టీ20ల్లో కివీస్‌ను చిత్తుచిత్తుగా ఓడించిన ఆస్ట్రేలియా

టీ20 క్రికెట్‌లో ఆస్ట్రేలియా మళ్లీ పూర్వ వైభవాన్ని తీసుకొచ్చే ప్రయత్నం చేస్తోంది. మరికొద్ది నెలల్లో టీ20 వరల్డ్ కప్ ఉండటంతో.. పొట్టి ఫార్మాట్ సిరీస్‌లపై దృష్టి పెట్టిన ఆ జట్టు తమ సత్తా చాటుతోంది. న్యూజిలాండ్ వేదికగా జరిగిన మొదటి టీ20లో కివీస్ ఇచ్చిన భారీ టార్గెట్‌ను ఊదేసింది. న్యూజిలాండ్ బ్యాటర్ సెంచరీ చేసినప్పటికీ ప్రయోజనం లేకుండా పోయింది.

బే ఓవల్ స్టేడియం వేదికగా జరిగిన మ్యాచ్‌లో టాస్ గెలిచిన ఆస్ట్రేలియా జట్టు బౌలింగ్ ఎంచుకుంది. తొలుత బ్యాటింగ్ చేసిన న్యూజిలాండ్ జట్టు నిర్ణీత 20 ఓవర్లలో 6 వికెట్ల నష్టానికి 181 పరుగులు చేసింది. ఓపెనర్లు సైఫర్టీ, కాన్వే సింగిల్ డిజిట్స్‌కే పెవిలియన్ బాట పట్టారు. ఆ తర్వాత వచ్చిన ఛాప్‌మన్ కూడా డకౌట్ అయ్యాడు.. దాంతో కివీస్ ఆరు పరుగులకే మూడు వికెట్లు కోల్పోయింది.

టిమ్ రాబిన్‌సన్ , డారెల్ మిచెల్ కలిసి న్యూజిలాండ్ స్కోర్ బోర్డును ముందుకు నడిపించారు. ఈ ఇద్దరు కలిసి నాలుగో వికెట్‌కు 92 పరుగుల భాగస్వామ్యం నెలకొల్పారు. 23 బంతుల్లో 34 పరుగులు చేసిన మిచెల్ అవుటైన తర్వాత రాబిన్‌సన్ స్పీడు పెంచాడు. 66 బంతుల్లో 6 ఫోర్లు, ఐదు సిక్సర్లతో 106 పరుగులతో రాబిన్‌సన్ నాటౌట్‌గా నిలవడంతో కివీస్ 181 పరుగులు చేసింది.

న్యూజిలాండ్ నిర్దేశించిన 182 పరుగుల లక్ష్యంతో బరిలోకి దిగిన ఆస్ట్రేలియా ఆరంభం నుంచే విధ్వంసం సృష్టించింది. మిచెల్ మార్ష్ , ట్రావిస్ హెడ్ తొలి వికెట్‌కు 67 పరుగుల భాగస్వామ్యం నెలకొల్పారు. హెడ్ 31 పరుగులు చేసి అవుటవ్వగా.. కెప్టెన్ మార్ష్ కివీస్ బౌలర్లను ఉతికారేశాడు. ఆఖర్లో టిమ్ డేవిడ్ విధ్వంసంతో ఆసీస్ కేవలం 16.3 ఓవర్లలోనే విజయం సాధించింది. మిచ్ మార్ష్ 43 బంతుల్లో 9 ఫోర్లు, ఐదు సిక్సర్లతో 85 పరుగులు చేయగా, టిమ్ డేవిడ్ 12 బంతుల్లో 21 పరుగులతో నాటౌట్‌గా నిలిచాడు. మూడు మ్యాచ్‌ల టీ20 సిరీస్‌లో ఆసీస్ 1-0తో లీడ్‌లో ఉంది.