బీసీసీఐకి క్షమాపణలు చెప్పిన మొహ్సిన్ నక్వీ

ఆసియా కప్ ఫైనల్‌ అనంతరం ట్రోఫీ, మెడల్స్ అప్పగింతలో చోటుచేసుకున్న గందరగోళం కొత్త దిశగా దూసుకెళ్తోంది. ఆసియా క్రికెట్ కౌన్సిల్ (ఏసీసీ) అధ్యక్షుడు, పాకిస్తాన్ క్రికెట్ బోర్డు చైర్మన్ మొహ్సిన్ నక్వీ సెప్టెంబర్ 28న జరిగిన అవార్డు కార్యక్రమం చుట్టూ ఏర్పడిన గందరగోళానికి బీసీసీఐకి క్షమాపణలు తెలిపాడు. కానీ, ట్రోఫీ అప్పగింత విషయమై ఆయన పెట్టిన కొత్త షరతులు మరోసారి వివాదానికి దారితీశాయి.

నేషనల్ మీడియా కథనాల మేరకు.. సెప్టెంబర్ 30న జరిగిన ఏసీసీ సమావేశంలో నక్వీ తన వైఖరిని మార్చుకున్నాడు. ట్రోఫీని భారత జట్టుకు ఇవ్వాలంటే కెప్టెన్ సూర్యకుమార్ యాదవ్ స్వయంగా దుబాయ్‌లోని ఏసీసీ కార్యాలయానికి వచ్చి స్వీకరించాల్సిందేనని సూచించాడు. ఈ ప్రతిపాదనను భారత క్రికెట్ బోర్డు ( బీసీసీఐ ) తీవ్రంగా వ్యతిరేకించింది. ఫైనల్ రాత్రి అలాంటి నిబంధన లేదని, కౌన్సిల్ ప్రోటోకాల్ ప్రకారం మాత్రమే ట్రోఫీ ఇవ్వాలని బీసీసీఐ స్పష్టం చేసింది.

బీసీసీఐ వైస్ ప్రెసిడెంట్ రాజీవ్ శుక్లా మాట్లాడుతూ “ట్రోఫీ కౌన్సిల్‌ది, ఎవరైనా వ్యక్తిగతంగా సొంతం చేసుకునే విషయం కాదు. సరైన హ్యాండోవర్ లేకుండా నక్వీ ట్రోఫీ, మెడల్స్ తన వెంట తీసుకెళ్లడం తప్పు” అని వ్యాఖ్యానించాడు. ఇదే సమయంలో బీసీసీఐ సెక్రటరీ దేవజిత్ సైకియా కూడా తీవ్ర స్థాయిలో స్పందించారు. “ఏసీసీ చైర్మన్ అయిన పాకిస్తాన్ సీనియర్ నేత చేతుల నుంచి ట్రోఫీ స్వీకరించకూడదనేదే మా నిర్ణయం. అయితే, ట్రోఫీని ఆయన దగ్గరే ఉంచుకునే హక్కు లేదు. ట్రోఫీ, మెడల్స్ వెంటనే భారత్‌కు అప్పగించాలి” అని సైకియా అన్నారు.

ఈ పరిణామాలు ఆసియా కప్ ముగిసిన వారం రోజులకే మరోసారి భారత్ - పాక్ క్రికెట్ సంబంధాలను కఠిన స్థితికి నెట్టాయి. నక్వీ క్షమాపణ చెప్పినా, ట్రోఫీని తిరిగి అప్పగించకపోవడం వల్ల వివాదం సద్దుమణగలేదు. ట్రోఫీ అప్పగింత ఒక సాధారణ కార్యక్రమం మాత్రమే అయినా, దానిని వ్యక్తిగతంగా తీసుకోవడం లేదా రాజకీయ రంగు పులుముకోవడం క్రీడా విలువలకు విరుద్ధం.

నక్వీ పెట్టిన షరతు ప్రొటోకాల్‌ను ‘పవర్ ప్లే’గా మార్చిందని విశ్లేషకులు అభిప్రాయపడుతున్నారు. ఇప్పటికీ ట్రోఫీ ఎప్పుడు, ఎలా భారత్‌కు అప్పగిస్తారో అన్న ప్రశ్నకు సమాధానం స్పష్టంగా లేదు. క్షమాపణ ఉన్నా, ట్రోఫీ అప్పగింత జరగనంత వరకు ఈ వివాదం ముగిసేలా కనిపించడం లేదు.