ఇండియన్ నేవీ చేతికి మరో అస్త్రం ఐఎన్ఎస్ ఆండ్రోత్‌.. 4 నెలల్లోనే రెండోది

మన జలాల్లోకి చొరబడే శత్రుదేశాల జలాంతర్గాముల (సబ్ మెరైన్‌లను) ఉనికిని పసిగట్టేందుకు.. ఇండియన్ నేవీకి మరో బ్రహ్మాండమైన అస్త్రం దొరికింది. ఇప్పటికే ఈ శ్రేణిలో ఐఎన్ఎస్ ఆర్నాలా సేవలు అందిస్తుండగా.. ఇప్పుడు దానికి తోడుగా ఐఎన్ఎస్ ఆండ్రోత్ వచ్చి చేరింది. అయితే ఈ రెండు యుద్ధ నౌకలను విశాఖలోనే కమిషనింగ్ చేయడం విశేషం. ఈ రెండూ చేరడంతో భారత నౌకా దళ.. యాంటీ సబ్‌మెరైన్ వార్‌ఫేర్ సామర్థ్యాలు గణనీయంగా పెరుగుతాయని సంబంధిత వర్గాలు వెల్లడించాయి.

ఐఎన్ఎస్ అండ్రోత్ అనే రెండో యాంటీ సబ్‌మెరైన్ వార్‌ఫేర్ షాలో వాటర్ క్రాఫ్ట్ యుద్ధనౌకను సోమవారం విశాఖ నేవల్ డాక్‌యార్డ్‌లో తూర్పు నౌకాదళ కమాండ్ ఫ్లాగ్ ఆఫీసర్ కమాండింగ్ ఇన్ చీఫ్ వైస్ అడ్మిరల్ రాజేష్ పెంధర్కర్ లాంఛనంగా కమిషనింగ్ చేశారు. ఈ కార్యక్రమంలో ఇండియన్ నేవీ అధికారులు, షిప్‌యార్డ్ ప్రతినిధులు హాజరయ్యారు.

ఐఎన్ఎస్ అండ్రోత్ చేరికతో భారత నౌకాదళం యాంటీ సబ్‌మెరైన్ వార్‌ఫేర్ సామర్థ్యాలు మరింత బలోపేతం అవుతాయని నేవీ వర్గాలు తెలిపాయి. ముఖ్యంగా తీర ప్రాంతానికి చేరువలో లోతు తక్కువగా ఉన్న సముద్ర జలాల్లో జరిగే ఆపరేషన్లకు ఇది చాలా కీలకమని పేర్కొన్నాయి. పశ్చిమ బెంగాల్ రాజధాని కోల్‌కతాకు చెందిన ప్రభుత్వరంగ నౌకా నిర్మాణ సంస్థ గార్డెన్ రీచ్ షిప్‌బిల్డర్స్ అండ్ ఇంజినీర్స్ (జీఆర్ఎస్ఈ) ఈ వార్ షిప్‌ను రూపొందించింది. ఈ ఐఎన్ఎస్ అండ్రోత్‌లో 80 శాతం కంటే ఎక్కువ భాగాలు దేశీయంగా తయారు చేసినట్లు సంబంధిత వర్గాలు వెల్లడించాయి. ఇది భారత స్వదేశీ నౌకా నిర్మాణ పరాక్రమాన్ని చాటుతోందని పేర్కొన్నాయి.

ఐఎన్ఎస్ అండ్రోత్ ప్రత్యేకతలు

యాంటీ సబ్‌మెరైన్ వార్‌ఫేర్ షాలో వాటర్ క్రాఫ్ట్ శ్రేణిలో ఐఎన్ఎస్ అర్నాలా తర్వాత ఇది రెండో యుద్ధనౌక కావడం గమనార్హం. మొదటిది ఐఎన్‌ఎస్ అర్నాలా.. ఈ ఏడాది జూన్ 18వ తేదీన ఇండియన్ నేవీలో చేరింది. లక్షద్వీప్‌లోని అండ్రోత్ అనే దీవి పేరును ఈ యుద్ధనౌకకు పెట్టారు. ఈ ఐఎన్ఎస్ అండ్రోత్‌లో దేశీయంగా రూపొందించిన 30 మిల్లీమీటర్ల సర్ఫేస్ గన్ ఉంది. ఈ నౌకలు విమానాలతో సమన్వయం చేసుకుంటూ శత్రువులకు సంబంధించిన జలాంతర్గాములను వేటాడనున్నాయి.

ఈ రెండు వార్ షిప్‌లలో అత్యాధునికమైన పోరాట నిర్వహణ వ్యవస్థలతో పాటు.. తేలికపాటి టార్పిడోలు, జలాంతర్గామి విధ్వంసక రాకెట్లు ఉంటాయి. తక్కువ లోతు ఉన్న జలాల్లోని జలాంతర్గాములను వేటాడేందుకు భారత నేవీ మొత్తం 16 అధునాతన నౌకలకు ఆర్డర్ ఇచ్చింది. ఇందులో 8 వార్‌ షిప్‌లను కోల్‌కతాలోని గార్డెన్ రీచ్ షిప్‌బిల్డర్స్ అండ్ ఇంజినీర్స్ ఉత్పత్తి చేస్తుండటం గమనార్హం. ఇక ఈ ఐఎన్ఎస్ అండ్రోత్ నేవీలో చేరడం ద్వారా.. భారత నౌకాదళ స్వదేశీకరణ ప్రయత్నాల్లో మరో కీలక మైలురాయిగా నిలిచిందని ఈస్ట్రన్ నేవల్ కమాండ్ ప్రకటన విడుదల చేసింది.