అహ్మదాబాద్ టెస్టులో భారత్ ఘన విజయం

వెస్టిండీస్‌తో జరిగిన మొదటి టెస్టులో టీమిండియా ఘన విజయం సాధించింది. అహ్మదాబాద్ పిచ్‌పై భారత్ ఆల్‌రౌండర్ షోతో అదరగొట్టింది. బౌలర్లు రాణించడంతో ఇన్నింగ్స్ 140 పరుగుల తేడాతో విజయాన్ని సొంతం చేసుకుంది. భారత బౌలర్ల దెబ్బకు వెస్టిండీస్ జట్టు కనీసం ఒక్క రోజు కూడా క్రీజులో కొనసాగలేకపోయింది. రెండు టెస్టుల సిరీస్‌లో టీమిండియా 1 -0తో లీడ్‌లో ఉంది.

టీమిండియా 448/5 ఓవర్ నైట్ స్కోర్ తర్వాత మూడో రోజు ఆట ప్రారంభానికి ముందే మొదటి ఇన్నింగ్స్‌ను డిక్లేర్ చేసి వెస్టిండీస్‌ను బ్యాటింగ్‌కు ఆహ్వానించింది. తొలి ఇన్నింగ్స్‌లో పెద్దగా రాణించలేకపోయిన వెస్టిండీస్ బ్యాటర్లు రెండో ఇన్నింగ్స్‌లోనూ అదే ఆటతీరు కొనసాగించారు. పిచ్ స్పిన్‌కు అనుకూలించడంతో రవీంద్ర జడేజా తన సత్తా చూయించాడు. మొదటి సెషన్‌లోనే మూడు వికెట్లు తీసి సగం వెస్టిండీస్ జట్టును పెవిలియన్‌కు పంపించారు.

ఫస్ట్ డౌన్ బ్యాటర్ అతనాజే తప్ప మిగతా ఏ బ్యాటరూ పెద్ద రాణించలేకపోయారు. 46 పరుగులకే ఐదు వికెట్లు కోల్పోయిన విండీస్ జట్టుకు అతనాజే - గ్రీవ్స్ గౌరవ ప్రధమైన స్కోర్ అందించారు. ఈ ఇద్దరూ కలిసి ఆరో వికెట్‌కు 56 పరుగుల భాగస్వామ్యం నెలకొల్పారు. అతనాజే 38 పరుగులు చేయగా, గ్రీవ్స్ 25 పరుగులు చేసి అవుటయ్యారు. ఆఖర్లో జేడెన్ సీల్స్ 12 బంతుల్లో 22 పరుగులు బాదాడు. తొలి ఇన్నింగ్స్‌లో 162 పరుగులకు ఆలౌట్ అయిన వెస్టిండీస్ జట్టు, రెండో ఇన్నింగ్స్‌లో146 పరుగులకు ఆలౌట్ అయింది.

టీమిండియా బౌలర్లలో రవీంద్ర జడేజా నాలుగు వికెట్లు పడగొట్టగా.. మహమ్మద్ సిరాజ్ మూడు వికెట్లు తీసుకున్నాడు. కుల్దీప్ యాదవ్ ఇద్దర్ని పెవిలియన్‌కు పంపగా, వాషింగ్టన్‌కు ఒకటి దక్కింది. రెండో ఇన్నింగ్స్‌లో నితీష్ కుమార్ రెడ్డికి బౌలింగ్ దక్కకపోగా.. జస్ప్రీత్ బుమ్రా ఆరు ఓవర్లు వేసి ఒక్క వికెట్ కూడా తీసుకోలేకపోయాడు.

అంతకు ముందు భారత్ తన మొదటి ఇన్నింగ్స్‌లో 448/5 భారీ స్కోర్ నమోదు చేసింది. సాయి సుదర్శన్ మినహా మిగతా అందరు బ్యాటర్లు అద్భుతంగా రాణించారు. ఓపెనర్లు యశస్వి జైస్వాల్ 36, కేఎల్ రాహుల్ 100 పరుగులు చేయగా.. కెప్టెన్ శుభమన్ గిల్ హాఫ్ సెంచరీ నమోదు చేశాడు. ధృవ్ జురెల్ 125 పరుగులు చేసి అవుటవ్వగా, రవీంద్ర జడేజా 104 పరుగులతో నాటౌట్‌గా నిలిచాడు. జడేజా ఈ మ్యాచ్‌లో సెంచరీతో పాటు నాలుగు వికెట్లు తీసుకోవడం విశేషం.