ఏపీలో వారికి ఉచితంగా రూ.20వేలు.., అస్సలు నమ్మొద్దు

ఆంధ్రప్రదేశ్‌లో వితంతువులను ఓ ముఠా మోసం చేస్తోంది. అసలు అమలులో లేని పథకం పేరు చెప్పి రూ.2 వేలు ఇస్తే రూ.20 వేలు ఇప్పిస్తామని ఆశ చూపిస్తున్నారు. ఈ మోసంలో జిరాక్స్ షాపుల నిర్వాహకులు, కొందరు ఉద్యోగులు కూడా భాగస్వాములు అవుతున్నారు. రోజుకు వందల సంఖ్యలో దరఖాస్తులు వస్తుండటంతో, అసలు పథకమే లేకుంటే ఈ కాగితాలు ఎక్కడివని అధికారులు ఆందోళన చెందుతున్నారు. తాజాగా పల్నాడు జిల్లాలో కొందరు తహసీల్దార్లు ఆ పథకం లేదు అంటూ ప్రకటనలు కూడా విడుదల చేయాల్సి వచ్చింది. ఈ కేటుగాళ్లు వితంతువుల అమాయకత్వాన్ని ఆసరాగా చేసుకుంటున్నారు. అసలు లేని పథకం ఉందని నమ్మించి.. రూ.2వేలు తీసుకుని రూ.20వేలు ఇప్పిస్తామని చెబుతున్నారు. ఈ వలలో పడి ఎంతో మంది మహిళలు మోసపోయారు. పథకమే లేదు.. రోజుకు వందల సంఖ్యలో దరఖాస్తులు వస్తుండటంతో అధికారులు గందరగోళంలో ఉన్నారు.

భర్త చనిపోయి, ఆదరువు లేని అల్పాదాయ కుటుంబాలకు గతంలో కేంద్ర, రాష్ట్ర ప్రభుత్వాలు అందించిన జాతీయ కుటుంబ ప్రయోజన పథకం (ఎన్‌ఎఫ్‌బీఎస్‌) నిలిచిపోయింది. అయితే దీన్ని ఇప్పుడు ఆసరాగా చేసుకుని ముఖ్యమంత్రి చంద్రబాబునాయుడు ఫోటోతో ఉన్న దరఖాస్తు ఫారాలను ఫోటోస్టాట్, ఇంటర్నెట్ సెంటర్లలో రూ.50 నుంచి రూ.100 వరకు అమ్ముతున్నారట. 2017 ఏప్రిల్‌ 12వ తేదీ తర్వాత భర్త చనిపోయి భార్యలకు రూ.20 వేల సాయం అందుతుందని మాయ మాటలు చెబుతున్నారట. పథకం లేదని చెప్పినా, తహసీల్దార్ కార్యాలయాల్లో ఈ పత్రాలను పెడుతున్నారని వితంతువులు, వారి తరఫున వచ్చినవారు చెబుతున్నారు. విచిత్రంగా మరణ ధ్రువపత్రం, నివాస ధ్రువపత్రం వంటి అవసరమైన పత్రాలపై సంతకాల కోసం కొందరు అదనంగా డబ్బులు తీసుకుంటున్నారని బాధితులు ఆరోపిస్తున్నారు.

ఈ పథకం కింద రూ.20 వేలు రావాలంటే.. ముందుగా రూ.2 వేలు ఇవ్వాలని దళారులు, మాయగాళ్లు డిమాండ్ చేస్తున్నారట. అంతేకాదు దరఖాస్తుల కొనుగోలుతో పాటు అప్లికేషన్ పూరించేందుకు, ఇతరాలకు వితంతువులు డబ్బులు ఇస్తు్న్నారట. అయితే రాష్ట్రంలో అసలు ఎన్‌ఎఫ్‌బీఎఫ్‌ అనే పథకం అమల్లో లేదని తహసీల్దార్లు, గ్రామ, వార్డు సచివాలయాల పర్యవేక్షకులు తేల్చి చెప్పారు. రాష్ట్రంలో వితంతువులు దళారుల్ని నమ్మి మోసపోవద్దని సూచిస్తున్నారు. కొందరు సోషల్ మీడియాలో ఈ పథకం ఉన్నట్లు ప్రచారం చేస్తున్నారని.. నమ్మొద్దని సూచిస్తున్నారు.