క్యాష్ ఆన్ డెలివరీ.. కేంద్రం సీరియస్

ఇటీవలి కాలంలో చాలా మంది ఆన్‌లైన్ షాపింగ్ చేస్తున్నారు. ఇంట్లో నుంచి బయటికి వెళ్లి తిరగాల్సిన పని లేకుండా ఇంట్లో కూర్చొని.. ఆర్డర్ చేసి కావాల్సిన వస్తువును తెప్పించుకోవచ్చు. ఇక్కడ ఆర్డర్ చేసిన సమయంలో పేమెంట్ చేయొచ్చు లేదా క్యాష్ ఆన్ డెలివరీ అంటే.. వస్తువు వచ్చాక డబ్బులు ఇవ్వడం చేయొచ్చు. ఇక్కడ వినియోగదారుల్ని ఆకర్షించే ముఖ్య సదుపాయాల్లో క్యాష్ ఆన్ డెలివరీ కూడా ఒకటి. అయితే.. ఇక్కడ ఇటీవల ప్రముఖ ఇ- కామర్స్ సంస్థలు ఎక్కువ ఛార్జీలు వసూలు చేస్తున్నాయి. సైలెంట్‌గా ఎక్కువ వసూలు చేస్తున్నాయన్న సంగతి అందరికీ తెలియకపోవచ్చు.

>> అయితే ఇలా అదనపు ఛార్జీలు వసూలు చేస్తున్న ఇ- కామర్స్ సంస్థలపై కేంద్ర ప్రభుత్వం సీరియస్ అయింది. ఇది కస్టమర్లను దోపిడీకి గురి చేయడమేనని.. తీవ్ర ఆగ్రహం వ్యక్తం చేసింది. దీనిపై దర్యాప్తునకు ఆదేశించినట్లు.. కేంద్ర వినియోగదారుల వ్యవహారాల శాఖ మంత్రి ప్రహ్లాద్ జోషి స్పష్టం చేశారు.

 >> ఇటీవల పలు ఇ- కామర్స్ సంస్థలు COD (క్యాష్ ఆన్ డెలివరీ) ఆప్షన్ ఎంచుకున్నందుకు ప్రత్యేకంగా ఫీజులు వసూలు చేస్తున్నట్లుగా వినియోగదారుల వ్యవహారాల విభాగానికి కంప్లైంట్స్ వచ్చాయి. ఈ వ్యవహారంపైనే ఒక యూజర్ సోషల్ మీడియా వేదికగా ఆగ్రహం వ్యక్తం చేస్తూ.. పోస్ట్ చేశారు.

'వర్షాల సమయంలో.. ఫుడ్ డెలివరీ యాప్స్ అదనపు ఫీజులు వసూలు చేయడం పక్కనబెడితే.. ఇ- కామర్స్ సంస్థలు ఆఫర్ హ్యాండ్లింగ్ ఫీజు, పేమెంట్ హ్యాండ్లింగ్ ఫీజు, ప్రొటెక్ట్ ప్రామిస్ ఫీజు అని కొత్త కొత్త ఛార్జీలు వసూలు చేస్తున్నాయి. ఇక మీదట యాప్ స్క్రోల్ చేస్తే కూడా అదనంగా ఫీజులు వేస్తారేమో?' అని సదరు నెటిజన్ ఫిర్యాదు చేశారు.

ఈ పోస్టుపై కేంద్ర మంత్రి వెంటనే స్పందించారు. 'ఇలా అదనపు ఛార్జీలు వసూలు చేయడం అనేది.. వినియోగదారుల్ని తప్పుదోవ పట్టించి .. దోపిడీ చేసే చీకటి విధానమే.' అని అన్నారు. దేశంలో వేగంగా విస్తరిస్తున్న ఇ- కామర్స్ సెక్టార్‌లో పారదర్శకత, న్యాయమైన విధానాలు కొనసాగించేందుకు కేంద్రం కట్టుబడి ఉందని స్పష్టం చేసింది కేంద్రం. ఆన్‌లైన్ షాపింగ్ అనేది.. వినియోగదారులకు మరింత విశ్వసనీయంగా ఉండేలా.. ఇ- కామర్స్ సంస్థల మోసపూరిత విధానాల్ని నియంత్రించేందుకు కేంద్రం కఠిన చర్యలు తీసుకుంటుందని పేర్కొంది.