మాజీ ఎన్ఎస్‌జీ కమాండో భారీ గంజాయి దందా

ముంబయిలో 2008లో జరిగిన పేళుళ్లలో ఉగ్రవాదులతో వీరోచితంగా పోరాడి.. హీరోగా నిచిలిన ఓ మాజీ నేషనల్ సెక్యూరిటీ గార్డ్ (ఎన్ఎస్‌జీ) కమాండో క్రిమినల్‌గా మారాడు. భారీ నేర సామ్రాజ్యాన్ని స్థాపించినట్లు పోలీసులు తెలిపారు. దేశవ్యాప్తంగా పెద్ద నెట్‌వర్క్‌ను ఏర్పాటు చేసుకుని.. డ్రగ్స్ దందా చేస్తున్నట్లు పేర్కొన్నారు. యాంటీ టెర్రరిస్ట్ స్క్వాడ్ (ATS), యాంటీ నార్కొటిక్స్ టాక్స్ ఫోర్స్ (ANTF) బుధవారం సంయుక్తంగా చేపట్టిన ఆపరేషన్‌లో మాజీ ఎన్ఎస్‌జీ కమాండో బజరంగ్ సింగ్‌ను అరెస్ట్ చేశారు. అతడి వద్ద నుంచి 200 కిలోల డ్రగ్స్ స్వాధీనం చేసుకున్నట్లు పోలీసుల తెలిపారు.

ఏడేళ్లు NSG కమాండోగా..

రాజస్థాన్‌కు చెందిన బజరంగ్ సింగ్.. 10వ తరగతి తర్వాత చదువు మానేశాడు. సైన్యంపై మక్కువతో బోర్డర్ సెక్యూరిటీ ఫోర్స్‌ (బీఎస్ఎఫ్)లో చేరాడు. ఆ తర్వాత ఎన్ఎస్‌జీకి ఎంపిక అయ్యాడు. ఎన్ఎస్‌జీలో ఏడేళ్ల పాటు విధులు నిర్వర్తించాడు. 2008లో ముంబయిలో ఉగ్రదాడులు జరిగిన సమయంలో.. ఉగ్రవాదులపై ఎన్ఎస్‌జీ చేపట్టిన ఆపరేషన్‌లో భాగమయ్యాడు. బజరంగ్ సింగ్‌కు రాజకీయాలపై ఆసక్తి ఉండేది. దీంతో 2021లో తన భార్యను స్థానిక ఎన్నికల్లో పోటీకి దింపాడు. ఎన్నికల్లో ఆమె ఓటమి చెందినా.. రాజకీయ నాయకులతో బజరంగ్‌కు పరిచయాలు అయ్యాయి.

  ఒడిశా, రాజస్థాన్‌లో ఉన్న క్రిమినల్ నెట్‌వర్క్‌లతో సంబంధాలను ఏర్పరచుకోవడానికి.. బజరంగ్ సింగ్ ఆ పరిచయాలను ఉపయోగించుకున్నాడని పోలీసులు తెలిపారు. అనంతరం వారితో కలిసి భారీగా గంజాయి స్మగ్లింగ్ చేసేవాడని వెల్లడించారు. తెలంగాణ, ఒడిశా నుంచి గంజాయిని రాజస్థాన్‌కు తరలించేవాడని పోలీసుల దర్యాప్తులో తేలింది. చిన్న చిన్న పార్సిళ్లు కాకుండా.. భారీ స్థాయిలో డ్రగ్స్ రాష్ట్రాలు సరిహద్దులు దాటించేవాడని పోలీసులు వెల్లడించారు. అయితే ఇప్పటికే అతడిపై రూ.25వేల రివార్డు కూడా ఉందని తెలిపారు. ఎన్‌ఎస్‌జీలో పొందిన అత్యుత్తమ ట్రైనింగ్‌ను తన డ్రగ్ నెట్వర్క్ విస్తరించేందుకు ఉపయోగించుకున్నాడని చెప్పారు.

ఆ అలవాటే పట్టించింది!

అతడిని పట్టుకునే క్రమంలో తప్పించుకుని తిరిగాడని పోలీసులు తెలిపారు. అరెస్ట్ చేయకుండా దాదాపు రెండు నెలలు.. గుర్తింపును మార్చుకుంటూ మారుమూల గ్రామాల్లో తిరిగాడని వెల్లడించారు. దీంతో భద్రతా ఏజెన్సీలు టెక్నికల్ ఇంటెలిజెన్స్, క్షేత్ర స్థాయిలో సమాచారంతో అతడిని ట్రాక్ చేశాయని తెలిపారు. బజరంగ్ సింగ్‌కు ఉన్న ఒక ప్రత్యేక అలవాటే అతడిని పట్టించిందని చెప్పారు. ఎక్కడికి వెళ్లినా తన వెంట ఒక వంట వాడిని తీసుకెళ్లేవాడని.. ఆ కుక్‌ కదలికలపై నిఘా పెట్టడంతో రతన్‌గఢ్‌లో బజరంగ్‌ నక్కినట్లు గుర్తించిట్లు తెలిపాడు. బజరంగ్ సింగ్‌ను గుర్తించిన పోలీసులు.. వెంటనే అతడిని అరెస్ట్ చేయలేదు. మాజీ కమాండో ప్రమాదకరమని గ్రహించిన పోలీసులు.. అతడి రహస్య స్థావరాలను అనుసరించారు. పక్కా ప్లాన్‌తో దాడి చేసి అరెస్ట్ చేశారు.