సీనియర్లకు బెస్ట్ స్కీమ్.. ఈ 8 ప్రయోజనాలు

కేంద్ర ప్రభుత్వం చాలా రకాల సంక్షేమ, పొదుపు పథకాలు అందిస్తోంది. సీనియర్ సిటిజన్లకు ఆర్థిక భరోసా ఉండేలా అద్భుతమైన పొదుపు పథకాన్ని అందిస్తోంది. అదే సీనియర్ సిటిజన్ సేవింగ్స్ స్కీమ్. ఇది ఒక సురక్షితమైన, ప్రభుత్వ హామీ ఉన్న పెట్టుబడి మార్గం. పదవీ విరమణ పొందిన వారికి ఒక బెస్ట్ ఆప్షన్ అని చెప్పవచ్చు. ఈ ఆర్థిక సంవత్సరం 2025-26లో అత్యధికంగా 8.2 శాతం మేర వడ్డీ లభిస్తోంది. అంతే కాదు ట్యాక్స్ బెనిఫిట్స్ సైతం ఉంటాయి. మరి ఆ వివరాలు తెలుసుకుందాం.

ఎస్‌సీఎస్ఎస్ ఫీచర్స్

ఈ స్కీమ్ 5 సంవత్సరాల టెన్యూర్ ఉంటుంది. ఆ తర్వాత 3 సంవత్సరాలు పొడిగించుకోవచ్చు.

ప్రస్తుతం ఈ స్కీమ్‌పై 8.2 శాతం వడ్డీ ఇస్తున్నారు. 2023 నుంచి ఇదే వడ్డీ రేటు కొనసాగుతోంది.

ఇందులో కనీసం రూ.1000 నుంచి గరిష్ఠంగా రూ.30 లక్షల వరకు ఇన్వెస్ట్ చేయవచ్చు.

వ్యక్తిగతంగా లేదా జీవిత భాగస్వామితో జాయింట్ ఖాతా తీసుకోవచ్చు.

ప్రీమెచ్యూర్ క్లోజ్ చేస్తే పెనాల్టీ ఉంటుంది.

అర్హతలు ఇవే

60 సంవత్సరాల వయసు దాటిన భారత పౌరులు ఈ స్కీమ్‌లో చేరవచ్చు.

పదవీ విరమణ చేసిన వారు (55-60 ఏళ్ల మధ్యలో) ఉంటే రిటైర్మెంట్ బెనిఫిట్ రిసిప్ట్ అందుకున్న నెల రోజుల్లో చేరాలి.

50 ఏళ్లు దాటిన రక్షణ రంగంలోని వారికి అర్హత ఉంటుంది.

ఎన్ఆర్ఐలు, హిందూ అవిభాజ్య కుటుంబాలకు అర్హత ఉండదు.

ట్యాక్స్ బెనిఫిట్స్

సీనియర్ సిటిజన్ సేవింగ్స్‌ ద్వారా ట్యాక్స్ బెనిఫిట్స్ ఉంటాయి. ఇన్‌కమ్ ట్యాక్స్ చట్టం 1961లోని సెక్షన్ 80సీ కింద రూ.1.50 లక్షల వరకు ట్యాక్స్ డిడక్షన్ క్లెయిమ్ చేసుకోవచ్చు. అయితే, వడ్డీపైన మాత్రం ట్యాక్స్ ఉంటుంది. పరిమితికి మించి వడ్డీ వస్తే టీడీఎస్ కట్ చేస్తారు. పన్ను పరిధిలో లేని సీనియర్ సిటిజన్లు ఫారం 15హెచ్ సమర్పించి వడ్డీపై ట్యాక్స్ తప్పించుకోవచ్చు.

ఏ డాక్యుమెంట్లు కావాలి

సీనియర్ సిటిజన్ సేవింగ్స్ స్కీమ్ అకౌంట్ తెరిచేందుకు కొన్ని డాక్యుమెంట్లు అవసరమవుతాయి. అందులో ఆధార్ కార్డు, పాన్ కార్డు, ఓటర్ ఐడీ లేదా పాస్ పోర్ట్ వంటివి కేవైసీ ప్రూఫ్స్‌ ఇవ్వాలి. ఇక యుటిలిటీ బిల్లులు అడ్రస్ ప్రూఫ్ గా ఇవ్వాలి. అలాగే సీనియర్ సిటిజన్ కార్డు లేదా బర్త్ సర్టిఫికెట్ ఇవ్వాల్సి ఉంటుంది. పాస్‌పోర్ట్ సైతం ఫోటోలు ఇవ్వాలి.

అకౌంట్ ఎలా తెరవాలి

ఎస్‌సీఎస్ఎస్ అకౌంట్ ప్రారంభించేందుకు పోస్టాఫీసు లేదా ఆథరైజ్డ్ బ్యాంక్ బ్రాంచుకు వెళ్లాలి. ఫారం ఏ నింపి దాంతో పాటు కావాల్సిన డాక్యుమెంట్లు ఇవ్వాలి. డిపాజిట్ అమౌంట్ సైతం ఇవ్వాలి. అలాగే నామినీ వివరాలు సమర్పించాలి.

ముఖ్యమైన అంశాలు

సీనియర్ సిటిజన్ సేవింగ్స్ స్కీమ్ సురక్షితమైన, స్థిరమైన రాబడులు అందిస్తోంది. అయితే, ఇందులో కొన్ని పరిమితులు ఉన్నాయి. ఇందులో వచ్చే వడ్డీపై ట్యాక్స్ ఉంటుంది. అలాగే గరిష్ఠంగా రూ.30 లక్షల వరకే పెట్టుబడి పెట్టవచ్చు. ప్రీమెచ్యూర్ క్లోజర్ చేస్తే పెనాల్టీ 1 శాతం నుంచి 1.5 శాతం వరకు ఉంటుంది.

ఖాతాదారు మరణిస్తే ఎలా?

ఒక వేళ ఖాతాదారు మరణిస్తే నామినీ లేదా చట్టపరమైన వారసుడు ఖాతా క్లోజింగ్ కోసం అప్లై చేయవచ్చు. మరణించిన తేదీ వరకు వడ్డీ చెల్లిస్తారు. ఇలాంటి కేసుల్లో ప్రీమెచ్యూర్ క్లోజర్ పై ఎలాంటి ఛార్జీలు ఉండవు.