సీనియర్లకు ఈ 3 బ్యాంకుల్లో 8.4 శాతం మేర వడ్డీ

రిజర్వ్ బ్యాంక్ ఆఫ్ ఇండియా వడ్డీ రేట్లను తగ్గిస్తూ వచ్చిన క్రమంలో గత కొన్ని నెలలుగా చాలా బ్యాంకులు ఫిక్స్‌‍డ్ డిపాజిట్ల వడ్డీ రేట్లను తగ్గించాయి. జనరల్ కస్టమర్లతో పాటు సీనియర్ సిటిజన్లకు ఆఫర్ చేసే వడ్డీ రేట్లలోనూ కోత పెట్టాయి. దీంతో తమ డబ్బులు ఏ బ్యాంకులో వేస్తే అధిక వడ్డీ వస్తుందని వెతుక్కోవాల్సిన అవసరం ఏర్పడింది. అయితే, ఇప్పటికీ పలు బ్యాంకులు గరిష్ఠ వడ్డీ రేట్లను ఆఫర్ చేస్తున్నాయి. 60 సంవత్సరాలు దాటిన సీనియర్ సిటిజన్లకు రూ.3 కోట్ల వరకు ఉండే రిటైల్ టర్మ్ డిపాజిట్లపై ఏకంగా 8.40 శాతం వరకు వడ్డీ రేటు ఆఫర్ చేస్తున్నాయి. ఎలాంటి రిస్క్ లేకుండా స్థిరమైన ఆదాయం పొందాలనుకుంటున్న సీనియర్ సిటిజన్లకు ఇది ఒక బెస్ట్ ఆప్షన్ అని చెప్పవచ్చు.

ఈ సెప్టెంబర్, 2025 నెలలో ఫిక్స్‌డ్ డిపాజిట్లపై 8 శాతానికి పైగా వడ్డీ రేట్లు కల్పిస్తున్న బ్యాంకుల గురించి తెలుసుకుందాం. ఈ జాబితాలో అగ్రస్థానంలో సూర్యోదయ స్మాల్ ఫైనాన్స్ బ్యాంక్ ( Suryoday Small Finance Bank ) నిలిచింది. ఫిక్స్‌డ్ డిపాజిట్లపై వడ్డీ రేట్లను సవరించింది. సెప్టెంపర్ 8, 2025 నుంచే కొత్త వడ్డీ రేట్లను అమలులోకి తెచ్చింది. దీంతో 5 సంవత్సరాల మెచ్యూరిటీ పీరియడ్ డిపాజిట్లపై సీనియర్ సిటిజన్లకు 8.40 శాతం వడ్డీ ఆఫర్ చేస్తోంది. ఇందులో రూ.5 లక్షలు డిపాజిట్ చేస్తే 5 ఏళ్ల తర్వాత అసలు, వడ్డీతో చేతికి రూ. 7,02,000 వరకు వస్తాయి.

 ఇక రెండో స్థానంలో ఉత్కర్ష్ స్మాల్ ఫైనాన్స్ బ్యాంక్ సీనియర్ సిటిజన్లకు 2 ఏళ్ల నుంచి 3 ఏళ్ల వరకు ఉండే టర్మ్ డిపాజిట్లపై గరిష్ఠంగా 8.15 శాతం వడ్డీ ఆఫర్ చేస్తోంది. ఈ వడ్డీ రేట్లను 2025, జూలై 25 నుంచే అమలు చేస్తోంది. ఇందులో రూ.5 లక్షలు జమ చేస్తే 3 ఏళ్ల తర్వాత చేతికి అసలు, వడ్డీతో మొత్తం రూ.6,12,000 వరకు అందుతాయి.

ఇక మూడో స్థానంలో జన స్మాల్ ఫైనాన్స్ బ్యాంక్ ఉంది. సెప్టెంబర్ 16, 2025 నుంచే కొత్త వడ్డీ రేట్లను అమలులోకి తీసుకొచ్చింది. ప్రస్తుతం 5 సంవత్సరాల ఫిక్స్‌డ్ డిపాజిట్ స్కీమ్‌ ద్వారా సీనియర్ సిటిజన్లకు 8 శాతం వడ్డీ ఆఫర్ చేస్తోంది. ఇందులో రూ.5 లక్షలు డిపాజిట్ చేసినట్లయితే 5 ఏళ్ల తర్వాత చేతికి రూ. 6,97,000 వరకు అందుతాయి. అంటే దాదాపు రూ.7 లక్షలు చేతికి వస్తాయి.

వాటి తర్వాత ఏయూ స్మాల్ ఫైనాన్స్ బ్యాంక్ 2-3 ఏళ్ల డిపాజిట్లపై 7.6 శాతం వడ్డీ ఇస్తోంది. ఈక్విటాస్ స్మాల్ ఫైనాన్స్ బ్యాంక్ 888 రోజుల డిపాజిట్లకు 7.9 శాతం వడ్డీ ఆఫర్ చేస్తోంది. ఈఎస్ఏఎఫ్ స్మాల్ ఫైనాన్స్ బ్యాంక్ 444 రోజులకు 8.10 శాతం వడ్డీ ఆఫర్ చేస్తోంది. స్లైల్ స్మాల్ ఫైనాన్స్ బ్యాంక్ 18 నెలల 2 రోజులకు 7.75 శాతం వడ్డీ అందిస్తోంది.