రూ.20 లక్షలు ఎఫ్‌డీ చేస్తే.. నెలకు ఎంత వడ్డీ వస్తుంది?

సంపాదిస్తున్న సమయంలోనే భవిష్యత్తు అవసరాల కోసం పొదుపు, పెట్టుబడులు చేయాలని ఆర్థిక నిపుణులు చెబుతుంటారు. భవిష్యత్తు ఆర్థిక లక్ష్యాలకు అనుగుణంగా, ద్రవ్యోల్బణాన్ని మించి రాబడులు వచ్చే మార్గాలను ఎంచుకోవాలని సూచిస్తుంటారు. ప్రస్తుతం ఇన్వెస్ట్ చేసేందుకు చాలా మార్గాలు ఉన్నాయి. సాంప్రదాయ పొదుపు పథకాలు, ప్రభుత్వ సెక్యూరిటీలు, బాండ్ల నుంచి స్టాక్ మార్కెట్, మ్యూచువల్ ఫండ్ల వరకు ఉన్నాయ. అలాగే బంగారం, వెండి సహా భూములపైనా పెట్టుబడులు పెడుతుంటారు. అయితే, వీటిల్లో చాలా మార్గాల్లో హైరిస్క్ ఉంటుంది. హైరిటర్న్స్ కోసం చూసే వారు వాటిని ఎంచుకుంటుంటారు. ఇటీవలి కాలంలో స్టాక్ మార్కెట్, మ్యూచువల్ ఫండ్లలో పెట్టుబడులు భారీగా వస్తున్నాయి. ఇలాంటి పరిస్థితుల్లోనూ స్థిరమైన రాబడి అందించే బ్యాంకు డిపాజిట్లకు సైతం మంచి ఆదరణ ఉంటోంది.

బ్యాంకులు ఫిక్స్‌డ్ డిపాజిట్లపై మంచి వడ్డీ రేట్లు అందిస్తున్నాయి. 60 సంవత్సరాలు దాటిన వారికి అదనపు వడ్డీ ఆఫర్ చేస్తుంటాయి. ఎలాంటి రిస్క్ లేకుండా స్థిర రాబడి కోరుకునే వారు, ముఖ్యంగా సీనియర్ సిటిజన్లు ఫిక్స్‌డ్ డిపాజిట్లను ఎంచుకుంటున్నారు. స్టాక్స్, మ్యూచువల్ ఫండ్స్‌తో పోలిస్తే వీటిల్లో రాబడి తక్కువగా ఉన్నప్పటికీ తమ డబ్బులకు భద్రత ఉంటుందని వీటిని ఎంచుకుంటున్నారు. ఫిక్స్‌డ్ డిపాజిట్లపై వడ్డీ రేట్లు మెచ్యూరిటీ టెన్యూర్ ఆధారంగా మారుతుంటాయి. ప్రస్తుతం ఏ బ్యాంకులో వడ్డీ రేట్లు అధికంగా ఉన్నాయో తెలుసుకుని డిపాజిట్ చేయడం ద్వారా అదనపు రాబడి అందుకోవచ్చు.

 ప్రశ్న: నా వయసు 65 సంవత్సరాలు. ప్రస్తుతం నా దగ్గర ఉన్న రూ.20 లక్షలు బ్యాంకులో ఫిక్స్‌డ్ డిపాజిట్ చేయాలనుకుంటున్నాను. అధిక వడ్డీ రేటు పొందితే నెలకు ఎంత వడ్డీ లభిస్తుంది? ఇప్పుడు ఏ బ్యాంకులో మంచి వడ్డీ రేట్లు ఉన్నాయి?

సమాధానం: సీనియర్ సిటిజన్లకు బ్యాంకులు మంచి వడ్డీ రేట్లు కల్పిస్తుంటాయి. జనరల్ కస్టమర్లతో పోలిస్తే 50 బేసిస్ పాయింట్ల వరకు వడ్డీ అదనంగా ఇస్తాయి. అయితే, రిజర్వ్ బ్యాంక్ ఆఫ్ ఇండియా ఈ ఏడాదిలో మూడు సార్లు వడ్డీ రేట్లు తగ్గించింది. దీంతో చాలా బ్యాంకులు ఫిక్స్‌డ్ డిపాజిట్లపై వడ్డీ రేట్లు తగ్గించాయి. ఎస్‌బీఐ, హెచ్‌డీఎఫ్‌సీ వంటి బ్యాంకుల్లో వడ్డీ రేట్లు 8 శాతం లోపే ఉన్నాయి. అయితే, పలు స్మాల్ ఫైనాన్స్ బ్యాంకులు 8 శాతానికి పైగా వడ్డీ రేట్లు ఆఫర్ చేస్తున్నాయి. ప్రస్తుతం సీనియర్ సిటిజన్లకు సూర్యోదయ స్మాల్ ఫైనాన్స్ బ్యాంక్ 8.40 శాతం వడ్డీ ఆఫర్ చేస్తోంది. దీని ప్రకారం నెలకు ఎంత వడ్డీ వస్తుందో అంచనా వేద్దాం.

5 ఏళ్ల మెచ్యూరిటీ పీరియడ్‌పై 8.40 శాతం వడ్డీ రేటుతో రూ.20 లక్షలు ఫిక్స్‌డ్ డిపాజిట్ చేస్తే ఎంతొస్తుందో ఆన్‌లైన్ కాలిక్యులేటర్ ద్వారా అంచనా వేయవచ్చు. దీని ప్రకారం 5 ఏళ్ల తర్వాత వడ్డీ రూ.10,30,700 వరకు వస్తుంది. అంటే ఏడాదికి రూ.2 లక్షలు వడ్డీ లభిస్తుంది. నెలకు రూ.16,660 వరకు వడ్డీ వస్తుంది. మొత్తంగా 5 ఏళ్ల తర్వాత చేతికి రూ.30,30,700 వరకు అందుతాయి. అయితే స్మాల్ ఫైనాన్స్ బ్యాంకులో భద్రతపై చాలా మంది డిపాజిటర్లు ఆందోళన చెందుతుంటారు. అయితే, రూ.5 లక్షల వరకు అయితే డిపాజిట్ ఇన్సూరెన్స్ క్రెడిట్ గ్యారెంటీ స్కీమ్ ద్వారా బీమా కవరేజీ ఉంటుంది. ఇది ఏ బ్యాంకులోనైనా గరిష్ఠ పరిమితి ఇంతే. చిన్న బ్యాంకుల్లో డబ్బులు పెట్టడం సురక్షితం కాదు అనుకునే వారు ఎస్‌బీఐ వంటి పెద్ద బ్యాంకులను ఎంచుకోవడం మంచిది.