పాత రికార్డులను ఊదేశాడు,,,ర్యాంకింగ్స్‌లో అభిషేక్ శర్మ వరల్డ్ రికార్డ్

టీమిండియా టీ20 డైనమైట్ అభిషేక్ శర్మ వరల్డ్ రికార్డులను బద్దలుకొట్టాడు. ఆసియా కప్‌లో అద్భుత ప్రదర్శన చేసిన ఈ యువ ఓపెనర్ ఐసీసీ టీ20 ర్యాంకింగ్స్‌లో చరిత్ర సృష్టించాడు. 25 ఏళ్ల అభిషేక్ శర్మ 931 రేటింగ్ పాయింట్లు సాధించి, 2020లో ఇంగ్లండ్‌ ఆటగాడు డేవిడ్ మలాన్ నమోదు చేసిన 919 పాయింట్ల రికార్డును అధిగమించాడు. అంతే కాకుండా, టీ20 ఫార్మాట్‌లో భారత దిగ్గజం విరాట్ కోహ్లీ క్రియేట్ చేసిన 909 పాయింట్ల రికార్డును కూడా దాటేశాడు.

 ఆసియా కప్‌లో అద్భుతంగా రాణించిన అభిషేక్, ఏడు మ్యాచ్‌ల్లో 314 పరుగులు సాధించాడు. 45 యావరేజ్‌తో రన్స్ చేయడమే కాకుండా, దాదాపు 200 స్ట్రయిక్‌రేట్‌తో ప్రత్యర్థి బౌలర్లపై విరుచుకుపడ్డాడు. ఆసియా కప్ ప్రదర్శనతో అభిషేక్ శర్మ తన మొదటి ర్యాంకింగ్‌ను నిలబెట్టుకున్నాడు.

సూపర్ ఫోర్ మ్యాచ్‌లో శ్రీలంకపై ఆడిన 61 పరుగుల ఇన్నింగ్స్ అనంతరం అభిషేక్ శర్మ రేటింగ్ 931కి చేరుకుంది. అంతకుముందు బంగ్లాదేశ్‌పై ఆడిన 75 పరుగుల ఇన్నింగ్స్ అతని ధీటైన ఫామ్‌కు నిదర్శనం. ఫైనల్లో పాకిస్తాన్ బౌలర్ ఫహీమ్ అష్రఫ్ బౌలింగ్‌లో కేవలం 5 పరుగులకే అవుట్ అయినా, అప్పటికే ర్యాంకింగ్స్‌లో అగ్రస్థానం అభిషేక్ ఖాతాలోకి వచ్చేసింది.

ఆసియా కప్‌లో మరో భారత యువ బ్యాట్స్‌మన్ తిలక్ వర్మ కూడా ఆకట్టుకున్నాడు. శ్రీలంకపై 49 నాటౌట్, ఫైనల్‌లో పాకిస్తాన్‌పై 69 పరుగులు చేసి చేసి 28 పాయింట్లు సాధించి మూడో స్థానంలో నిలిచాడు. ఇంగ్లండ్ ఆటగాడు ఫిల్ సాల్ట్ (844) కంటే కేవలం 25 పాయింట్లు వెనుకబడ్డాడు. అయితే, కెప్టెన్ సూర్యకుమార్ యాదవ్ మాత్రం నిరాశ కలిగించాడు. ఆరు ఇన్నింగ్స్‌ల్లో కేవలం 72 పరుగులు మాత్రమే చేయడంతో ఎనిమిదో స్థానానికి పడిపోయాడు. బౌలర్ల విభాగంలో కుల్దీప్ యాదవ్ తొమ్మిది స్థానాలు ఎగబాకి 12వ స్థానంలోకి చేరుకున్నాడు.

భారత జట్టు కొత్త టీ20 వ్యూహంలో అభిషేక్ శర్మ కీలక పాత్ర పోషిస్తున్నాడు. వరల్డ్‌కప్ విజయానంతరం దూకుడైన ఆరంభాలతో భారత జట్టుకు కొత్త టెంప్లేట్ ఇచ్చాడు. ఆసియా కప్‌లోనూ అదే దూకుడు కొనసాగించి రికార్డు స్థాయిలో ర్యాంకింగ్స్‌ను అధిరోహించాడు. అభిషేక్ శర్మ సాధించిన 931 రేటింగ్ పాయింట్లు టీ20 క్రికెట్ చరిత్రలో ఇప్పటి వరకు ఎవ్వరూ సాధించకపోవడం విశేషం.