అమెరికా బయట కనిపించేది ఒకటి..లోపల జరిగేది ఇంకోటి

అమెరికాలో ఉద్యోగం అంటే బయట కనిపించేవారికి ఓ పెద్ద కల. కానీ అక్కడకు వెళ్లినవాళ్లకు తెలుస్తుంది దాని కష్టం. అమెరికా అధ్యక్షుడు ట్రంప్ H-1B వీసా ఫీజును 100,000 డాలర్లకు పెంచడంతో సర్వత్రా ఆందోళన వ్యక్తమవుతోంది. ఈ క్రమంలో అమెజాన్ మాజీ ఉద్యోగి సోషల్ మీడియాలో షేర్ చేసిన పోస్ట్ వైరల్ అవుతోంది. ‘బయటి నుంచి కనిపించినంత గొప్పగా లోపల పరిస్థితి ఉండదు’ అని ఆయన స్పష్టంగా చెప్పాడు. తాను అమెరికా నుంచి తిరిగి ఇండియాకు వచ్చేయడానికి ప్రధాన కారణం అక్కడ భారతీయ మేనేజర్లు చూపించే 'టాక్సిక్ బిహేవియర్' అని ఆయన ఆరోపించాడు. అంతేకాదు, ఈ వైఖరి కారణంగానే అమెరికన్లు భారతీయులను వ్యతిరేకిస్తున్నారని పేర్కొన్నాడు.

టెకీ పోస్ట్ ప్రకారం.. భారతీయ మేనేజర్లు తమ వాళ్లనే ఎక్కువగా దోచుకుంటున్నారట. వాళ్లూ H-1B వీసా కష్టాలు పడ్డవారే కాబట్టి, ఆ వీసా హోల్డర్ల బలహీనతలను ఆసరాగా చేసుకుని ఇష్టానుసారంగా వాడుకుంటున్నారని ఆయన వాపోయారు. ఈ మేనేజర్లు అమెరికన్లను ఉద్యోగంలో పెట్టుకోవడానికి ఇష్టపడరు. ఎందుకంటే, అమెరికన్లు ఎప్పుడైనా 24/7 పనిచేయడానికి ముందుకురారు. హద్దులు దాటితే వెంటనే కోర్టుకు వెళ్తారు. అందుకే వీసా మీద ఉన్నవాళ్లను తమకు అనుకూలంగా వాడుకుంటారు.

అంతేకాదు, భారతీయ మేనేజర్లు తమ ప్రాంతానికి, కులానికి చెందిన వారికే ప్రాధాన్యత ఇస్తారని ఆరోపించారు. ఉదాహరణకు వాల్‌మార్ట్ ఐటీ విభాగంలో తెలుగు మేనేజర్లు ఎక్కువగా ఉంటారని, వారు తెలుగు వాళ్లకే ఉద్యోగాలు ఇస్తారని, అదేవిధంగా ఇంటెల్‌లో గుజరాతీలు గుజరాతీలను మాత్రమే నియమిస్తారని ఆయన తెలిపారు. దీనికి ఒక నెటిజన్ కూడా స్పందిస్తూ, "మా బంధువు ఒకరు మేనేజర్‌గా ఉన్నారు. ఆమె ఉద్యోగంలో 'మన కులం అమ్మాయి' అని ఒక భారతీయురాలిని తీసుకున్నారు. అది నాకు చాలా అసహ్యంగా అనిపించింది" అని పేర్కొన్నారు. ఇది అమెరికాలోని 'కులం, ప్రాంతం' సమస్యలను బయటపెట్టింది.

'దాదాపు బానిసత్వం లాంటి వీసా'

మరో నెటిజన్ H-1B వీసాను ఒక రకంగా ‘బానిసత్వ వీసా’గా అభివర్ణించారు. ‘ఇది నైపుణ్యం ఆధారిత వీసా కాదు, అదృష్టం, కార్పొరేట్ కంపెనీల 'దయదాక్షిణ్యాల' మీద ఆధారపడి ఉంటుంది. చాలామంది తక్కువ జీతాలకే పనిచేస్తారు" అని ఆయన అన్నారు. అనేక అమెరికా సంస్థలు తమ సాధారణ పనులను, ముఖ్యమైనవి కాని పనులను మన దేశంలోని విప్రో, ఇన్ఫోసిస్, టీసీఎస్ లాంటి కంపెనీలకు ఔట్‌సోర్స్ చేస్తాయి. ఈ కంపెనీలు తక్కువ జీతాలకు మనవాళ్లను అమెరికాకు పంపి, డబ్బు ఆదా చేసుకుంటాయని నెటిజన్లు ఆరోపించారు.

కాగా, పెంచిన H-1B వీసా ఫీజు కేవలం కొత్తగా దరఖాస్తు చేసుకునేవారికి మాత్రమే వర్తిస్తుంది. ఇప్పటికే వీసా ఉన్నవారు, రెన్యూవల్ చేసుకునేవారు ఈ ఫీజు చెల్లించాల్సిన అవసరం ఉండదు. కొన్ని ప్రత్యేక సందర్భాల్లో, ఉదాహరణకు డాక్టర్లు లేదా జాతీయ ప్రయోజనాలకు అవసరమైన నిపుణులకు ఈ ఫీజు నుంచి మినహాయింపు లభిస్తుంది. ఈ మొత్తం వ్యవహారం చూస్తుంటే, అమెరికాలో ఉద్యోగం అనేది బయటి నుంచి కనిపించినంత సులభం కాదని మరోసారి రుజువైంది.