చంద్రబాబు అధ్యక్షతన ఎస్‌ఐపీబీ సమావేశం

ఆంధ్రప్రదేశ్ ఆర్థిక ప్రగతికి కొత్త ఊపునిస్తూ రాష్ట్ర ప్రభుత్వం పెట్టుబడుల ఆకర్షణలో కీలక ముందడుగు వేసింది. ముఖ్యమంత్రి చంద్రబాబు అధ్యక్షతన సచివాలయంలో జరిగిన రాష్ట్ర పెట్టుబడుల ప్రోత్సాహక మండలి  11వ సమావేశంలో చరిత్రాత్మక నిర్ణయాలు తీసుకున్నారు. ఈ ఒక్క సమావేశంలోనే ఏకంగా రూ.1.14 లక్షల కోట్ల విలువైన 30కి పైగా భారీ ప్రాజెక్టులకు మండలి ఆమోదముద్ర వేసింది. ఈ ప్రాజెక్టుల ద్వారా రాష్ట్రవ్యాప్తంగా సుమారు 67 వేల మందికి ప్రత్యక్ష ఉపాధి అవకాశాలు లభించనున్నాయని ప్రభుత్వ వర్గాలు అంచనా వేశాయి.మూడు గంటల పాటు సుదీర్ఘంగా సాగిన ఈ సమావేశంలో ఐటీ, ఇంధనం, పర్యాటకం, ఏరోస్పేస్, ఫుడ్ ప్రాసెసింగ్ వంటి కీలక రంగాలకు సంబంధించిన ప్రతిపాదనలపై లోతుగా చర్చించారు. ప్రతి ప్రాజెక్టు అమలుకు ఉన్న అవకాశాలు, వాటి ద్వారా రాష్ట్రానికి కలిగే ప్రయోజనాలను అధికారులు ముఖ్యమంత్రికి వివరించారు. ఈ సమావేశంలో తీసుకున్న నిర్ణయాల్లో అత్యంత కీలకమైనది ఐటీ రంగానికి సంబంధించింది. రాష్ట్ర చరిత్రలోనే అతిపెద్ద విదేశీ ప్రత్యక్ష పెట్టుబడి  నిలిచే 'రైడెన్ ఇన్ఫోటెక్ డేటా సెంటర్' ప్రాజెక్టుకు ఎస్‌ఐపీబీ ఆమోదం తెలిపింది. ఈ ఒక్క ప్రాజెక్టు విలువనే రూ.87,520 కోట్లుగా ఉండటం విశేషం. ఈ భారీ పెట్టుబడిని రాష్ట్రానికి తీసుకురావడంలో కీలక పాత్ర పోషించిన ఐటీ శాఖ మంత్రి నారా లోకేశ్‌ను ముఖ్యమంత్రి చంద్రబాబు ప్రత్యేకంగా అభినందించారు.ఈ సందర్భంగా ముఖ్యమంత్రి చంద్రబాబు మాట్లాడుతూ, "గడిచిన 15 నెలల కాలంలో పెట్టుబడులను ఆకర్షించడానికి మేము చేస్తున్న ప్రయత్నాలు మంచి ఫలితాలు ఇస్తున్నాయి. ఈ రోజు తీసుకున్న నిర్ణయాలు రాష్ట్ర ప్రగతిలో ఒక మైలురాయిగా నిలుస్తాయి" అని అన్నారు. కేవలం పెట్టుబడులకు ఆమోదం తెలపడమే కాకుండా, వాటిని క్షేత్రస్థాయిలో వేగంగా అమలు చేసేందుకు ప్రభుత్వం పక్కా ప్రణాళికతో ముందుకెళుతోంది. ఆమోదం పొందిన భారీ ప్రాజెక్టుల పనులను వేగవంతం చేయడానికి, కంపెనీలతో నిరంతరం సమన్వయం చేసుకునేందుకు ప్రత్యేకంగా అధికారులను నియమించాలని ఈ సమావేశంలో నిర్ణయించారు.ఇప్పటివరకు జరిగిన ఎస్‌ఐపీబీ సమావేశాల ద్వారా రాష్ట్రానికి మొత్తం రూ.7.07 లక్షల కోట్ల పెట్టుబడులకు ఆమోదం లభించిందని అధికారులు వెల్లడించారు. ఈ ప్రాజెక్టులన్నీ పూర్తయితే రాష్ట్రంలో దాదాపు 6.20 లక్షల మందికి ఉద్యోగాలు లభించే అవకాశం ఉందని తెలిపారు. తాజా నిర్ణయాలతో ఆంధ్రప్రదేశ్ ఆర్థిక వ్యవస్థ పునరుద్ధరణకు బలమైన పునాది పడుతోందని, పారిశ్రామికంగా రాష్ట్రం వేగంగా అభివృద్ధి చెందనుందని నిపుణులు అభిప్రాయపడుతున్నారు.