రెనాల్ట్‌ షాక్‌: 3వేల ఉద్యోగులకు గుడ్‌బై చెప్పేందుకు సిద్ధం! అసలేమైందంటే?

ఫ్రాన్స్‌కు చెందిన ప్రముఖ ఆటోమొబైల్ తయారీ సంస్థ రెనాల్ట్ (Renault) పెద్ద ఎత్తున ఉద్యోగుల తొలగింపు దిశగా అడుగులు వేస్తున్నట్టు సమాచారం. తాజా నివేదికల ప్రకారం, కంపెనీ దాదాపు 3,000 మంది ఉద్యోగులను తొలగించే యోచనలో ఉన్నట్లు తెలుస్తోంది. ముఖ్యంగా హ్యూమన్ రిసోర్స్, ఫైనాన్స్, మార్కెటింగ్ వంటి సపోర్టింగ్ డిపార్ట్‌మెంట్‌లలో సుమారు 15% మంది ఉద్యోగులు ఈ ప్రభావానికి గురయ్యే అవకాశం ఉందని అంతర్గత సమాచారం వెల్లడించింది.అయితే, ఈ విషయంపై రెనాల్ట్ ఇప్పటివరకు ఎలాంటి తుది నిర్ణయం తీసుకోలేదని స్పష్టం చేసింది. "లేఆఫ్స్‌కి సంబంధించి ఇంకా ఖచ్చితమైన నిర్ణయం తీసుకోలేదు. ఉద్యోగుల సంఖ్యపై ఇంకా స్పష్టత లేదు," అంటూ కంపెనీ ఓ ప్రకటనలో తెలిపింది. కానీ, సంస్థ తన వ్యవహారాలు మరింత సరళీకరించేందుకు, వేగవంతం చేయడానికీ, ఖర్చులు తగ్గించడానికీ చర్యలు తీసుకునే దిశగా వెళ్తున్నట్లు చెప్పింది.ఈ నిర్ణయానికి ప్రధాన కారణాలుగా యూఎస్ మార్కెట్‌లో విక్రయాల తగ్గుదల, ట్రంప్ సుంకాల పరోక్ష ప్రభావం, అలాగే చైనా ఎలక్ట్రిక్, హైబ్రిడ్ వాహనాల కంపెనీల నుంచి తీవ్ర పోటీ వంటి అంశాలు చెప్పబడుతున్నాయి. రెనాల్ట్ తన విక్రయాల్లో 70 శాతం వరకు యూరప్ మార్కెట్‌పై ఆధారపడుతోంది, కానీ అక్కడ కూడా విక్రయాల వృద్ధి క్రమంగా మందగిస్తూ వస్తోంది.ఈ పరిస్థితుల్లో రెనాల్ట్ భవిష్యత్తును దృష్టిలో పెట్టుకొని అభివృద్ధి చెందుతున్న దేశాలపై దృష్టిసారించాలని నిర్ణయించింది. 2027 నాటికి యూరప్ వెలుపల ఎనిమిది కొత్త మోడళ్లను విడుదల చేయాలనే లక్ష్యంతో 3 బిలియన్ యూరోలు (దాదాపు 3.4 బిలియన్ డాలర్లు) పెట్టుబడి పెట్టనుంది. ఇందులో భాగంగా, భారతదేశంలో ఓ ప్రత్యేక డిజైన్ సెంటర్‌ను కూడా ఏర్పాటు చేయాలని సంస్థ భావిస్తోంది. ఇది కేవలం తయారీ కోసమే కాకుండా, నూతన డిజైన్లు అభివృద్ధి చేసే కేంద్రంగా పని చేయనుంది.అంతేకాకుండా, రెనాల్ట్ ఎలక్ట్రిక్ వాహనాలు (EVs) మరియు హైబ్రిడ్ వాహనాల అభివృద్ధిపైనా స్పష్టమైన దృష్టి పెట్టనుంది. అంతర్జాతీయంగా పోటీ ఎక్కువవుతున్న సమయంలో, సంస్థ తన ఉనికిని నిలుపుకోవడానికి వ్యూహాత్మక మార్పులు చేపడుతున్నట్టు స్పష్టమవుతోంది.