జపాన్ తొలి మహిళా ప్రధానిగా సనే తకైచి

జపాన్ పాలక పక్షం అయిన లిబరల్ డెమోక్రాటిక్ పార్టీకి సనే తకైచి కొత్త నాయకురాలిగా ఎన్నికయ్యారు. శనివారం రోజు జరిగిన ఓటింగ్‌లో ఆమె విజయం సాధించగా.. తద్వారా మొదటి మహిళా ప్రధాన మంత్రి అయ్యే అవకాశం కనిపిస్తోంది. 64 ఏళ్ల తకైచి.. పార్టీ నాయకత్వ రేసులో మాజీ ప్రధాని జునిచిరో కొయిజూమి కుమారుడు, మితవాది అయిన 44 ఏళ్ల షింజిరో కొయిజూమిని ఓడించారు. ఐదుగురు అభ్యర్థులు పోటీపడిన ఈ రేసులో ఆమె ఏకైక మహిళా అభ్యర్థి. పదవీ విరమణ చేస్తున్న ప్రస్తుత ప్రధాని షిగేరు ఇషిబా వారసురాలిగా తకాయిచిని లాంఛనంగా ఎన్నుకోవడానికి అక్టోబర్ 15వ తేదీన పార్లమెంటులో ఓటింగ్ జరగనుంది.

పోరాటానంతర యుగంలో ఎక్కువ కాలం జపాన్‌ను పాలించిన ఎల్‌డీపీ, ఇషిబా నాయకత్వంలో పార్లమెంటు ఉభయ సభల్లోనూ తన మెజారిటీని కోల్పోయింది. ప్రస్తుతం తకైచి నాయకత్వం వహించనున్న పార్టీ చీలిపోయిన స్థితిలో ఉంది. పెరిగిన ధరలు, ఉదారమైన ఉద్దీపన కార్యక్రమాలు, కఠినమైన వలస నిబంధనలు అందించే ప్రతిపక్షాల వైపు ఆకర్షితులవుతున్న ప్రజలు.. ఈ అంశాలన్నీ ఆమె ముందు సవాళ్లుగా నిలిచాయి. తన విజయోత్సవ ప్రసంగంలో తకాయిచి.. ఓటర్ల ఆందోళనలను ఆశగా మార్చాలనుకుంటున్నానని ప్రకటించారు. బ్రిటన్ మాజీ ప్రధాని మార్గరెట్ థాచర్‌ను ఆమె తరచుగా తన రాజకీయ ఆదర్శంగా పేర్కొంటారు.

 మాజీ అంతర్గత వ్యవహారాల మంత్రి అయిన తకైచి.. బలమైన జాతీయవాద భావాలకు ప్రసిద్ధి చెందారు. దివంగత మాజీ ప్రధాని షింజో అబే ఆర్థిక కార్యక్రమం 'అబెనొమిక్స్' (భారీ ప్రభుత్వ వ్యయం, సులభతర ద్రవ్య విధానం)కు ఆమె గట్టి మద్దతుదారు. ఇటీవల బ్యాంక్ ఆఫ్ జపాన్ వడ్డీ రేట్ల పెంపుదలపై కూడా ఆమె విమర్శలు చేశారు. అలాగే అమెరికా అధ్యక్షుడు డొనాల్డ్ ట్రంప్‌తో కుదిరిన వాణిజ్య, పెట్టుబడి ఒప్పందాన్ని సమీక్షించే అవకాశం ఉందని సంకేతాలు ఇచ్చారు. 1993లో నారాలోని తన స్వస్థలం నుంచి పార్లమెంటుకు తొలిసారి ఎన్నికైన ఆమె.. ఆర్థిక భద్రతా మంత్రి వంటి ఉన్నత పదవుల్లో పని చేశారు. యవ్వనంలో హెవీ మెటల్ బ్యాండ్‌లో డ్రమ్మర్‌గా, మోటార్‌ సైకిల్ ఔత్సాహికురాలిగా ఉన్న తకాయిచి.. సాంప్రదాయ పార్టీ అభిప్రాయాలను బలంగా సమర్థించడం ద్వారా రాజకీయ జీవితాన్ని నిర్మించుకున్నారు.

రాజకుటుంబ వారసత్వం పురుషులకే పరిమితం చేయాలని ఆమె మద్దతిస్తారు. అలాగే సమలింగ వివాహాలను వ్యతిరేకిస్తారు. వివాహిత జంటలు వేర్వేరు ఇంటి పేర్లను ఉంచుకోవడానికి అనుమతించే చట్టపరమైన సంస్కరణలను కూడా ఆమె తిరస్కరిస్తారు. అయినప్పటికీ.. మహిళల ఆరోగ్య సమస్యలపై అవగాహన పెంచాలని కోరుతూ.. మెనోపాజ్‌తో తన పోరాటాల గురించి బహిరంగంగా మాట్లాడారు. జపాన్ యుద్ధ వీరులను గౌరవించే యసుకుని మందిరాన్ని తకాయిచి క్రమం తప్పకుండా సందర్శిస్తారు.

అంతేకాకుండా తైవాన్‌తో మరింత సన్నిహిత భద్రతా సంబంధాలకు మద్దతు తెలిపారు. ఆమె జాతీయవాద వైఖరి చైనా, దక్షిణ కొరియాలతో సంబంధాలను దెబ్బతీస్తుందని విమర్శకులు హెచ్చరిస్తున్నారు. దేశీయంగా ఆమె కఠినమైన విధానాలు మితవాద, బౌద్ధ మద్దతుగల కోమితో కూటమి పార్టీని కూడా కలవర పెట్టే అవకాశం ఉందని భావిస్తున్నారు. చూడాలి మరి ఏం జరగనుంది అనేది.