ఏపీలో కొత్తగా సంజీవని పథకం.. కుటుంబానికి రూ.25 లక్షలు లబ్ధి.. మంత్రి

ఆంధ్రప్రదేశ్ ప్రభుత్వం రాష్ట్ర ప్రజల కోసం త్వరలోనే మరో పథకం అమల్లోకి తేనుంది. రాష్ట్రంలోని ప్రజలు అందరికీ ఆరోగ్య బీమా కల్పించాలనే ఉద్దేశంతో సంజీవని పేరుతో కొత్త పథకం ప్రారంభించనుంది. త్వరలోనే ఈ పథకాన్ని ప్రారంభించేందుకు కసరత్తు చేస్తున్నారు. సంజీవని పథకం ద్పారా ప్రతి కుటుంబానికి రూ.25 లక్షల మేరకు లబ్ధి కలుగుతుందని ఏపీ విద్యుత్ శాఖ మంత్రి గొట్టిపాటి రవి కుమార్ అన్నారు. పేదల ఆరోగ్యానికి సీఎం నారా చంద్రబాబు నాయుడు ప్రథమ ప్రాధాన్యం ఇస్తున్నారని అన్నారు. దేశంలో ఎక్కడా అమలు కానన్ని సంక్షేమ పథకాలను రాష్ట్రంలో అమలు చేస్తున్నారని వివరించారు. అద్దంకిలో జరిగిన ఓ కార్యక్రమంలో120 మంది లబ్ధిదారులకు మంత్రి గొట్టిపాటి రవికుమార్ రూ.70 లక్షల మేర ముఖ్యమంత్రి సహాయనిధి చెక్కులు అందించారు. ఈ సందర్భంగా మాట్లాడిన ఆయన.. త్వరలోనే సంజీవని పథకం అమల్లోకి తెస్తామని వెల్లడించారు.

మరోవైపు ఈ పథకం కింద రాష్ట్రంలోని ప్రతి ఒక్కరికీ ఆరోగ్య బీమా కల్పించనుంది ప్రభుత్వం. ఈ యూనివర్సల్‌ హెల్త్‌ పాలసీకి ఇటీవల జరిగిన మంత్రివర్గ సమావేశంలో ఏపీ కేబినెట్ ఆమోదం తెలిపింది. కుటుంబాల ఆర్థిక స్థితిగతులతో సంబంధం లేకుండా రాష్ట్రంలోని ప్రతి ఒక్కరికీ ఈ సంజీవని పథకం అమలు చేయనున్నారు. ప్రతి కుటుంబానికి ఏడాదికి రూ.25 లక్షల వరకూ ఫ్రీగా వైద్యం అందిస్తారు. ఎన్టీఆర్‌ వైద్య సేవా ట్రస్ట్‌లో ఇప్పటికే నమోదైన 2,493 నెట్‌వర్క్‌ ఆస్పత్రులలోనూ ఈ విధానం ద్వారా ఉచిత వైద్య సేవలు పొందే వీలుంది. దారిద్య్ర రేఖకు దిగువన, ఎగువన ఉన్న కుటుంబాలతో పాటుగా అన్ని వర్గాల ప్రజలకూ 3,257 రకాల చికిత్సలు ఈ యూనివర్సల్ హెల్త్ పాలసీ ద్వారా ఉచితంగా లభిస్తాయి.

మరోవైపు ఆంధ్రప్రదేశ్ రాష్ట్రంలో ఎన్టీఆర్ వైద్య సేవ ట్రస్టు ద్వారా 1.63 కోట్ల కుటుంబాలు వైద్యం పొందుతున్నాయి. వీరు కాకుండా దారిద్ర్య రేఖకు ఎగువన ఉన్న ప్రజలు, ఉద్యోగులు, పెన్షనర్లు వంటి వారు కలిసి మరో 8.60 లక్షల కుటుంబాలు ఉన్నాయి. వీరందరికీ యూనివర్సల్ హెల్త్ పాలసీ అమలు చేయనున్నారు.

ఇందులో భాగంగా రూ.2.50 లక్షల వరకూ ఉచితంగా వైద్య సేవలు అందించేలా ప్రభుత్వం బీమా కంపెనీలకు ప్రీమియం చెల్లిస్తుంది. వైద్య చికిత్సలకు అయ్యే ఖర్చు రూ.2.50 లక్షలు దాటితే.. రూ.25 లక్షలు వరకూ ఎన్టీఆర్‌ వైద్యసేవ ద్వారా ఉచితంగా వైద్య సేవలు అందిస్తారు. సంజీవని పథకానికి సంబంధించిన మార్గదర్శకాలను రూపొందించే పనిలో అధికారులు ఉన్నారు.