కర్ణాటక క్రికెట్ అసోసియేషన్ టోర్నమెంట్‌లో అర్జున్, సమిత్,,,,,అర్జున్ టెండూల్కర్

భారత క్రికెట్‌లో సచిన్ టెండూల్కర్ , రాహుల్ ద్రవిడ్ తమదైన చెరగని ముద్ర వేశారు. ఆ ఇద్దరు ఆటగాళ్లు ఎన్నో మ్యాచ్‌లను గెలిపించి టీమిండియా చరిత్ర పుస్తకాల్లో చిరస్థాయిగా మిగిలిపోయారు. ఈ ఇద్దరు లెజెండ్రీ ఆటగాళ్ల తనయులు ప్రత్యర్థులుగా మారి ఆడిన ఆట అందర్నీ ఆకట్టుకుంది. కర్ణాటక స్టేట్ క్రికెట్ అసోసియేషన్ నిర్వహిస్తున్న టోర్నమెంట్‌లో సచిన్, ద్రవిడ్ కొడుకులు మైదానంలో తలపడ్డారు.

సచిన్, ద్రవిడ్ వారసులు.. అర్జున్ టెండూల్కర్ , సమిత్ ద్రావిడ్ తమ ప్రతిభను నిరూపించుకోవడానికి ప్రయత్నిస్తున్నారు. తాజాగా, కర్ణాటక స్టేట్ క్రికెట్ అసోసియేషన్ (కేఎస్‌సీఏ) నిర్వహిస్తున్న ప్రతిష్టాత్మక డాక్టర్ తిమ్మప్పయ్య మెమోరియల్ టోర్నమెంట్ లో ఈ ఇద్దరూ అపోజిట్ టీమ్స్‌లో ఆడారు.

ఈ పోరులో గోవా తరఫున ఆడిన అర్జున్ టెండూల్కర్, కేఎస్‌సీఏ సెక్రటరీస్ ఎలెవన్ తరఫున ఆడిన సమిత్ ద్రావిడ్‌ను అవుట్ చేశాడు. సమిత్ 26 బంతుల్లో 9 పరుగులు మాత్రమే చేసి అవుటయ్యాడు. సమిత్ 9 పరుగుల్లో రెండు బౌండరీలు బాదాడం విశేషం. చివరికి అర్జున్ వేసిన బంతికి కాశబ్ బాక్లే క్యాచ్ పట్టడంతో అతని ఇన్నింగ్స్ ముగిసింది.

ఇప్పటికే ఈ టోర్నమెంట్ మొదటి మ్యాచ్‌లో అర్జున్ టెండూల్కర్ ఐదు వికెట్లు తీయడం ద్వారా తన బౌలింగ్ శక్తిని చాటుకున్నాడు. గోవా తరఫున ఆడుతూ బౌలర్‌గా మాత్రమే కాకుండా బ్యాటర్‌గా కూడా విలువైన రన్స్ ఇవ్వగల ఆల్‌రౌండర్‌గా ఎదుగుతున్నాడు.

ఇటీవల కాలంలో అర్జున్ వ్యక్తిగత జీవితానికి సంబంధించిన వార్తలు కూడా హైలైట్ అయ్యాయి. ఆగస్టులో అతడు సానియా చందోక్తో నిశ్చితార్థం చేసుకున్నాడు. ఈ విషయం సోషల్ మీడియాలో పెద్ద చర్చగా మారింది. అయితే కుటుంబాల నుంచి అధికారిక ప్రకటన రాలేదు. అనంతరం ఒక సోషల్ మీడియా "ఆస్క్ మీ ఎనిథింగ్" సెషన్‌లో సచిన్ టెండూల్కర్ స్వయంగా అర్జున్ నిశ్చితార్థాన్ని వెల్లడించాడు. ఆయన మాట్లాడుతూ, “అవును, అర్జున్ నిశ్చితార్థం జరిగింది. మా కుటుంబమంతా అతని జీవితంలో కొత్త అధ్యాయం కోసం ఎంతో ఉత్సాహంగా ఉంది” అని చెప్పాడు.

ప్రస్తుతం అర్జున్ టెండూల్కర్ గోవా తరఫున దేశీయ క్రికెట్‌లో ఆడుతున్నాడు. ఇప్పటివరకు 17 ఫస్ట్-క్లాస్ మ్యాచ్‌ల్లో 37 వికెట్లు తీశాడు, అలాగే 532 పరుగులు చేశాడు. 24 టీ 20 మ్యాచ్‌ల్లో 27 వికెట్లు, 119 పరుగులు సాధించగా, 18 లిస్టు – ఏ వన్డేల్లో 25 వికెట్లు, 102 పరుగులు నమోదు చేశాడు.