యూపీఐ పేమెంట్లపై ఛార్జీలు.. క్లారిటీ ఇచ్చేసిన ఆర్‌బీఐ

యూనిఫైడ్ పేమెంట్స్ ఇంటర్‌ఫేస్ (యూపీఐ) లావాదేవీలు భారీగా పెరిగాయి. దేశీయ డిజిటల్ చెల్లింపుల్లో 80 శాతం మేర యూపీఐ ద్వారానే జరుగుతున్నట్లు గణాంకాలు చెబుతున్నాయి. ఈ క్రమంలోనే ఫోన్ పే, గూగుల్ పే, పేటీఎం వంటి యూపీఐ యాప్స్ పేమెంట్లకు సైతం ఛార్జీలు విధించాలని నిర్ణయించినట్లు వార్తలు వచ్చాయి. దీనిపై యూజర్లలో చాలా సందేహాలు ఉండేవి. తాజాగా ఈ విషయంపై క్లారిటీ వచ్చేసింది. రిజర్వ్ బ్యాంక్ ఆఫ్ ఇండియా బుధవారం క్లారిటీ ఇచ్చింది. యూపీఐ లావాదేవీలపై ఎలాంటి ఛార్జీలు విధించే ప్లాన్ లేదని ఆర్బీఐ తేల్చేసింది.

యూపీఐ ప్లాట్ ఫామ్ ట్రాన్సాక్షన్లకు ఫీ వసూలు చేసే అంశాన్ని ఇప్పటికైతే తాము పరిశీలించడం లేదని, వినియోగదారులకు ఈ సేవలు ఉచితంగానే కొనసాగుతాయని రిజర్వ్ బ్యాంక్ గవర్నర్ సంజయ్ మల్హోత్రా స్పష్టం చేశారు. డిజిటల్ పేమెంట్లకు అదనపు ఛార్జీలు విధించడంపై వచ్చిన సందేహాలను తిప్పికొట్టారు. ఆర్బీఐ మానీటరీ పాలసీ కమిటీ సమావేశం అనంతరం విలేకరుల సమావేశంలో పలు విషయాలపై మాట్లాడారు. ప్రస్తుత విధానంలో యూపీఐ సేవలు పూర్తి ఉచితంగానే ఉంటాయని హామీ ఇచ్చారు. ప్రభుత్వం, ఆర్బీఐ కలిసి యూపీఐని జీరో కాస్ట్ ప్లాట్ ఫారంగా కొనసాగించాలని దృఢ సంకల్పంతో ఉన్నట్లు గవర్నర్ సంజయ్ మల్హోత్రా మరోసారి స్పష్టం చేశారు.

యూపీఐ ట్రాన్సాక్షన్లు కొత్త రికార్డులు సృష్టిస్తున్నాయి. ఈ సమయంలో రిజర్వ్ బ్యాంక్ క్లారిటీ ఇవ్వడం ప్రాధాన్యం సంతరించుకుంది. ప్రపంచంలోనే అతిపెద్ద రియల్ టైమ్ పేమెంట్స్ మార్కెట్‌గా ఇండియా స్థానం మరింత బలపడుతోందని ఆర్‌బీఐ గవర్నర్ మల్హోత్రా అన్నారు. మరోవైపు.. వరుసగా రెండోసారి రెపో రేటును యథాతథంగా 5.5 శాతం వద్ద కొనసాగించాలని నిర్ణయించినట్లు తెలిపారు. అమెరికా సుంకాలు, అంతర్జాతీయ అనిశ్చితులు వంటి కారణాలతో వడ్డీ రేట్ల కోతను వాయిదా వేస్తున్నట్లు నిపుణులు చెబుతున్నారు. అయితే, ద్రవ్యోల్బణం అదుపులోనే ఉన్న క్రమంలో ఈసారి 25 బేసిస్ పాయింట్లు వడ్డీ తగ్గించవచ్చన్న అంచనాలు ఉండేవి. కానీ, అంచాలకు భిన్నగా ఆర్‌బీఐ వడ్డీ రేట్లను యథాతథంగా కొనసాగించింది.