ఈ 5 ప్రయోజనాలు తెలిస్తే.. వెంటనే క్రెడిట్ కార్డ్ తీసుకుంటారు

మన దేశంలో ప్రస్తుతం క్రెడిట్ కార్డుల వాడకం భారీగా పెరిగింది. బ్యాంకులు చాలా సులభంగా క్రెడిట్ కార్డులను జారీ చేస్తుండడంతో ఎక్కువ మంది వీటిని తీసుకుంటున్నారు. ప్రస్తుతం డెబిట్ కార్డుల కంటే క్రెడిట్ కార్డుల లావాదేవీలే ఎక్కువగా జరుగుతున్నాయి. ఓ దశలో అన్ సెక్యూర్డ్ రుణాలపై ఆర్‌బీఐ సైతం ఆందోళన వ్యక్తం చేసిన విషయం తెలిసిందే. ఈ మేర క్రెడిట్ కార్డుల వాడకం పెరిగింది. అయితే ఇప్పటికీ చాలా మంది క్రెడిట్ కార్డులను తీసుకోవాలా వద్దా, తీసుకుంటే అప్పుల్లో కూరుకుపోతామా? అనే అయోమయంలో వాటికి దూరంగా ఉండిపోతున్నారు. అయితే, ఆర్థిక క్రమశిక్షణ ఉంటే క్రెడిట్ కార్డులను వినియోగిస్తూనే అనేక ప్రయోజనాలు పొందవచ్చని మార్కెట్ నిపుణులు చెబుతున్నారు. మరి ఆ ప్రయోజనాలు తెలుసుకుందాం.

క్రెడిట్ కార్డులను వాడుతూ సరైన సమయానికి పేమెంట్లు చేస్తే క్రెడిట్ హిస్టరీ నమోదవుతుంది. క్రెడిట్ కార్డులను బాధ్యతాయుతంగా వాడుతూ పేమెంట్లు సరైన సమయంలో చేస్తే మెరుగైన క్రెడిట్ స్కోరు ఉంటుంది. ఆర్థిక క్రమ శిక్షణ ద్వారా మంచి క్రెడిట్ స్కోర్ నిర్వహించవచ్చు. ఇలాంటి వారికి భవిష్యత్తులో లోన్స్ వేగంగా మంజూరు చేస్తాయి బ్యాంకులు. వడ్డీ రేటులో సైతం రాయితీలు కల్పిస్తాయి. తక్కువ వడ్డీ రేటుకే లోన్స్ ఆఫర్ చేస్తుంటాయి.

డిజిటల్ ట్రాన్సాక్షన్లు, ఎమర్జెన్సీ పేమెంట్లకు క్రెడిట్ కార్డులు చాలా ఉపయోగపడతాయి. డెబిట్ కార్డుతోనూ ఇలాంటి ట్రాన్సాక్షన్లు చేయవచ్చు కానీ అకౌంట్లో తగినంత బ్యాలెన్స్ ఉండాలి. లేదంటే పేమెంట్లు చేయలేరు. కానీ క్రెడిట్ కార్డుతో అలాంటి ఇబ్బంది ఏమీ ఉండదు. అత్యవసర ఖర్చుల జాబితాలోని పిల్లల ఫీజులు, బీమా ప్రీమియంలు, వైద్య ఖర్చుల వంటివి క్రెడిట్ కార్డుతో ఇచ్చిన గడువు తేదీలోపు పేమెంట్ చేయొచ్చు. ఆ తర్వాత నెల రోజుల వరకు వడ్డీ లేకుండా తిరిగి చెల్లించవచ్చు.

అకస్మాత్తుగా నగదు అవసరమైతే ఏం చేయాలో తోచదు. తెలిసిన వారిని అడగాల్సి వస్తుంది. ఈ అవసరం లేకుండానే క్రెడిట్ కార్డు ద్వారా పొందవచ్చు. ఎవరికైనా మెడికల్ ఎమర్జెన్సీ ఏర్పడినప్పుడు నగదు అత్యవసరంగా అవసరం అవుతుంది. అలాంటి టైంలో కార్డు క్రెడిట్ లిమిట్ ఆధారంగా బ్యాంకు ఏటీఎంలో నగదు విత్ డ్రా చేయవచ్చు. అయితే, దీనిపై వార్షిక వడ్డీ 36 శాతం వరకు ఉంటుంది.

ఏదైనా అవసరానికి నగదు కావాల్సి వచ్చినప్పుడు క్రెడిట్ కార్డుతో తక్కువ వడ్డీకే వ్యక్తిగత లోన్ తీసుకోవచ్చు. క్రెడిట్ స్కోర్ మెరుగ్గా ఉన్నట్లయితే క్రెడిట్ కార్డు ఇచ్చిన కంపెనీలే ప్రీ అప్రూవ్డ్ లోన్స్ మంజూరు చేస్తాయి. ఇలాంటి లోన్స్ చాలా వేగంగా బ్యాంక్ అకౌంట్లో క్రెడిట్ అవుతాయి. అలాగే కొన్ని బ్యాంకులు ప్రాసెసింగ్ ఫీజులను సైతం మాఫీ చేస్తుంటాయి. దీంతో అదనపు ప్రయోజనం పొందవచ్చు.

క్రెడిట్ కార్డులు విమానాశ్రయాలు, రైల్వే స్టేషన్లలో కాంప్లిమెంటరీ లాంజ్ యాక్సెస్ ఇస్తుంటాయి. అలాగే చెక్ ఇన్ సౌకర్యాలు కల్పిస్తాయి. కొన్ని క్రెడిట్ కార్డులతో ఎయిర్ పోర్ట్ లాంజ్‌లోకి ఉచితంగా లేదా తక్కువ ఖర్చుతో యాక్సెస్ చేయవచ్చు. దీంతో పెద్దగా ఖర్చు లేకుండానే సౌకర్యవంతమైన ఎయిర్ పోర్ట్ లాంజ్ సేవలు పొందవచ్చు.