లేకపోవడం వంటి అంశాలు టెక్ కంపెనీలకు ఇబ్బందులు సృష్టిస్తున్నాయని నిపుణులు గుర్తిస్తున్నారు. విద్యార్ధుల సంఖ్యలో తగ్గుదల, యూనివర్సిటీల ఆదాయానికి దెబ్బతగల అవకాశం కూడా ఉందని విశ్లేషకులు అంటున్నారు, ఎందుకంటే అమెరికాలో అనేక ప్రైవేట్ యూనివర్సిటీలు విదేశీ విద్యార్థులపై ఆధారపడినవి. నీతి ఆయోగ్‌ మాజీ సీఈఓ అమితాబ్ కాంత్ ఈ నిర్ణయంపై స్పందిస్తూ, లక్ష డాలర్ల వీసా ఫీజు అమలు వల్ల అమెరికాలో ప్రపంచస్థాయి ప్రతిభ ప్రవేశ అవకాశాలు తగ్గి, ఆవిష్కరణలు, స్టార్టప్‌లు భారత్‌లోని బెంగళూరు, హైదరాబాద్, పుణె, గురుగ్రామ్ వంటి నగరాలకు తరలిపోనున్నట్లు చెప్పారు. ఈ మార్పు భారత్‌కు టర్బో ఛార్జింగ్ లాంటి ప్రయోజనం దచ్చే అవకాశం ఉందని ఆయన పేర్కొన్నారు. ఇక ప్రధాన మంత్రి నరేంద్ర మోదీ ఈ వ్యవహారంపై పరోక్షంగా స్పందిస్తూ “మనకు నిజమైన శత్రువులు ఎవరూ లేరు, కానీ విదేశాలపై ఆధారపడటం మన ప్రధాన శత్రువు” అని పేర్కొన్నారు. ట్రంప్ నిర్ణయం నేపథ్యంలో ఈ వ్యాఖ్యలు మరింత ప్రాముఖ్యత పొందాయి. మొత్తానికి, H1B వీసాలపై తీసుకున్న ట్రంప్‌ నిర్ణయం తక్షణ ప్రభావాలు తక్కువగా ఉండవచ్చు కానీ భవిష్యత్తులో అమెరికా తన సొంత ఆవిష్కరణ సామర్థ్యం, టెక్నాలజీ ప్రభావాన్ని కోల్పోవచ్చు అనే హెచ్చరికలు వినిపిస్తున్నాయి. ఈ చర్య చివరికి ట్రంప్‌కు కాదు, అమెరికాకే 'సెల్ఫ్‌గోల్'గా మారుతుందా? అనే ప్రశ్న ప్రపంచ వ్యాప్తంగా తెగ చర్చించబడుతోంది.