మన దేశంలో,,,ప్రపంచంలోనే అతి పొడవైన రైల్వే ప్లాట్‌ఫారమ్‌.. గిన్నిస్ రికార్డు

మన దేశంలో రైల్వేలకు పురాతన చరిత్ర ఉంది. బ్రిటీష్ కాలం నాటి నుంచి సరకు రవాణా, ప్రయాణికులను ఒక చోటు నుంచి మరో చోటుకు తరలించేందుకు రైల్వేలు దశాబ్దాలుగా ఎంతగానో ఉపయోగపడుతున్నాయి. ఇక మన దేశంలో ఉన్న రైళ్లు, రైల్వే స్టేషన్లు.. ప్రపంచవ్యాప్తంగా ఎన్నో రికార్డులను కలిగి ఉన్నాయి. ఇక ప్రపంచంలోనే ఏ దేశంలో లేని విధంగా అత్యంత పొడవైన రైల్వే ప్లాట్‌ఫారమ్‌.. మన దేశంలోనే ఉండటం విశేషం. కర్ణాటక రాష్ట్రంలోని హుబ్బళ్లి జంక్షన్ ‌లో ఉన్న ఈ ప్లాట్‌ఫారమ్ ఏకంగా 1,507 మీటర్లు (4,944 అడుగులు) పొడవు ఉంటుంది. దీంతో ఈ రైల్వే ప్లాట్‌ఫారమ్.. గిన్నిస్ బుక్ ఆఫ్ వరల్డ్ రికార్డుల్లో స్థానం సంపాదించింది. ఇక ఈ హుబ్బళ్లి జంక్షన్ అత్యంత కీలకమైన కేంద్రంగా దక్షిణ భారతదేశ రైల్వే నెట్‌వర్క్‌లో భాగంగా ఉంటుంది.

హుబ్బళ్లి జంక్షన్ ప్రత్యేకతలు

మొదట హుబ్బళ్లి జంక్షన్ ప్లాట్‌ఫారమ్ పొడవు సాధారణంగానే ఉండేది. అయితే ఈ రైల్వే స్టేషన్‌లో మరమ్మతులు చేపట్టారు. దీంతో 2023 మార్చిలో ఈ ప్లాట్‌ఫారమ్ ఆధునీకరణ ప్రాజెక్ట్ పూర్తి అయిన తర్వాత.. గిన్నిస్ బుక్ ఆఫ్ వరల్డ్ రికార్డ్స్ దీన్ని అధికారికంగా ప్రపంచంలోనే అతి పొడవైన రైల్వే ప్లాట్‌ఫారమ్‌గా గుర్తించింది.

ఇక ఈ హుబ్బళ్లి జంక్షన్ బెంగుళూరు, హోసపేట, వాస్కో డ గామా, బెళగావి వంటి కీలక నగరాలను కలుపుతూ.. దక్షిణ భారతదేశంలోని రైల్వే నెట్‌వర్క్‌లకు కీలక కేంద్రంగా సేవలు అందిస్తోంది. ఇక ఈ పొడవైన ప్లాట్‌ఫారమ్ కారణంగా హుబ్బళ్లి జంక్షన్ రైల్వే స్టేషన్‌లో ప్రయాణికుల రద్దీ తక్కువగా ఉంటుందని రైల్వే వర్గాలు వెల్లడించాయి.

అంతేకాకుండా.. ఈ పొడవైన ప్లాట్‌ఫారమ్ ఉండటం వల్ల.. ఒకేసారి ఒకటి కంటే ఎక్కువ రైళ్లను ఆపడానికి అవకాశం ఉంటుందని పేర్కొన్నాయి. దీంతో ప్రయాణికులకు మెరుగైన సౌకర్యం లభిస్తుందని చెబుతున్నాయి. ఇక హుబ్బళ్లి జంక్షన్ సౌత్ వెస్ట్రన్ రైల్వే ప్రధాన కార్యాలయంగానూ పనిచేస్తోంది. ఈ కారణంగా ఇక్కడ.. ప్రయాణికులకు మాత్రమే కాకుండా.. సరుకు రవాణాకు కూడా ఉపయోగపడుతోంది. దీనివల్ల ప్రాంతీయ వాణిజ్యంతోపాటు.. అనుసంధానంలోనూ కీలక పాత్ర పోషిస్తోంది.

దాదాపు 7 వేల కంటే ఎక్కువ రైల్వే స్టేషన్లు, రోజుకు 13 వేల ప్యాసింజర్ రైళ్లతో భారత రైల్వే నెట్‌వర్క్.. ఇప్పటికే ప్రపంచంలోనే అతిపెద్ద రైల్వేల్లో ఒకటిగా నిలిచింది. ఈ ఘనతలో హుబ్బళ్లి జంక్షన్ పొడవైన ప్లాట్‌ఫారమ్‌తో మరో సరికొత్త మైలురాయిని చేరుకుంది.