భారత్‌తో మ్యాచ్‌లో అతి చేసిన పాక్ ఆటగాళ్లు.. ఐసీసీ కఠిన చర్యలు

ఆసియాకప్ 2025లో భారత్, పాకిస్థాన్ ఫైనల్‌కు ముందు అంతర్జాతీయ క్రికెట్ కౌన్సిల్ ( ఐసీసీ ) కీలక నిర్ణయం తీసుకుంది. ఆసియాకప్ 2025లో లీగ్ స్టేజ్, సూపర్‌-4 మ్యాచ్‌లో నిబంధనలు అతిక్రమించిన భారత్, పాకిస్థాన్ ఆటగాళ్లపై చర్యలు తీసుకుంది. టీమిండియా కెప్టెన్ సూర్యకుమార్ యాదవ్ , పాకిస్థాన్ ఆటగాళ్లు సాహిబ్‌జాదా ఫర్హాన్, హారిస్ రవూఫ్‌పై చర్యలు చేపట్టింది. దీంతో ఫైనల్‌ మ్యాచ్‌కు ముందు ఉద్రిక్తతలు తగ్గించే ప్రయత్నం చేసింది.

 గత ఆదివారం భారత్‌తో జరిగిన సూపర్‌-4 మ్యాచ్‌లో పాకిస్థాన్ ఆటగాళ్లు రెచ్చగట్టే ప్రయత్నం చేశారు. ఈ మ్యాచ్‌లో బౌండరీ లైన్ వద్ద ఫీల్డింగ్ చేస్తూ.. పాకిస్థాన్ పేసర్ హరీస్ రవూఫ్ అతి చేశాడు. భారత్‌కు చెందిన 6 రఫెల్ జెట్ ఫ్లైట్స్‌‌ను కూల్చామని, యుద్దంలో తమదే విజయమని పేర్కొంటూ 6-0 సంజ్ఞలు చేశాడు రవూఫ్‌. అంతకు ముందు విమానాన్ని కూల్చేసినట్లు కూడా సైగలు చేశాడు. దీనిపై బీసీసీఐ.. ఐసీసీకి ఫిర్యాదు చేసింది. ఈ నేపథ్యంలో క్రికెట్‌ మైదానంలో అనుచితంగా ప్రవర్తించినందుకు అతడి మ్యాచ్‌ ఫీజులో 30% కోత విధించిన ఐసీసీ.

ఇక ఇదే మ్యాచ్‌లో బ్యాటింగ్ చేస్తూ హాఫ్ సెంచరీ చేశాక పాక్ బ్యాటర్‌ సాహిబ్‌జాదా ఫర్హాన్ బహిరంగంగా తుపాకీ కాల్పులు జరిపినట్లు సంజ్ఞలు చేశాడు. దీనిపై కూడా ఐసీసీ చర్యలు చేపట్టింది. ఇంకోసారి ఇలాంటి చేష్టలకు పాల్పడితే కఠిన చర్యలు తప్పవని అతడిని హెచ్చరించి వదిలేసింది.

మరోవైపు గ్రూప్ స్టేజ్‌ మ్యాచ్‌లో పాకిస్థాన్‌ను ఓడించిన తర్వాత టీమిండియా కెప్టెన్ సూర్యకుమార్ యాదవ్ మాట్లాడాడు. టీమిండియా.. పాకిస్థాన్‌పై సాధించిన విజయాన్ని ఫహల్గాం ఉగ్రదాడి బాధితులు, సైనికులకు అంకితమిస్తున్నట్లు భారత కెప్టెన్‌ ప్రకటించాడు. దీంతో మ్యాచ్‌లో రాజకీయ ప్రసంగాలు చేశాడని.. పీసీబీ.. ఐసీసీకి ఫిర్యాదు చేసింది.

దీనిపై సూర్యకుమార్‌ యాదవ్‌ను ఐసీసీ విచారించింది. టోర్నీలో ఇకపై రాజకీయపరమైన వ్యాఖ్యలు చేయొద్దని ఐసీసీ అతడికి సూచించింది మ్యాచ్‌ ఫీజులో 30 శాతం కోత విధిస్తూ చర్యలు తీసుకుంది. ఆసియాకప్ 2025 ఫైనల్‌ భారత్, పాకిస్థాన్ మధ్య ఆదివారం జరగనుంది.