పనిమనిషికి 60 లక్షల ఇల్లు, రెండస్తుల బంగ్లా, షాపు
national | Suryaa Desk | Published : Tue, Oct 07, 2025, 07:35 PM
ఉరుకులు పరుగుల జీవితంలో ఇంటి పనులు కూడా చేసుకోలేకపోతున్నారు చాలా మంది. ఉగ్యోగాలంటూ కాళ్లకు చక్రాలు కట్టుకుని పరుగెడుతున్నారు. అందుకే చాలా మంది.. ఇంట్లో తమకు సహాయంగా ఉండేందుకు పని మనుషులను నియమించుకుంటారు. సాధారణంగా వీరికి రూ. 10 వేల లోపు జీతాలుంటాయి. ఇక కొన్ని నగరాల్లో పనిని బట్టి రూ.10 వేల నుంచి రూ.20 వేల మధ్య కూడా ఉండొచ్చు. అయితే ఇలా పనిమనుషులుగా చేసేవారు ఏం చేయగలుగుతారు అనుకుంటే పొరపాటే. తాజాగా ఓ పనిమనిషికి రూ.60 లక్షలతో 3BHK ఫ్లాట్ను కొనుగోలు చేసింది. ఈ విషయం యజమానికి చెప్పేసరికి.. ఒక్కసారిగా ఓనర్ షాక్కు గురైంది.
నోట మాట రాలేదు : ఓనర్
తమ పనిమనిషి రూ.60 లక్షల విలువైన 3BHK ఫ్లాట్ కొన్నదని సూరత్కు చెందిన నళిని అనే మహిళ ఎక్స్లో పోస్టు చేసింది. ఫర్నీచర్ కోసం మరో రూ. 4 లక్షలు అదనంగా ఖర్చు చేశానని చెప్పడంతో తాను ఒక్కసారిగా ఆశ్చర్యానికి గురయ్యానని ఆమె చెప్పింది. అయితే ఇల్లు కొనడానికి అంత ఖర్చు అయినా.. కేవలం రూ.10 లక్షలు మాత్రమే లోన్ తీసుకుందట పనిమనిషి. ఇంకా గుచ్చి గుచ్చి అడగ్గా.. సూరత్కు సమీపంలోని వెలాంజ గ్రామంలో ఆమెకు ఇప్పటికే రెండు అంతస్తుల ఇల్లు, ఒక దుకాణం ఉందని చెప్పిందట. ‘వాటిని అద్దెకిచ్చానని చెప్పడంతో నేను.. నోట మాట లేకుండా కూర్చున్నాను’ అని నళిని రాసుకొచ్చింది.
నళిని పెట్టిన ఈ పోస్టుకు భిన్నంగా స్పందిస్తున్నారు నెటిజన్లు. అది పన్ను కట్టకుండా దాచిన డబ్బుల మ్యాజిక్ అని ఓ యూజర్ కామెంట్ చేశాడు. దానికి నళిని.. డబ్బులను వృథా ఖర్చులు చేయకుండా.. స్మార్ట్గా పొదుపు చేయడం ద్వారా జరిగిన మ్యాజిక్ అని బదులిచ్చింది. ఇక ఓనర్ కంటే పనిమనిషి రిచ్ అయితే ఎలా ఉంటుందో.. అలాగే ఉంది మీ స్టోరీ అంటూ ఓ నెటిజన్ కామెంట్ చేశాడు.
మరోవైపు, ఈ పోస్టు పెట్టిన నళినికి గతంలో యూట్యూబ్ వల్ల చేదు అనుభవం ఎదురైంది. దాదాపు మూడేళ్లు యూట్యూబ్లో 'నళినీస్ కిచెన్ రెసిపీ' అనే ఛానల్ నడిపింది నళిని. దీనికోసం దాదాపు రూ.8 లక్షల వరకు ఖర్చు చేసింది. దాదాపు 250 వంట వీడియోలు చేసి యూట్యూబ్లో అప్లోడ్ చేసింది. ఏళ్లు గడిచినా.. ఆమెకు యూట్యూబ్ నుంచి రూ.0 కూడా ఆదాయం రాలేదు. దీంతో మనస్తాపానికి గురైన నళిని.. గతేడాది తన యూట్యూట్ కెరీర్కు వీడ్కోలు పలుకుతున్నట్లు తెలిపింది. ఆ సయమంలో వార్తల్లో నిలిచింది. అప్పటినుంచి సోషల్ మీడియాలో.. ముఖ్యంగా ఎక్స్లో నళిని యాక్టివ్గా ఉంటూ.. సామాజిక అంశాలు, మహిళలకు హక్కులకు సంబంధించి పోస్టులు పెడుతోంది.
|
|