బిహార్‌లో 3.66 లక్షల ఓట్లు ఎందుకు తొలగించారు..! వివరాలివ్వండి.. ఎన్నికల సంఘానికి సుప్రీం ఆదేశం

బిహార్‌లో ఎన్నికల సంఘం స్పెషల్ ఇంటెన్సివ్ రివిజన్ (SIR) చేపట్టిన విషయం తెలిసిందే. నకిలీ ఓట్లను తొలగించేందుకు ఈ మేరకు ఎన్నికల సంఘం చర్యలు తీసుకుంది. అనంతరం సెప్టెంబర్ 30న తుది ఓటర్ లిస్ట్‌ను విడుదల చేసింది. ఆ తర్వాత అక్టోబర్ 6న ఎన్నికల సంఘం బిహార్ అసెంబ్లీ ఎన్నికల షెడ్యూల్‌ను విడుదల చేసింది. అయితే ఈ తుది ఓటర్ జాబితా నుంచి 3.66 లక్షల ఓటర్లను ఎందుకు తొలగించారని.. ఆ వివరాలు సమర్పించాలని ఎన్నికల సంఘాన్ని సుప్రీం కోర్టు ఆదేశించింది.

స్పెషల్ ఇంటెన్సివ్ రివిజన్ తర్వాత తుది ఓటర్ జాబితాలో చేర్చిన వారిలో.. కొత్త ఓటర్లు, కొందరు పాత ఓటర్లు ఉన్నారని విచారణ సందర్భంగా ఎన్నికల సంఘం ధర్మాసనానికి వివరించింది. ఓటర్ లిస్ట్ నుంచి తీసేసిన పౌరులెవరూ ఇప్పటివరకు ఎలాంటి ఫిర్యాదులు చేయలేదని కోర్టుకు నివేదించింది. ఈ మేరకు ఎస్ఐఆర్‌ను సవాలు చేస్తూ దాఖలైన పిటిషన్లను న్యాయమూర్తులు జస్టిస్ సూర్యకాంత్, జస్టిస్ జోయ్‌మల్య బాగ్చిలతో కూడిన ధర్మాసనం విచారించింది. తుది జాబితా నుంచి మినహాయించబడిన ఓటర్ల సమాచారాన్ని అక్టోబర్ 9 లోగా సమర్పించాలని ధర్మాసనం ఆదేశించింది. తదుపరి విచారణ అదే రోజుకు వాయిదా వేసింది ధర్మాసనం.

ఈ విషయంపై సోమవారమే చీఫ్ ఎలక్షన్ కమిషనర్ జ్ఞానేశ్ కుమార్ వివరాలు వెల్లడించారు. ఆగస్టులో ముసాయిదా ప్రచురణకు ముందే బిహార్‌ ఓటర్ల జాబితా నుంచి 65 లక్షల మంది పేర్లను తొలగించినట్లు తెలిపారు. నెల పాటు సాగిన క్లెయిములు, అభ్యంతరాల స్వీకరణ ప్రక్రియతో.. మరో 3.66 లక్షల మంది పేర్లను తీసేసినట్లు వెల్లడించారు. భారతీయులు కానివారు, చనిపోయినవారు, ఇతర ప్రాంతాలకు వలస వెళ్లిపోయినవారు, ఓటరుగా ఒకటి కంటే ఎక్కువ చోట్ల పేరు నమోదు చేసుకున్నవారి పేర్లనే తొలగించామని చెప్పారు. అయితే తమ పేరును తప్పుగా తొలగించినట్లు ఎవరైనా అనుకుంటే.. సంబంధిత జిల్లా ఎన్నికల కార్యాలయాల్లో అప్లై చేసుకోవచ్చని వెల్లడించారు జ్ఞానేశ్ కుమార్.

విదేశీ ఓటర్ల సంగతేంటి?

బిహార్ ఓటర్ల జాబితా సవరణలో.. తొలగించిన అక్రమ వలసదారులు, విదేశీ ఓటర్ల సంఖ్యపై కేంద్ర ఎలక్షన్ కమిషన్ క్లారిటీ ఇవ్వలేదు. ఈ వివరాలకు సంబంధించిన గణాంకాలు తమ వద్ద లేవని.. అవి నియోజకవర్గ స్థాయి అధికారుల వద్ద ఉంటాయని సీఈసీ జ్ఞానేశ్ కుమార్ చెప్పారు. మొత్తం తొలగించిన 65 లక్షల ఓట్లలో.. 36 లక్షల మంది శాశ్వతంగా వలస వెళ్లినవారు లేదా నమోదు సమయంలో లేనివారు ఉన్నారు. అయితే వీరిలోనే అక్రమ విదేశీ ఓటర్లు ఉండే అవకాశం ఉంది.