'భారత్‌ను సరిదిద్దాల్సిన అవసరం ఉంది'.. టారిఫ్‌ల వివాదం వేళ అమెరికా వాణిజ్య కార్యదర్శి కామెంట్లు

అమెరికా వాణిజ్య కార్యదర్శి హోవార్డ్ లుట్నిక్ ఇటీవల భారతదేశంపై చేసిన వ్యాఖ్యలు తీవ్ర దుమారాన్ని రేపుతున్నాయి. ట్రంప్ సహా తన అధికారులు భారత్‌పై వివాదాస్పద రీతిలో కామెంట్లు చేస్తున్నది చూస్తూనే ఉన్నాం. ఇప్పుడు తాజాగా మరో ఉన్నతాధికారి అదే తరహా వ్యాఖ్యలు చేయడం భారత్-అమెరికా మధ్య పెరుగుతున్న అంతరాన్ని సూచిస్తోంది. తాజాగా న్యూస్ నేషన్ అనే వార్తాసంస్థకు ఇచ్చిన ఇంటర్వ్యూలో అమెరికా వాణిజ్య కార్యదర్శి హోవార్డ్ లుట్నిక్ మాట్లాడుతూ, "భారత్ వంటి దేశాలను సరిదిద్దాల్సిన అవసరం ఉంది. అవి అమెరికాకు సరైన విధంగా స్పందించాలి. అమెరికన్ ఉత్పత్తులకు వారి మార్కెట్లను తెరవాలి. అమెరికాకు హాని కలిగించే చర్యలను ఆపాలి" అని వ్యాఖ్యానించారు. ఈ వ్యాఖ్యలు ఇరు దేశాల మధ్య వాణిజ్య ఉద్రిక్తతలను మరింత పెంచుతున్నాయి.

ట్రంప్ ప్రభుత్వ వాణిజ్య విధానాలను ప్రతిబింబిస్తూ లుట్నిక్ చేసిన ఈ వ్యాఖ్యలు, భారతదేశంపై అమెరికా పెంచుతున్న ఒత్తిడి ఎలా ఉందో చూపిస్తున్నాయి. ఇప్పటికే భారత్ వస్తువులపై అమెరికా 50 శాతం సుంకాలు విధించింది. ఇందులో 25% సుంకాలు, రష్యా నుంచి భారతదేశం చమురు కొనుగోలు చేస్తుండటాన్ని నిరసిస్తూ విధించిన పెనాల్టీ సుంకాలే.

ఈ నేపథ్యంలో లుట్నిక్ మాట్లాడుతూ, "రష్యా నుంచి చమురు కొనుగోలు చేయడం చాలా తప్పు. ఇది అమెరికా ప్రయోజనాలకు వ్యతిరేకం" అని విమర్శించారు. ఏ దేశమైనా అమెరికన్ వినియోగదారులకు వస్తువులను విక్రయించాలంటే, అది అమెరికా అధ్యక్షుడితో కలిసి పనిచేయాలని ఆయన నొక్కిచెప్పారు. ట్రంప్ హయాంలో మొదటి ఒప్పందానికే ఓకే చెప్పాలని, లేకపోతే తర్వాత చేసుకునే ఒప్పందాలు మరింత కఠినంగా ఉంటాయంటూ లుట్నిక్ హెచ్చరించారు.

భారత వాణిజ్య, పరిశ్రమల మంత్రి పీయూష్ గోయల్ నేతృత్వంలోని ఉన్నతస్థాయి బృందం ఇటీవల వాషింగ్టన్ పర్యటనకు వెళ్లిన నేపథ్యంలో లుట్నిక్ చేసిన ఈ వ్యాఖ్యలు ప్రాధాన్యత సంతరించుకున్నాయి. ఇరు దేశాల మధ్య వాణిజ్య చర్చలు పునఃప్రారంభమైనప్పటికీ, అమెరికా సంతృప్తి చెందనట్లు లుట్నిక్ మాటలను బట్టి తెలుస్తోంది.

మరోవైపు, భారత ప్రభుత్వం మాత్రం.. దేశీయ వ్యవసాయ రంగాన్ని, ఇంధన భద్రతను కాపాడుకోవాల్సిన బాధ్యతను, అవసరాన్ని నొక్కిచెబుతోంది. ఇరు దేశాలకు పరస్పర ప్రయోజనాలు కలిగించే వాణిజ్య ఒప్పందానికి సిద్ధంగా ఉన్నామని, అయితే తమ జాతీయ ప్రయోజనాల విషయంలో రాజీ పడబోమని మోదీ సర్కారు ఖరాకండిగా చెప్పేసింది.