తగ్గిన బంగారం ధర.. ప్రముఖ జువెలరీల్లో ఈరోజు రేట్లు ఇవే

దసరా పండగ వేళ బంగారం కొనుగోలు చేద్దామని అనుకుంటున్న వారికి ఉపశమనం లభించింది. గత నాలుగు రోజులుగా భారీగా పెరుగుతూ బెంబేలెత్తించిన బంగారం ధరలు ఎట్టకేలకు వెనక్కి మళ్లాయి. బుధవారం అంతర్జాతీయ విపణిలో పసిడి ధరలు తగ్గాయి. అమెరికా కేంద్ర బ్యాంక్ ఫెడరల్ రిజర్వ్ అధికారుల వ్యాఖ్యలు బంగారం ధరలు తగ్గేందుకు కారణమయ్యాయి. ప్రస్తుత పరిస్థితుల్లో వడ్డీ రేట్లను తక్షణమే తగ్గిస్తారనే అంచనాలను ఫెడ్ అధికారులు తోసిపుచ్చారు. అలాంటి ప్రతిపాదన, ఆలోచన ఫెడ్ వద్ద లేదని తేల్చేశారు. దీంతో బంగారం ధరలు ఒక్కసారిగా పడిపోయాయి. ఈరోజు తులం బంగారం రేటు రూ. 900 మేర పడిపోయింది. అయినప్పటికీ గరిష్ఠ స్థాయుల్లోనే కొనసాగుతుండడం గమనార్హం.

ఎంసీఎక్స్ మార్కెట్లో గోల్డ్ అక్టోబర్ ఫ్యూచర్స్ ధరలు 10 గ్రాములకు రూ. 1,13,400 వద్ద ట్రేడవుతున్నాయి. ఈరోజు ఉదయం 9 గంటల సమయంలో 0.38 శాతం (రూ. 436) తగ్గాయి. ఇక సిల్వర్ డిసెంబర్ ఫ్యూచర్స్ ధరలు ఈరోజు 0.23 శాతం మేర తగ్గి కిలోకు రూ.1,34,750 వద్ద ట్రేడింగ్ మొదలు పెట్టాయి. ఈ సెప్టెంబర్ నెలలో ఇప్పటి వరకు కిలో వెండి రేటు రూ. 12,877 మేర పెరిగింది. అంతర్జాతీయ బులియన్ మార్కెట్లో ఇన్వెస్టర్లు లాభాల స్వీకరణకు మొగ్గు చూపడంతో బంగారం ధరలు దిగివచ్చాయి. తక్షణ వడ్డీ రేట్ల తగ్గింపు ఉంటుందన్న అంచనాలను అమెరికా ఫెడరల్ రిజర్వ్ ఛైర్మన్ జెరోమ్ పావెల్ కొట్టిపారేసిన క్రమంలో డాలర్ విలువ పుంజుకుని బంగారం ధరలు తగ్గాయి. స్పాట్ గోల్డ్ 0.3 శాతం మేర పడిపోయి ఔన్స్ ధర 3753 డాలర్లకు దిగివచ్చింది. మరింత తగ్గవచ్చన్న అంచనాలు ఉన్నాయి.

ఈ క్రమంలో సెప్టెంబర్ 24వ తేదీ బుధవారం సాయంత్రం 7 గంటలకు ప్రముఖ జువెలరీల్లో 22 క్యారెట్ల బంగారం ధర కాస్త తగ్గింది.

జోయాలుక్కాస్ జువెలరీలో 22 క్యారెట్ల బంగారం ఆభరణాల రేటు 10 గ్రాములకు రూ. 1,05,750 వద్ద ఉంది. అలాగే 18 క్యారెట్ల బంగారం రేటు తులానికి రూ. 87,650 వద్ద ఉంది. ఇక 24 క్యారెట్ల ప్యూర్ గోల్డ్ రేటు రూ. 1,15,410 వద్ద ట్రేడవుతోంది.

కల్యాణ్ జువెలరీలో ఈరోజు 22 క్యారెట్ల బంగారం రేటు 10 గ్రాములకు రూ. 1,05,750 వద్ద ట్రేడవుతోంది.

దక్షిణ భారత్‌లోని మరో ప్రముఖ జువెలరీ సంస్థ లలితా జువెలరీలో ఈరోజు 10 గ్రాముల ఆభరణాల బంగారం (22 క్యారెట్లు) ధర రూ. 1,05,750 వద్ద ట్రేడవుతోంది.